Read Свето Писмо: Стандардна Библија 2006 (со девтероканонски книги) Варух 4 Bible Online

Варух 4 - Свето Писмо: Стандардна Библија 2006 (со девтероканонски книги) bible

Варух 4

¹Еве ја книгата на Божјите заповеди и на Законот, кој трае вечно. Тие што ја пазат — вечно ќе живеат, а ќе умрат оние што ќе ја остават.

²Врати се, Јакове, и земи ја, оди по болскотот на нејзината светлина!

³Твојата слава не давај му ја на друг, ниту она што е корисно за тебе — на туѓ народ.

⁴Блажени сме Израиле, што го знаеме угодното пред Бога.

⁵Охрабри се, народе мој, ти — спомену Израилев!

⁶Вие сте продадени на незнабошците — не да загинете, туку затоа што Господа Го разгневивте; предадени сте на непријателите

⁷затоа што Го разгневивте Создателот свој, принесувајќи им жртви на зли духови, а не на Бога.

⁸Вие Го заборавивте вечниот Бог, Кој ве храни, а го ожалостивте и Ерусалим, кој ве отхрани;

⁹зашто тој го виде испратениот врз вас од Господ гнев, и рече: „Слушајте, соседи Сионски, Бог ми испрати голема тага.

¹⁰Јас го видов заробувањето на моите синови и ќерки, коешто Вечниот го испрати на нив.

¹¹Јас ги хранев со радост, а ги отпуштив со болка и жалост.

¹²Никој нека не ми се радува на мене вдовецот, кој сум оставен од мнозина; јас опустев поради гревовите на моите деца, зашто тие се отклонија од Божјиот закон;

¹³не ги познаа Божјите наредби, не одеа по патот на Божјите заповеди и не чекореа по патеките на поуката во Неговата правда.

¹⁴Дојдете, сожители сионски, спомнете си за ропството на Моите синови и ќерки, коешто Вечниот го испрати врз нив.

¹⁵Тој испрати против нив народ далечен, бесрамен и туѓ — затоа што не се засрамија од старец и не се сожалија над дете,

¹⁶на вдовицата ѝ ги одведоа нејзините мили синови, и осамената ја лишија од нејзините ќерки.

¹⁷А, пак, јас со што можам да ви помогнам?

¹⁸Оној Кој ги испрати врз вас тие зла, Тој ќе ве избави од рацете на вашите непријатели.

¹⁹Дојдете, деца, дојдете, зашто запустев.

²⁰Ја соблеков облеката на мирот, а се облеков во облеката на мојата молитва: во сите мои денови Господа ќе Го повикувам.

²¹Охрабрете се, чеда, повикајте кон Господ, Тој ќе ве избави од насилство и од непријателски раце.

²²Зашто од почетокот се надевав на Вечниот за вашето спасение; врз Мене дојде од Светиот радост за милоста, која скоро ќе ви дојде од Вечниот, од Спасителот наш.

²³Јас ве испраќав со тага и со жалост, но Бог ќе ве поврати кај мене со радост и веселба довека.

²⁴Зашто, како што соседите на Сион ве видоа како ве водат во ропство, така набргу ќе го видат вашето од Бога спасение, што ќе ви дојде со голема слава и велелепие од Вечниот.

²⁵Деца, потрпете го Божјиот гнев што ве постигна: те прогонува твојот непријател, но набргу ќе ја видиш неговата пропаст и ќе стапнеш на вратот негов.

²⁶Моите чеда, со нежност одгледани, тргнаа по нерамни патишта; фатени се како стадо — разграбени од непријателот.

²⁷Охрабрете се, чеда, кон Бога викајте; за вас ќе си спомне Оној, Кој ви го испрати ова.

²⁸Каква што беше вашата решеност за да се оддалечите од Бога, зголемете ја сега десетпати — за да се свртите и да Го побарате,

²⁹зашто Оној, Кој ви ги испрати овие маки, Тој ќе ви испрати вечна радост со спасение.

³⁰Охрабри се, Ерусалиме, Оној Кој ти го даде името — Тој ќе те утеши!

³¹Тешко им на оние што те ожалостија и се радуваа на твоето паѓање!

³²Тешко им на градовите, на кои им робуваа твоите деца, тешко ѝ на земјата, што ги прими твоите синови!

³³Како што му се радуваше на твоето паѓање, и се веселеше на твојата пропаст, така ќе се ожалости за своето опустошување.

³⁴Јас ќе направам да не се радува на многу народ; горделивоста нејзина во тагување ќе се претвори,

³⁵зашто врз неа ќе дојде оган до Вечниот за многу дни, и долго, долго време во неа зли духови ќе живеат.

³⁶Ерусалиме, погледни кон исток, види ја радоста, што ти доаѓа од Бога.

³⁷Ете доаѓаат твоите синови, што ги отпушти, доаѓаат собрани од исток до запад, по заповед од Светиот, зарадувани со Божја слава.