Read Свето Писмо: Стандардна Библија 2006 (со девтероканонски книги) Варух 1 Bible Online

Варух 1 - Свето Писмо: Стандардна Библија 2006 (со девтероканонски книги) bible

Варух 1

¹Ова се зборови од книгата, што ја напиша во Вавилон Варух, синот на Нерија, син на Махсеја, син на Седекија, син на Асадија, син на Хелкија,

²во петтата година, во седмиот ден од месецот, во времето кога Халдејците го презедоа Ерусалим и го изгореа со оган.

³Варух ги прочита гласно зборовите од оваа книга пред Јехојахин, синот на Јоаким, јудејски цар, пред сиот народ, што беше дошол да ја слуша книгата,

⁴гласно пред високите царски чиновници и царските синови, пред старешините и пред сиот народ, од мал до голем, пред сите што живееја во Вавилон, покрај реката Суд,

⁵и тие плачеа, постеа и се молеа пред Господ.

⁶Собраа и пари, секој според своите можности,

⁷и ги испратија во Ерусалим до првосвештеникот Јоаким, син на Хелкија, син Саломов, до свештениците и до сиот народ, кој се наоѓаше со него во Ерусалим,

⁸Тогаш Варух ги зеде садовите однесени од домот на Господ, за да ги врати во Јудејската земја, во десеттиот ден од месецот сиван, сребрените садови, што ги беше направил јудејскиот цар Седекија, син Јошиин,

⁹кога Навуходоносор, вавилонски цар, ги беше иселил од Ерусалим Јехо-ниј и кнезовите, затворениците, моќниците и народот и ги доведе во Вавилон.

¹⁰И рекоа тие: „Еве, ви испраќаме пари, со нив купете сепаленици, жртви за грев и темјан, принесете ги на дар и ставете ги на жртвеникот на Господ, нашиот Бог,

¹¹молете се на Господ за Навуходоносор, вавилонскиот цар, и за животот на неговиот син Валтазар, да им бидат деновите на нивниот живот на земјата како денови на небото.

¹²Господ Бог нека ни даде сила и нека ги просвети нашите очи, за да живееме под закрилата на вавилонскиот цар Навуходоносор и под закрилата на неговиот син Валтазар, за да им служиме многу дни и да најдеме милост пред нив.

¹³Молете Му се на Господ, нашиот Бог, и за нас, зашто згрешивме пред Господ, нашиот Бог, и не се одврати гневот на Господ од нас до денес.

¹⁴Прочитајте ја оваа книга, што ви ја испраќаме, за да се објави во домот на Господ, на ден празничен и во дни бележити.“

¹⁵Тогаш речете: „Правдата е во Господ, нашиот Бог, а кај нас е — срамот на лицата како денес на сите Јудејци и на оние што живеат во Ерусалим,

¹⁶на царевите и на кнезовите, на нашите свештеници, нашите пророци и нашите предци,

¹⁷зашто згрешивме пред Господ,

¹⁸не Му се покорувавме и не го слушавме гласот на Господ, нашиот Бог, за да живееме според заповедите на Господ, нашиот Бог, што ни ги даде.

¹⁹Од денот, кога Господ ги изведе нашите предци од египетската земја, па до денес, ние бевме непослушни пред Господ, нашиот Бог, и не ни беше грижа што гласот Негов не го слушавме.

²⁰Затоа нѐ постигнаа неволји и клетви, што ги одреди Господ пред својот слуга Мојсеј во оној ден, кога Тој ги изведе нашите предци од египетската земја, за да ни ја даде земјата, во која тече мед и млеко.

²¹Не го послушавме гласот на Господ, нашиот Бог — сите зборови искажани преку пророците, кои Тој ни ги прати нам,

²²туку секој од нас одеше според мислите на своето лошо срце, служејќи им на други богови и вршејќи лоши дела пред очите на Господ, нашиот Бог.“