Read Свето Писмо: Стандардна Библија 2006 (со девтероканонски книги) Езекил 6 Bible Online

Езекил 6 - Свето Писмо: Стандардна Библија 2006 (со девтероканонски книги) bible

Езекил 6

¹И дојде слово Господово до мене:

²„Сине човечки, сврти го лицето свое кон горите Израилеви и пророкувај против нив,

³и кажи — планини израилски, чујте го словото на Господ Бог. Вака им вели Господ Бог на горите и на ридовите, на долините и на долиштата: ‚Еве, Јас ќе испратам меч врз вас, и ќе ги кутнам вашите идолски светилишта;

⁴и жртвениците ќе ви бидат опустошени, и столбовите во чест на сонцето ќе бидат искршени, и вашите убиени ќе ги фрлам пред вашите идоли;

⁵ќе ги поставам труповите на синовите Израилеви пред нивните идоли, и ќе ги расфрлам коските ваши околу вашите жртвеници.

⁶Насекаде, каде што живеете, градовите ќе ви бидат опустошени и идолските светилишта разурнати, за да бидат опустошени и уништени вашите жртвеници, за да бидат разбиени и уништени вашите идоли и искршени вашите сончеви столбови, и да ги снема делата од вашите раце.

⁷Меѓу вас ќе има убиени, и ќе разберете дека Јас сум Господ.

⁸Но Јас ќе го запазам остатокот, така што меѓу народите ќе останат од вас што избегнале меч, кога ќе бидете расеани по земјите.

⁹И преживеаните ваши ќе се сетат за Мене меѓу народите каде што ќе бидат одведени во ропство, кога ќе им го скршам блудното срце, кое се одметна од Мене, и очите нивни, што блудствуваа меѓу идолите; тогаш тие ќе почувствуваат одвратност спрема себеси за злото што го вршеле во сите градови свои;

¹⁰и ќе разберат дека Јас сум Господ; и дека не залудо зборував, дека врз нив ќе испратам таква беда.‘“

¹¹Вака вели Господ Бог: „Плесни со рацете свои, тропни со ногата своја — тешко за сите поради одвратните злодела на домот Израилев; ќе паднат тие од меч, глад и помор.

¹²Кој е далеку, ќе умре од помор, а кој е близу — ќе падне од меч; а оној што ќе остане и избегне, од глад ќе умре; така ќе заврши гневот Мој врз нив.

¹³Ќе разберат дека Јас сум Господ, кога поразените ќе лежат меѓу своите идоли околу жртвениците нивни, на секој висок рид, на секој планински врв, под секое зелено дрво и под секој разгранет даб, таму каде што им принесуваа благопријатни кадења на своите идоли.

¹⁴И ќе ја протегнам врз нив раката Своја и ќе ја направам земјата пустина и степа од пустината на југ до градот Дивла на север, насекаде, каде што живеат, и ќе познаат дека Јас сум Господ.“