Read Свето Писмо: Стандардна Библија 2006 (со девтероканонски книги) Еремија 33 Bible Online

Еремија 33 - Свето Писмо: Стандардна Библија 2006 (со девтероканонски книги) bible

Еремија 33

¹И вторпат дојде слово Господово до Еремија, кога тој беше затворен во стражарницата —

²вака вели Господ, Кој ја создаде земјата, Господ, Кој ја уреди и зацврсти, — Кому името Му е Јахве:

³повикај кон Мене, и Јас ќе ти одговорам, ќе ти покажам нешто големо и недостапно, нешто, што не го знаеш.

⁴Зашто, така вели Господ, Бог Израилев, за куќите на овој град и за куќите на јудејските цареви, што ќе се урнат за насипи и за борби.

⁵Оние, што дојдоа да се борат против Халдејците, за да ги исполнат домовите со трупови на луѓе, кои Јас во Својот гнев и во јароста Своја ќе ги погубам и поради чие беззаконие Јас го сокрив лицето од тој град.

⁶Еве, Јас ќе ги излекувам, ќе ги исцелам и ќе им откријам изобилие и вистински мир,

⁷ќе ги вратам заробените на Јуда и заробените на Израил и ќе ги зацврстам како порано,

⁸ќе ги исчистам од секое нивно беззаконие, со кое згрешија пред Мене, и ќе им ги простам сите нивни гревови, со кои се огрешија пред Мене и отстапија од Мене.

⁹И Ерусалим ќе биде за Мене радосно име, похвала и чест, пред сите земни народи, што ќе чујат за сите добра, какви што ќе им давам и ќе се уплашат и ќе затреперат од сите добра и од секаков благослов, што ќе им го дадам.

¹⁰Така вели Господ: на ова место за кое вие велите — „Тоа е пусто, без луѓе и без добиток“, во јудејските градови и во ерусалимските улици, кои се пусти, без луѓе, без жители, без добиток,

¹¹пак ќе се слуша глас од радост и глас од веселба, глас на младоженец и глас на невеста, глас на оние што велат: „Славете Го Господ Саваот, зашто е благ Господ, зашто милоста Негова е вечна“, и глас на оние што принесуваат благодарствена жртва во домот Господов; бидејќи Јас ќе ги вратам заробените од оваа земја во нивната поранешна состојба, вели Господ.

¹²Така вели Господ Саваот: во ова место, кое е пусто — без луѓе, без добиток, и во сите негови градови пак ќе има живеалишта на пастири, што ќе ги доведуваат стадата свои на одмор.

¹³Во планинските градови, во градовите по полето и во јужните градови, во земјата на Венијамин, во ерусалимските предградија и во градовите Јудини пак ќе врват стада под раката на оној што ќе ги пребројува, вели Господ.

¹⁴Еве настапуваат дни, вели Господ, кога ќе го исполнам ова добро слово, што го изреков за домот Израилев и за домот на Јуда.

¹⁵Во тие дни и во тоа време ќе благословам на Давид да му израсте фиданка на правдата, и Тој ќе изврши суд и правда на земјата.

¹⁶Во тие дни Јуда ќе биде спасен, и Ерусалим ќе живее безопасно и ќе Му стават име: „Господ е наша правда!“

¹⁷Зашто, така вели Господ: нема да снема маж при Давид, што не ќе седи на престолот во домот Израилев,

¹⁸и кај левитските принесувачи на жртви нема да снема пред лицето Мое човек, кој преку сите дни нема да вознесува сепаленица, да изгорува приноси и да принесува жртви.

¹⁹И дојде слово Господово до Еремија —

²⁰вака вели Господ: ако можете да го разрушите заветот Мој со денот и заветот Мој со ноќта, така што денот и ноќта да не се сменуваат во определеното време,

²¹тогаш ќе можете да го разрушите и заветот Мој со Мојот слуга Давид, така што да нема кај него син, што ќе царува на неговиот престол, а исто така и со левитите — свештеници, служители Мои.

²²Како што е небесната војска безбројна, и песокот морски неизброив, така ќе се размножи племето на Мојот слуга Давид и на левитите кои Ми служат.

²³И дојде слово Господово до Еремија:

²⁴зар не гледаш дека овој народ вели — „Двете племиња, кои Господ ги избра, Тој ги отфрли“, и со тоа тие го презираат Мојот народ како веќе да не е народ Мој пред очите нивни?

²⁵Така вели Господ: да не бев го утврдил заветот Мој со денот и ноќта и наредбите на небото и на земјата,

²⁶тогаш и племето на Јаков и на Мојот слуга Давид, ќе го отфрлев, за да не земаат веќе од неговото племе владетели, за племето на Авраам, и Исак, и Јаков, бидејќи ќе ги вратам нивните заробени и ќе ги помилувам.