Read Свето Писмо: Стандардна Библија 2006 (со девтероканонски книги) Плачот 3 Bible Online

Плачот 3 - Свето Писмо: Стандардна Библија 2006 (со девтероканонски книги) bible

Плачот 3

¹Јас сум човек, кој видов мака од палката на Неговиот гнев;

²Тој ме поведе и воведе во темнина, а не во светлина.

³Тој се сврте само против мене и цел ден ме биеше со раката Своја;

⁴го исцеди телото мое и кожата моја, ги здроби коските мои;

⁵ме загради и ме опколи со горчила и маки;

⁶ме постави во темно место, како одамна умрените;

⁷ме огради со ѕид, да не можам да излезам, ми направи тешки вериги;

⁸и, кога викав и пискав, ја одбиваше молитвата моја;

⁹со камења ги прегради патиштата мои, ги попречи патеките мои.

¹⁰Тој стана за мене како мечка во заседа, како лав на скришно место;

¹¹ме истера по беспаќа и ме раскина, ме уништи;

¹²го затегна лакот Свој и ме постави како цел за стрела;

¹³ги прострела бубрезите мои со стрели од торбата Своја.

¹⁴Станав потсмев за сиот народ мој, негова секојдневна шега.

¹⁵Ме презасити со горчила, со пелин ме напои;

¹⁶со камен ми ги скрши забите мои, со пепел ме покри.

¹⁷Избега мирот од душата моја; заборавив за добри работи

¹⁸и реков: дотраја животот мој и надежта моја од Господ.

¹⁹Помисли на моето страдање и на мојата мака, за пелинот и за жолчката.

²⁰Душата моја постојано се сеќава на тоа и премалува во мене.

²¹Еве што му одговорив на срцето мое и поради тоа имам надеж:

²²по милоста на Господ не загинавме наполно, бидејќи милосрдието Негово не е пресекнато;

²³тоа се обновува секое утро; верноста Негова е голема!

²⁴Господ е дел мој, ми вели душата, па така на Него ќе се надевам.

²⁵Добар е Господ кон оние, кои се надеваат на Него, кон душата, која Го бара.

²⁶Добро му е на оној, кој трпеливо го очекува спасението од Господ.

²⁷Добро е за човекот да го носи јаремот свој во младоста своја.

²⁸Сам ќе седи и ќе молчи, бидејќи Господ го ставил бремето врз него.

²⁹Нека ја допре устата своја до земјата, можеби уште има надеж.

³⁰Го подава образот свој на оној, кој бие, да трпи навреди до презаситување,

³¹бидејќи Господ не отфрла за навек.

³²Пратил ли неволја, Тој и ќе се смилува според Својата голема милост.

³³Зашто Тој не по волјата на Своето срце ги казнува и ги ожалостува синовите човечки.

³⁴Но, кога ги газат со нозете сите затвореници на земјата,

³⁵кога неправедно осудуваат човек пред лицето на Севишниот,

³⁶кога му се нанесува неправда на човекот во неговиот спор: зар Господ не гледа?

³⁷Кој вели — „Бива и она што Господ не заповедал да биде?“

³⁸Зар не доаѓаат и злото и доброто од устата на Господ

³⁹На што се жалат живите луѓе? Секој за гревовите свои?

⁴⁰Да ги испитаме и да ги истражиме патиштата свои и да се вратиме кај Господ.

⁴¹Нека го подигнеме срцето свое и рацете свои кон Бога, Кој е на небесата.

⁴²Ние згрешивме и се противевме, Ти не нѐ поштеди.

⁴³Ти се облече со гнев и нѐ прогони, нѐ умртвуваше, и не нѐ жалеше;

⁴⁴Ти се сокри во облак, за да не продре молитвата наша;

⁴⁵смет и гнасотија нѐ направи меѓу народите.

⁴⁶Широко ги отворија устите против нас сите наши непријатели.

⁴⁷Ужас и јама, пустош и разорение — тоа е делот наш.

⁴⁸Потоци солзи лее окото мое за погибелта на ќерката од мојот народ.

⁴⁹Окото ми се прелива и не престанува, бидејќи нема одмор

⁵⁰сѐ додека Господ не погледне милостиво и види од небесата.

⁵¹Окото мое е причина да страда душата моја заради сите ќерки на мојот град.

⁵²Постојано се силат непријателите мои да ме уловат како птичка, без никаква причина.

⁵³Го фрлија во јама животот мој и ме засипаа со камења.

⁵⁴Водата се подигна над главата моја; па си реков — „Загинав.“

⁵⁵Го повикав името Твое, Господи, од длабоката јама.

⁵⁶Ти го чу гласот мој; не затнувај го увото Свое за мојата воздишка и за мојот плач!

⁵⁷Ти се приближуваше, кога ќе повикав кон Тебе, и велеше — не плаши се!

⁵⁸Ти го заштитуваше, Господи, делото на мојата душа; го избавуваше мојот живот.

⁵⁹Ти гледаш како ме угнетуваат, Господи; пресуди го делото мое.

⁶⁰Ти ја гледаш сета одмазда нивна, сите намери нивни против мене.

⁶¹Ти ги слушаш, Господи, навредите нивни, сите намери нивни против мене,

⁶²зборовите на оние, што стануваат против мене, и лукавствата нивни против мене секој ден.

⁶³Погледај, седнат ли, станат ли, јас сум подбивна песна за нив.

⁶⁴Казни ги, Господи, според делата на рацете нивни;

⁶⁵прати им закоравеност на срцето нивно и проклетсвото Твое врз нив;

⁶⁶гони ги, Господи, со гнев и истреби ги од поднебјето!