Read Свето Писмо: Стандардна Библија 2006 (со девтероканонски книги) Еремија 22 Bible Online

Еремија 22 - Свето Писмо: Стандардна Библија 2006 (со девтероканонски книги) bible

Еремија 22

¹Вака вели Господ: слези во домот на царот Јудин, и искажи го таму ова слово,

²па кажи: чуј го словото Господово, царе јудејски, ти, кој седиш на Давидовиот престол, ти и твоите слуги и луѓето твои, кои влегуваат низ овие порти.

³Вака вели Господ: извршувајте суд и правда и спасувајте го угнетуваниот од рацете на угнетувачот и не притеснувајте го придојдениот, како ни сиракот ни вдовицата, и не проливајте невина крв на ова место.

⁴Зашто, ако го исполнувате ова слово, низ портите на овој дом ќе влегуваат цареви, кои ќе седат наместо Давид на престолот негов, кои ќе се возат во коли и ќе јаваат на коњи, тие и слугите нивни и луѓето нивни.

⁵Ако, пак, не ги послушате овие зборови, жив сум Јас, вели Господ, дека овој дом ќе запусти.

⁶Зашто, така вели Господ за домот на јудејскиот цар: ти си за Мене Галаад и леванонски врв; но Јас ќе направам од тебе пустина, и градовите твои ќе станат ненаселени;

⁷и ќе повикам против тебе истребители, секој со своето оружје — и тие ќе ги исечат твоите најубави кедри и ќе ги фрлат во оган.

⁸И многу народи ќе минуваат низ овој град и ќе се прашуваат еден со друг: „Зошто Господ така постапи со овој голем град?“

⁹И ќе си одговорат — „Зашто тие го оставија заветот на Господ, нивниот Бог, и се поклонија на други богови и ним им служеа.“

¹⁰Не плачете за умрениот [1] и не жалете за него; туку горко плачете за оној, што оди во ропство, зашто тој веќе нема да се врати и нема да го види својот роден крај.

¹¹Зашто вака вели Господ за Селум [2], синот на јудејскиот цар Јошија, кој царуваше по татко си Јошија, и кој излезе од тоа место: тој веќе нема да се врати во него,

¹²Но ќе умре таму, каде што го одведоа како роб, и нема веќе да ја види оваа земја.

¹³Тешко му на оној, кој гради своја куќа со неправда, и свои соби — со беззаконие, кој го присилува ближниот свој да му работи без награда и не му дава плата,

¹⁴кој вели — ќе си направам голема куќа и широки соби, и кој отвора прозорци, ги обложува со кедар и ги бојадисува со црвена боја.

¹⁵Мислиш ли дека си цар, затоа што си се оградил со кедар? Татко ти јадеше и пиеше, но вршеше суд и правда, па затоа му беше добро.

¹⁶Тој го бранеше правото на бедниот и на сиромавиот, и затоа му беше добро. Зар не значи тоа дека некој Ме познава? — вели Господ.

¹⁷Но твоите очи и твоето срце се свртени само кон корист за себеси и кон пролевање невина крв, за да угнетуваш и присилуваш.

¹⁸Затоа, вака вели Господ за Јоаким, синот на јудејскиот цар Јошија: нема да го оплакуваат — „О брате!“ и „О сестро!“, нема да го оплакуваат: „О господаре!“ и „О негово величие!“

¹⁹Како магаре тој ќе биде погребан; ќе го изнесат и ќе го фрлат далеку од ерусалимските порти.

²⁰Качи се на Ливан и извикај, подигни го гласот свој на Башан и викни од Аварим, зашто погубени се сите твои пријатели.

²¹Јас ти зборував, кога ти беше добро, но ти рече: нема да послушам. Такво беше твоето поведение уште од младоста, ти не го слушаше гласот Мој.

²²Сите твои пастири ветар ќе ги одвее, а пријателите твои во ропство ќе отидат и тогаш ти ќе бидеш посрамен и понижен за сите твои злодела.

²³Ти, кој живееше на Ливан и си свил гнездо во кедрите, колку ли ќе офкаш, кога ќе те постигнат болки, како кај породилка!

²⁴Се колнам во Својот живот, вели Господ: да ми беше јудејскиот цар Конија, синот на Јоаким, прстен на десната рака Моја, и оттаму ќе те откинам,

²⁵и ќе те предадам во рацете на оние, кои ја бараат душата твоја, и во рацете на оние, од кои се плашиш, во рацете на вавилонскиот цар Навуходоносор и во рацете на Халдејците.

²⁶Па ќе те исфрлам тебе и твојата мајка, која те родила, во туѓа земја, каде што не сте се родиле, и таму ќе умрете.

²⁷А во земјата, каде што душата нивна ќе копнее да се врати, таму нема да се вратат.

²⁸„Зар тој човек, Конија, е презрено суштество, отфрлен и несакан сад, та тој и племето негово беа фрлени во земја што не ја познавале?“

²⁹О, земјо, земјо, земјо, чуј го словото Господово!

³⁰Така вели Господ: запишете го овој човек како лишен од деца, како човек со злочести дни, зашто никој од племето негово веќе нема да седи на престолот Давидов и нема да владее во Јудеја.