Read Свето Писмо: Стандардна Библија 2006 (со девтероканонски книги) Езекил 11 Bible Online

Езекил 11 - Свето Писмо: Стандардна Библија 2006 (со девтероканонски книги) bible

Езекил 11

¹Ме дигна духот и ме доведе пред источната врата на домот Господов, која гледаше кон исток. А таму — пред влезот на вратата дваесет и пет човека, и меѓу нив го видов Јаазанија, синот Азуров, и Пелатјаху, синот Бенајахуов, кнезовите народни.

²И Тој ми рече: „Сине човечки, еве ги луѓето што на ум имаат да вршат беззаконија и кои даваат лош совет во овој град,

³велејќи: ‚Уште е далеку; да си градиме домови; овој град е котел, а ние — месо.‘

⁴Затоа изречи против нив пророштво, пророкувај, сине човечки!“

⁵И слезе врз мене Духот Господов и ми рече: „Кажи — така вели Господ — она што го зборувате вие, доме Израилев, и она што ви иде на ум, тоа Јас го знам.

⁶Многумина убивте во тој град, и улиците негови се исполнија со трупови.“

⁷Затоа, вака вели Господ Бог: „Убиените ваши, што ги оставивте среде него, се месо, а тој — котел; но вас Јас ќе ве изведам од него.

⁸Вие се плашите од меч, а Јас ќе испратам врз вас меч, вели Господ Бог.

⁹И ќе ве изведам од него, ќе ве предадам во рацете на туѓинци, и ќе извршам суд над вас.

¹⁰Од меч ќе паднете; во пределите на Израил ќе ви судам, ќе познаете дека Јас сум Господ.

¹¹Тој нема да биде за вас котел, и вие нема да бидете во него месо; во пределите израилски ќе ви судам.

¹²И ќе познаете дека Јас сум Господ; затоа што не ги извршувавте Моите наредби, туку одевте по законите на народите околу вас.“

¹³И ете, кога пророкував, Пелатјаху, синот на Ванеја, умре. И паднав ничкум, викав со силен глас и реков: „О, Господи Боже, зар сакаш докрај да го истребиш остатокот на Израил?“

¹⁴И дојде слово Господово до мене:

¹⁵„Сине човечки, на браќата твои, на твоите браќа, на твоите еднокрвни и на сиот израилски дом, оние што живеат во Ерусалим, им велат: ‚живејте далеку од Господ, оваа земја дадена ни е нам да ја владееме.‘“

¹⁶Затоа кажи им: вака вели Господ Бог — „Макар и да ги оддалечив меѓу народите и макар што ги распрснав по земјата, Јас за нив пак ќе бидам како светилиште во оние земји, каде што отидоа.“

¹⁷Потоа кажи им, вака вели Господ Бог: „Јас ќе ве соберам откај народите и ќе ве вратам од земјите, во кои сте се растуриле; и ќе ви ја дадам земјата израилска.

¹⁸И ќе дојдат таму, ќе ги исфрлат од неа сите гадотии и сите нечистотии.

¹⁹И ќе им дадам едно срце, ќе вложам во нив нов дух, ќе го земам од телото нивно каменото срце и ќе им дадам меснато срце,

²⁰за да одат по Моите заповеди, да ги пазат Моите наредби и да ги извршуваат; и ќе бидат Мој народ, и Јас ќе бидам пак нивни Бог.

²¹А чие срце, се поведе по гадотиите нивни и нечистотиите нивни, нивните постапки ќе ги свртам врз нивните глави“, вели Господ Бог.

²²Тогаш херувимите ги подигнаа крилјата свои, и тркалата беа до нив; и славата на Израилевиот Бог беше над нив одозгора.

²³И се крена славата Господова среде градот и застана над планината, што се наоѓа источно од градот.

²⁴И духот ме подигна и ме пренесе во видение, преку Духот Божји, во Халдеја, кај изгнаниците. И видението, што го имав, избега од мене.

²⁵И јас им ги пренесов на изгнаниците сите зборови Господови, што ми ги откри Тој.