Read Свето Писмо: Стандардна Библија 2006 (со девтероканонски книги) Левит 22 Bible Online

Левит 22 - Свето Писмо: Стандардна Библија 2006 (со девтероканонски книги) bible

Левит 22

¹И му рече Господ на Мојсеј, велејќи:

²„Кажи му на Арон и на синовите негови да постапуваат внимателно со светите приноси од синовите израилски и да не го осквернуваат Моето свето име во тоа, што Ми го посветуваат. Јас сум Господ.

³Кажи им: ако некој во целото ваше потомство во вашите родови, имајќи на себе некаква нечистотија, пристапи кон светите дарови, што синовите Израилеви Му ги посветуваат на Господ, да се истреби таа душа од пред Мене. Јас сум Господ.

⁴Оној човек од семето Ароново, кој е лепрозен, или има гонореја, да не јаде од светите дарови сѐ додека не се исчисти, и кој се допре до нешто нечисто: до мртовец, или кому му се случи истечување на семе,

⁵или кој ќе се допре до некој гад, па се оскверни, или до човек од кого се оскверни од каква и да било нечистотија,

⁶тој што се допрел до тоа да биде нечист до вечерта и да не јаде од светите приноси, пред да го измие целото свое тело со вода;

⁷но, штом зајде сонцето, и биде чист, тогаш да јаде од осветените дарови, бидејќи тоа е негова храна.

⁸Мрша или ѕверојадина тој да не јаде, за да не се оскверни од нив. Јас сум Господ.

⁹Нека ги пазат заповедите Мои, за да не навлечат поради нив грев врз себе и да не умрат поради нив, ако се осквернат. Јас сум Господ, Кој ги осветува.

¹⁰Никој од друг род да не јаде од светите приноси: кој се населил кај свештеник, ни наемникот негов, не смее да јаде од светите приноси.

¹¹Ако свештеникот си купи човек со пари, тој нека јаде од лебовите негови; исто така и домашните негови можат да јадат од неговите лебови.

¹²Ако свештеничка ќерка се омажи за човек од друг род, таа не смее да јаде од принесените свети дарови,

¹³а ако таа остане вдовица или биде разведена, а нема деца, и се врати во татковата куќа, како што била на млади години, тогаш таа може да јаде од лебовите на татко си; но никој од друг род не смее да јаде од нив.

¹⁴Кој поради незнаење јаде нешто од осветените приноси, тој дел треба да му го врати на свештеникот и да додаде кон него уште една петина од тоа.

¹⁵И да не ги осквернуваат светињите на синовите израилски, принесувани на Господ;

¹⁶и да не навлекуваат врз себе вина поради престап, со тоа што ќе јадат од нивните дарови, зашто Јас сум Господ, Кој ги осветува.“

¹⁷И му рече Господ на Мојсеј, велејќи:

¹⁸„Кажи им на Арон и на синовите негови и на сите синови израилски и речи им: ако некој од синовите израилски, или од придојдените (населени) меѓу народот израилски, било поради некакво ветување или од благодарност принесува жртви какви што Му се принесуваат на Господ, за сепаленица,

¹⁹за да му се прими жртвата милостиво, таа треба да биде од машки пол од стадата волови, од овците, или од козите, без недостаток;

²⁰а сѐ што има недостаток, да не се принесува, бидејќи тоа ќе Му биде непријатно.

²¹И ако некој Му принесува на Господ жртва за мир, исполнувајќи завет или по своја волја, (или на вашите празници) тогаш тоа треба да биде од крупниот или од ситниот добиток и да биде без недостаток, за да му биде примена; никаков недостаток не треба да има на неа.

²²Животно слепо или со скршени крајници, или сакато, или краставо, или со егзема — такви не принесувајте Му на Господ и од нив не давајте на Господ жртва на жртвеникот.

²³Животно од крупниот или од ситниот добиток со предолги или со претерано куси нозе можеш да принесеш како жртва по своја волја: но ако е за завет, нема да се прими.

²⁴Животно со смачкани, згмечени, извадени или исечени тестиси не принесувај Му на Господ; во земјата ваша не правете го тоа.

²⁵И од рацете на туѓинец не примајте такви животни за да ги принесувате како дарови на вашиот Бог, затоа што тие се повреда, имаат недостаток: тие нема да ви се примат.“

²⁶И му рече Господ на Мојсеј, велејќи:

²⁷„Кога ќе се роди теле, или јагне, или козле, да остане кај мајка си седум дена, а од осмиот ден и натаму ќе може да се принесува како дар на Господ, —

²⁸но не колете ни крава, ниту овца, ниту коза во ист ден заедно со нивната рожба.

²⁹Ако Му принесувате на Господ жртва од благодарност, со радост принесувајте ја.

³⁰Таа да се изеде истиот ден; не оставајте од месото за другиот ден. Јас сум Господ.

³¹Пазете ги заповедите Мои и извршувајте ги. Јас сум Господ.

³²Не осквернувајте го Моето свето име, за да бидам свет меѓу синовите на Израил. Јас сум Господ, Кој ве осветува,

³³Кој ве изведов од египетската земја, за да бидам ваш Бог. Јас сум Господ.“