Read Свето Писмо: Стандардна Библија 2006 (со девтероканонски книги) Варух 3 Bible Online

Варух 3 - Свето Писмо: Стандардна Библија 2006 (со девтероканонски книги) bible

Варух 3

¹Господи, Седржителе, Боже Израилев, кон Тебе вика притеснетата душа и натажениот дух;

²Чуј ме, Господи, и смилувај се, зашто Ти си Бог милосрден; смилувај се, зашто згрешивме пред Тебе;

³Ти вечно живееш, а ние вечно загинуваме.

⁴Господи, Седржителе, Боже Израилев, послушај ја молитвата на умрените од Израил и на нивните синови, кои згрешија пред Тебе, кои не го послушаа гласот на Господ, својот Бог, па затоа нѐ снајдоа неволји.

⁵Не спомнувај си за беззаконијата на нашите предци, туку спомни си во тој час за Својата рака и за Своето име,

⁶зашто Ти си Господ, нашиот Бог и ние ќе Те прославуваме, Господи!

⁷Затоа си го вселил стравот Твој во нашето срце, за да го повикуваме Твоето име; а ние ќе Те прославуваме во нашето прогонство, бидејќи од нашето срце ја отфрливме секоја неправда на нашите предци, кои згрешија пред Тебе.

⁸Еве, ние сме сѐуште во ова заточеништво, каде што си нѐ распрснал за хула, за проклетство, и за казна поради сите неправди на нашите предци, кои отстапија од Господ, нашиот Бог.

⁹Чуј ги, Израиле, заповедите на животот, послушајте, за да ја научите мудроста.

¹⁰Зошто Израиле, во земјата на непријателите? Зошто ти остаре во туѓа земја

¹¹и се оскверни заедно со мртвите? Се вбројуваш кон оние, што се во пеколот,

¹²си го оставил изворот на мудроста.

¹³Ако одеше по Божјиот пат, ќе живееше мирно довека.

¹⁴Научи каде се наоѓа мудроста, каде е силата, и каде е остроумноста, па заедно со тоа да разбереш во што е долговечноста и животот и каде се наоѓа светлината на очите и мирот.

¹⁵Кој го открил живеалиштето на мудроста и кој влегол во нејзините ризници?

¹⁶Каде се владетелите на народите и оние што господарат над земните ѕверови

¹⁷и оние што си играа со птиците небески и оние што трупаа сребро и злато — она на што се надеваат и луѓе, чии имоти крај немаат?

¹⁸Каде се оние, кои со голем труд сребро коваа и чии сребрени ракотворби број немаат?

¹⁹Тие исчезнаа, во пеколот слегнаа; на нивно место други се издигнаа.

²⁰Помладите видоа светлина и живееја на земјата, но патот на мудроста не го познаа;

²¹не ги разбраа нејзините патеки и нивните синови не ја најдоа; далеку останаа од нејзиниот пат.

²²Не се слушаше за неа во Ханан, ниту ја видоа во Теман.

²³Ни синовите на Агара кои бараа земно знаење. Ни трговците од Меран и Теман, ниту пак, раскажувачите на басни и истражувачите на знаењето, патот на мудроста не го познаа и патеките нејзини не ги забележаа.

²⁴О, Израиле, колку е голем Божјиот дом, колку е опширно местото на Неговото владеење!

²⁵Тој е голем и крај нема, висок е и неизмерлив;

²⁶таму во почетокот имаше прочуени силни јунаци, многу големи и вешти во војување,

²⁷но нив Господ не ги избра, и не им го откри патот на мудроста;

²⁸тие изгинаа затоа што немаа разумност, изгинаа од своето безумие.

²⁹Кој се качил на небото, па да ја дофати на облаците и да ја симне оттаму?

³⁰Кој премина мориња и ја најде, и кој ќе ја донесе неа — подобрата од чисто злато?

³¹Патот до неа никој не го знае и никој не помислува на нејзините патеки.

³²Но Оној, Кој знае сѐ, Тој ја откри со разумот Свој, Оној Кој ја создаде земјата за вечни времиња и ја исполни со животни,

³³Оној, Кој ја испрати светлината — и таа доаѓа, ја повикува — и таа со трепет Го слуша,

³⁴и ѕвездите на своите места засветеа и се зарадуваа.

³⁵Тој ги повикува, а тие Му одговараат: „Еве нѐ!“ И радосно болснаа пред својот Создател.

³⁶Тој е нашиот Бог; никој со Него не може да се спореди.

³⁷Тој ги најде сите патишта на мудроста и му ја подари на Својот слуга Јаков, на Својот омилен Израил.

³⁸Потоа Тој се јави на земјата и живееше меѓу луѓето.