Read Свето Писмо: Стандардна Библија 2006 (со девтероканонски книги) Еремија 21 Bible Online

Еремија 21 - Свето Писмо: Стандардна Библија 2006 (со девтероканонски книги) bible

Еремија 21

¹Слово, кое дојде од Господ до Еремија, кога царот Седекија го испрати до него Пашхур, синот Мелхиев, и свештеникот Софонија, син на Маасеја, за да му кажат:

²„Прашај Го Господа за нас, зашто вавилонскиот цар Навуходоносор војува против нас; можеби Господ ќе направи со нас некое од Своите чуда, за да си отиде тој од нас!“

³И им рече Еремија: ова кажете му го на Седекија —

⁴вака вели Господ, Бог Израилев — еве, Јас ќе ги свртам назад воените оружја, што се во вашите раце, со кои се биете со вавилонскиот цар и против Халдејците, кои ве опседнуваат наоколу, надвор од ѕидовите, и ќе ги соберам во средината на градот;

⁵и Сам ќе војувам против вас со протегната рака и со силна десница, со гнев и со јарост и со голема лутина.

⁶И ќе поразам сѐ, што живее во тој град — и луѓето и добитокот; од голем помор ќе изумрат тие.

⁷А потоа, вели Господ, јудејскиот цар Седекија, слугите негови, народот и сите преживеани од помор во тој град, од меч и од глад, ќе ги предадам во рацете на Навуходоносор, царот вавилонски, во рацете на нивните непријатели и во рацете на оние, кои ја бараат душата нивна, и тој ќе ги сотре со остар меч и нема да ги поштеди, нема да ги пожали и нема да се смилостиви над нив.

⁸Па кажи му на тој народ — вака вели Господ: еве, Јас поставувам пред вас пат кон живот и пат кон смрт,

⁹оној, што ќе остане во тој град, ќе умре од меч, глад и помор, а кој ќе излезе и ќе им се предаде на Халдејците, што го опсадуваат, ќе остане жив — животот ќе му биде како воен плен;

¹⁰зашто Јас го свртев лицето Свое против тој град, вели Господ, за зло, а не за добро; тој ќе биде предаден во рацете на вавилонскиот цар, и тој ќе го изгори со оган.

¹¹Зборувај и кон домот на јудејскиот цар: чујте го словото Господово —

¹²доме Давидов, така вели Господ: делете правда рано изутрина и избавете го угнетуваниот од рацете на угнетувачот, за да не избувне оган од јароста Моја и да се разгори поради вашите лоши дела, што никој не ќе може да го угасне.

¹³Еве, Јас сум против тебе, ти што седиш, како на карпа во долината, вели Господ, против вас сум — вие кои велите: „Кој ќе излезе против нас и кој може да влезе во нашите живеалишта?“

¹⁴Но, Јас ќе ве казнам според плодовите на делата ваши, вели Господ, и ќе запалам оган во вашата гора, која ќе проголта сѐ што постои околу неа.