Read Свето Писмо: Стандардна Библија 2006 (со девтероканонски книги) Левит 25 Bible Online

Левит 25 - Свето Писмо: Стандардна Библија 2006 (со девтероканонски книги) bible

Левит 25

¹И му рече уште Господ на Мојсеј, на планината Синај, велејќи:

²„Јави им на синовите на Израил и кажи им: кога ќе дојдете во земјата, што ви ја давам Јас, земјата што ви ја давам нека ја празнува саботата Господова;

³шест години засејувај ја нивата своја и шест години режи го лозјето свое и прибирај ги плодовите нивни,

⁴а во седмата година е сабота за земјата — нека има одмор земјата; тоа е сабота Господова: не ја сеј нивата своја и не го режи лозјето свое.

⁵Она што само ќе израсне на нивата твоја, не го жнеј, и грозјето од нережаните лози твои не собирај го: нека биде тоа година за починка на земјата.

⁶И за време на починката на земјата тоа нека биде храна за сите вас — за тебе и за твојот роб, за робинката твоја, за наемникот твој и за придојдениот, населен кај тебе;

⁷а за добитокот твој и за дивите животни што се на земјата твоја, тие плодови нека им бидат храна.

⁸И изброј седум саботни години, седумпати по седум, за да ти излезат во седумте саботни години четириесет и девет години;

⁹и затрубете го со трубен глас по целата земја ваша седмиот месец, во десеттиот ден од месецот; во Денот на очистувањето затрубете со труба по целата ваша земја;

¹⁰и осветете ја педесеттата година и објавете слобода по земјата за сите жители; тоа да ви биде јубилеј; и секој да се врати на својот имот, и секој да се врати при родот свој.

¹¹Педесеттата година да ви биде јубилеј; во таа година не сејте и не жнејте го она што ќе израсне само од земјата, ниту да го собирате грозјето од нережаните лози,

¹²зашто тоа е јубилеј: свет да биде тој за вас — од нивите јадете го она што само ќе израсне.

¹³Во таа јубилејна година секој нека се врати на имотот свој.

¹⁴Ако му продаваш нешто на ближниот свој, или ако купуваш нешто од ближниот свој, не нанесувајте си неправда еден на друг;

¹⁵ти треба да купуваш од ближниот свој според бројот на годините по јубилејот, и според бројот на годините на приходот тој треба да ти продава;

¹⁶ако остануваат многу години, зголеми ја цената; ако остануваат малку години, намали ја цената; зашто определен број годишни жетви ти продава тој.

¹⁷Не нанесувајте си неправда еден на друг; имај страв од твојот Бог, зашто Јас сум Господ, вашиот Бог.

¹⁸Извршувајте ги заповедите Мои, пазете и исполнувајте ги законите Мои, и спокојно ќе живеете на земјата;

¹⁹и земјата ќе ги дава своите плодови, и ќе јадете до наситка и спокојно ќе живеете на неа.

²⁰Ако кажете: што ќе јадеме во седмата година, кога не сме посеале ништо, не сме собрале производи наши,

²¹Јас ќе испратам благослов Мој во шестата година, и таа ќе даде плод за три години;

²²а во осмата година ќе сеете, но ќе јадете од старите производи до деветтата година; и додека не узреат плодовите нејзини, ќе јадете од старото.

²³Земјата не смее да се продава засекогаш, зашто земјата е Моја; вие сте кај Мене придојдени и доселеници;

²⁴по целата земја на вашите имоти дозволувајте земјата да се откупува.

²⁵Ако брат ти, кој е кај тебе, осиромаши и го продаде својот имот, тогаш да дојде неговиот најблизок роднина и нека го откупи продаденото од братот негов.

²⁶Но, ако нема свој, кој да го откупи, но тој самиот успее и најде колку што треба за откуп,

²⁷тогаш да ги пресмета годините од продажбата своја и да го врати другото на оној кому му го продал, и повторно да влезе во владението свое.

²⁸Ако, пак, не најде колку што треба, за да врати, продаденото нека остане во рацете на купувачот сѐ до годината на јубилејот, а во јубилејната година да стане слободно и повторно да влезе во имотот свој.

²⁹Ако некој продаде куќа за живеење во град ограден, таа може да се откупи сѐ додека не измине годината на продажбата нејзина — во текот на годината таа може да се откупи.

³⁰Ако, пак, не се откупи додека не измине годината од продажбата нејзина, куќата што е во градот, ограден со ѕидови, засекогаш ќе остане во рацете на купувачот и родот негов, и во годината на јубилејот нема да му се одземе.

³¹А куќите по селата, околу кои нема ѕидови, треба да се сметаат за ниви; тие (секогаш) можат да се откупуваат, а во јубилејната година ќе се вратат.

³²А што се однесува до градовите на левитите, куќите во градовите на владението нивно, секогаш можат да ги откупуваат левитите;

³³ако некој од левитите не ја откупи, тогаш продадената куќа во градот што е определен за левитите, ќе биде вратена во времето на јубилејната година, зашто куќите во градовите на левитите се нивно владение меѓу синовите на Израил.

³⁴И земјата околу нивните градови не смее да се продава, зашто таа е нивно вечно владение.

³⁵Ако братот твој осиромаши и изнемогне, поткрепи го, било тој да е туѓинец или преселеник, нека живее кај тебе.

³⁶Не земај му ни лихва, ни печалба, и имај страв од твојот Бог; (Јас сум Господ) братот твој нека живее кај тебе.

³⁷Не давај му пари со камата, а и храната твоја не давај му ја со добивка.

³⁸Јас сум Господ, Бог ваш, Кој ве изведе од египетската земја за да ви ја дадам земјата хананска и да бидам ваш Бог.

³⁹Кога ќе осиромаши кај тебе братот твој, и ти се продаде, не товари го со ропска работа;

⁴⁰тој треба да ти биде како наемник, како преселник; нека ти работи до јубилејната година,

⁴¹а тогаш нека си отиде откај тебе, тој самиот и децата негови со него, и нека се врати меѓу родот свој и пак да влезе во имотот на татковците свои,

⁴²бидејќи тие се Мои слуги, кои Јас ги изведов од египетската земја: тие не смеат да се продаваат како што се продаваат робовите.

⁴³Не господари над нив со жестокост и имај страв од твојот Бог.

⁴⁴Ако сакаш да имаш свој роб и своја робинка, купувајте си роб и робинка од народите што се околу вас; од нив да си земате робови и робинки.

⁴⁵Исто така и од децата на преселниците, населени меѓу вас, можете да купувате; и од нивните роднини, родени во земјата ваша, ако ги има, и тие можат да ви бидат сопственост.

⁴⁶Можете да ги предавате во наследство и на синовите ваши по вас како вечен имот; а браќата ваши, синовите израилски, не обременувајте ги со многу работа.

⁴⁷Ако твојот придојден или твојот преселник се збогати, а братот твој пред него осиромаши и му се продаде на придојдениот, населен кај тебе, или на некој друг од родот на придојдените,

⁴⁸тогаш по продажбата тој може да биде откупен; некој од браќата негови треба да го откупи,

⁴⁹или братот на неговиот татко, или синот на стрикото негов треба да го откупи, или кој и да било од родот негов во племето, да го откупи, или самиот тој, ако се снајде да се откупи.

⁵⁰И да се расплати со купувачот свој, сметајќи од годините, кога се продал, па сѐ до годината на јубилејот, и да ги врати парите за кои се продал според бројот на годините, при што да се смета дека кај него бил како наемник;

⁵¹и ако остануваат уште многу години, тогаш сразмерно на нив да го врати својот откуп во пари, за кои бил купен;

⁵²ако, пак, остануваат уште малку години до јубилејната година, да пресмета и сразмерно на годините да плати за себе откуп.

⁵³Во текот на сите години тој да биде кај него како наемник, но тој не треба да биде преоптоваруван со работа пред твоите очи.

⁵⁴Ако, пак, не се откупи на тој начин, тогаш во јубилејната година да замине самиот тој и децата негови со него,

⁵⁵затоа што синовите на Израил се Мои слуги; тие се Мои слуги, кои ги изведов од египетската земја. Јас сум Господ, вашиот Бог.“