Read Свето Писмо: Стандардна Библија 2006 (со девтероканонски книги) Езекил 27 Bible Online

Езекил 27 - Свето Писмо: Стандардна Библија 2006 (со девтероканонски книги) bible

Езекил 27

¹И дојде слово Господово до мене:

²„А ти, сине човечки, викни, па заплачи по Тир.

³И кажи му на Тир, кој се населил при влезот на морето, и тргува со народите од многу острови — вака вели Господ Бог: Тире, ти велиш: ‚јас сум совршена убавина.‘“

⁴Твоите предели се во срцето на морињата; твоите градители совршено ја изградиле твојата складност;

⁵од сенирски кипариси ги направија сите твои подови; зедоа од Ливан кедри, за да ти направат јарболи;

⁶од башански дабови правеа весла; столовите ги правеа до буково дрво, ишарано со слонова коска од китимските острови,

⁷од шарени египетски ткаенини ти беа бродските платна што ти служеа како знаме; сини и пурпурни ткаенини се земаа од елишките острови за покривала.

⁸Жителите сидонски и арвадски ти беа веслачи; Тире, ти имаше вешти луѓе; тие ти беа кормилари.

⁹Старешините од Гевла и неговите вешти луѓе ти служеа за разни поправки; ти имаше секакви морски бродови и кораби со платна, кои ти служеа за тргување.

¹⁰Војници од Персија, од Луд и од Пут се наоѓаа во твојата војска; закачуваа по тебе штитови и шлемови; тие ти придаваа величие.

¹¹Синовите Арвадски со твојата сопствена војска стоеја наоколу по твоите ѕидови; и Гамадимците стоеја на кулите твои; тие беа ги закачиле своите штитови по твоите ѕидови наоколу; и тие ти ја претставуваа твојата убавина.

¹²Тарсис тргуваше со тебе, располагајќи со различно богатство, за стоките твои плаќаше сребро, железо, олово и калај.

¹³Јаван, Тувал и Мешех тргуваа со тебе, разменувајќи ги стоките за луѓе и бакарни садови.

¹⁴Од Бет-Тогарма ти донесуваа за стоките твои коњи, коњаници и маски.

¹⁵Синовите на Дедан тргуваа со тебе; многу острови вршеа со тебе размена, ти плаќаа со слонова коска и абанос.

¹⁶Поради големото твое трговско богатство, тргуваа со тебе и Арамејците; за стоките твои ти плаќаа со смарагд, пурпурно шарени ткаенини и висон, со корали и рубини.

¹⁷Јудеја и земјата израилска тргуваа исто така со тебе; за твојата стока ти плаќаа со пченица, мириси и мед, масло и балсам.

¹⁸Дамаск поради богатството во стоки, поради изобилието на секакви работи, ти донесуваше хелбонско вино и волна од Цахар.

¹⁹Дан и Јаван од Узал ти плаќаа за твоите стоки со изработки од железо, касија и цимет, за размена.

²⁰Со тебе тргуваше и Дедан со скапоцени волнени покривки за седла.

²¹Арабија и сите кедарски кнезови вршеа размена со тебе: на јагниња, овни и кози.

²²Трговците од Сева и Рама тргуваа со тебе со секакви најблагопријатни мириси и со секакви скапоцени камења, и злато ти плаќаа за твоите стоки.

²³Харан, Кане и Еден, трговците од Сева, Асирија и Килмад исто така тргуваа со тебе.

²⁴Тие ти продаваа скапоцени облеки од свилени и шарени материи што ги носеа на пазарите твои во скапи сандаци, направени од кедар и добро врзани.

²⁵Бродовите од Тарсис беа твои каравани во трговијата, и ти стана богат и многу славен меѓу морињата.

²⁶Весларите твои те одведоа во големите води; источниот ветар те разби среде морињата.

²⁷Твоето богатство и твоите стоки, сите твои ризници, твоите бродари и твоите кормилари, кои ги поправаа твоите кораби, и ја пренесуваа твојата трговија, сите твои војници, какви што ги имаше и сето множество народ твој, при твоето паѓање ќе потонат на дното од морето.

²⁸Од пискотот на твоите кормилари ќе затреперат и околните места.

²⁹И ете од корабите ќе излезат сите веслари, бродари, сите кормилари морски и ќе излезат на земјата.

³⁰Со висок глас ќе заплачат за тебе и тешко ќе заофкаат, ставајќи си пепел на главите свои и валкајќи се во прав.

³¹Ќе ја истрижат за тебе косата своја до черепот, а ќе опашаат вреќишта и со горчлив плач ќе заплачат за тебе од душевна мака.

³²И во тагата своја ќе запеат за тебе жална песна, и така тие ќе заплачат за тебе: „Кој е како Тир, така разрушен среде морињата!“

³³Кога доаѓаа од морињата твоите стоки, ти задоволуваше многу народи; со големото богатство и со трговијата ти ги богатеше царевите на земјата.

³⁴А кога беше ти разбиен од морињата во водената бездна, твоите стоки и сиот твој народ потона.

³⁵Сите жители на островите се запрепастија за тебе и царевите нивни почнаа да треперат, лицата им се изменија.

³⁶Трговците на другите народи си потсвиркуваа за тебе; ти стана како страшило и исчезна засекогаш.