Read Свето Писмо: Стандардна Библија 2006 (со девтероканонски книги) Еремија 13 Bible Online

Еремија 13 - Свето Писмо: Стандардна Библија 2006 (со девтероканонски книги) bible

Еремија 13

¹Вака ми рече Господ: „Оди и купи си ленен појас и опаши се со него, но не клавај го во вода.“

²Јас си купив појас, како што рече Господ, и го препашав крстот свој.

³И беше упатено слово Господово до мене по вторпат, и ми беше речено —

⁴„Земи го појасот, што го купи, и кој ти е на крстот твој, па стани и оди до потокот Перат и сокриј го таму во некоја камена пукнатина.“

⁵Јас отидов и го сокрив кај Перат, како што ми заповеда Господ.

⁶А штом изминаа повеќе дни, Господ ми рече — „Стани, оди кај Перат и земи го оттаму појасот, за кој ти бев заповедал да го сокриеш таму.“

⁷И јас отидов до Перат, ископав и го зедов појасот од местото, каде што го бев сокрил, а тоа — појасот беше изгнил и станал веќе неупотреблив.

⁸И беше упатено слово Господово до мене:

⁹„Вака вели Господ: ќе ја скршам гордоста на Јуда, и големата гордост на Ерусалим.

¹⁰Тој лош народ, кој не сака да ги слуша зборовите Мои, живее според тврдокорното срце свое и оди по други богови, за да им служи и да им се поклонува, па ќе биде како овој појас, кој не чини за ништо.

¹¹Зашто, како што појасот се прилепува до крстот на човекот, така и Јас го прилепив до Себе сиот Израил и сиот Јудин дом, вели Господ, за да бидат Мој народ и Моја слава, похвала и украс, но тие не послушаа.“

¹²Затоа, кажи им го овој збор: „Вака вели Господ, Бог Израилев — секој мев за вино се полни со вино. Тие ќе ти речат: зар ние не знаеме дека секој мев за вино се полни со вино?

¹³А ти кажи им: еве што вели Господ — Јас ќе ги наситам со вино до опивање сите жители на таа земја, и царевите, кои седат на Давидовиот престол, и свештениците, и пророците и сите ерусалимски жители,

¹⁴и ќе ги судрам еден со друг, татковците со синовите заедно, вели Господ; нема да ги поштедам, нема да ги помилувам, нема да зажалам што ќе ги истребам.“

¹⁵Слушајте и внимавајте; немојте да бидете горди, зашто Господ зборува.

¹⁶Подајте Му слава на Господ, вашиот Бог, додека Тој сѐ уште не испратил темнина и додека сѐ уште нозете ваши не се сопнуваат по темни гори; тогаш ќе очекувате светлина, а Тој ќе ја претвори во смртна сенка и ќе ја направи темнина.

¹⁷Ако, пак, не го послушате тоа, душата моја скришно ќе плаче поради вашата гордост, ќе плаче горко, и очите мои солзи ќе леат; бидејќи стадото Господово ќе биде во плен одведено.

¹⁸Кажи им на царот и на царицата: „Понизете се, седнете пониско, зашто ќе паднат од главите ваши венците на вашата слава.“

¹⁹Јужните градови се затворени и нема кој да ги отвори; цел Јуда во ропство се одведува заедно со сиот плен.

²⁰Кренете ги очите и погледајте ги оние што идат од север: каде е стадото, што ти беше дадено, убавото стадо твое?

²¹Што ќе речеш, ќерко Сионова, кога ќе те посети Тој? Ти сама ги научи да господарат над тебе: нема ли да те стегнат болки како жена кога раѓа?

²²Ако речеш во срцето свое: „Зошто ме снајде ова?“ — па, поради многуте твои беззаконија, скутовите ти се разголија и насилство над тебе извршија.

²³Може ли Етиопјанец да ја смени кожата своја и леопардот — дамките свои? Па така и вие, можете ли да правите добро, кога сте свикнати да вршите зло?

²⁴Затоа ќе ги развеам како прав, ќе ги разнесам со пустински ветар.

²⁵Ете ја твојата ждрепка, делот што сум ти го одмерил, вели Господ, бидејќи ти Ме заборави и се потпираше на лагата.

²⁶Затоа, Јас самиот ќе те разголам, за да се види срамотијата твоја.

²⁷Го видов твоето прељубодејство и твоите бесни похоти и гнасотии по височинките и по полињата; тешко тебе, Ерусалиме; зар нема да се очистиш? И до кога тоа ќе биде така?