Read Свето Писмо: Стандардна Библија 2006 (со девтероканонски книги) Езекил 7 Bible Online

Езекил 7 - Свето Писмо: Стандардна Библија 2006 (со девтероканонски книги) bible

Езекил 7

¹И дојде слово Господово до мене:

²„Ти, сине човечки, кажи — така вели Господ Бог — свршеток на земјата израилска; дојде свршетокот на сите четири краишта земни.

³Ете, дојде свршетокот за тебе; и ќе го пратам врз тебе гневот Свој, и ќе ти судам според патиштата твои, и ќе ги натоварам врз тебе сите гадотии.

⁴И окото Мое нема да те зажали и нема да се смилувам, но ќе ти платам според твоите патишта, гадотиите твои во тебе ќе останат и ќе разберете дека Јас сум Господ.

⁵Така вели Господ Бог: несреќа врз несреќа ќе те снајде!

⁶Свршетокот дојде, дојде свршетокот, се крена против тебе: ете дојде!

⁷Дојде напаста до тебе, жителу на овој крај, иде време, се приближува денот на смутот, а не на весели повици по планините.

⁸Ете, наскоро ќе ја излеам врз тебе јароста Своја и ќе го истурам гневот Свој врз тебе, ќе ти судам според твоите патишта и ќе ги натоварам врз тебе сите твои гадотии.

⁹И окото Мое нема да те пожали, и нема да се смилува. Според твоите патишта ќе ти платам, и твоите гадотии ќе останат во тебе; и ќе разберете дека Јас сум Господ, Кој казнува.

¹⁰Ете го денот, еве дојде, настапи напаста, процути стапот, гордоста пупи.

¹¹Силата станува против жезолот на беззаконието: ништо нема да остане од нив, — ни од богатството нивно, ниту од шумата нивна, ниту, пак, од раскошот нивни.

¹²Дојде времето, настапува денот: купувачу, не радувај се, продавачу не плачи, зашто гневот е врз нив сите.

¹³Зашто, кој продал, нема да се врати кај продаденото, макар да останал жив; бидејќи пророчкото видение за целото нивно множество нема да се измени, и никој со беззаконието свое нема да го зацврсти животот свој.

¹⁴Трубат со трубата и сѐ се готви, но никој не оди во војна; зашто Мојот гнев е врз сето нивно множество.

¹⁵Надвор од куќата — меч, а во куќата — помор и глад. Кој се наоѓа во полето, од меч ќе умре, а кој е во градот, него гладот и поморот ќе го проголта.

¹⁶А преживеаните од тоа ќе избегаат и ќе бидат во планините како гулаби од долина; сите тие ќе стенкаат, секој заради своето беззаконие.

¹⁷На сите рацете ќе им опаднат, и на сите колената ќе им затреперат.

¹⁸Тогаш ќе се опашат во вреќишта и трепет ќе ги опфати; и лицето на сите ќе ги покрие срам и на главите — нивни ќе има ќелавост.

¹⁹Среброто ќе си го исфрлаат по улици и златото нема да го почитуваат. Среброто нивно и златото нивно нема да биде во сила да ги спаси во денот на Господовата јарост. Тие нема да ги наситат со нив душите свои, и нема да ги наполнат утробите свои, бидејќи тоа беше причина за нивниот грев.

²⁰И со убавиот накит свој тие се гордееја и правеа уметнички творби за гадотиите свои со идоли; затоа ќе го направам нечисто за нив.

²¹И ќе го дадам како плен во рацете на туѓинци и на грешници земни, за да го разграбаат, и тие ќе го осквернат.

²²И ќе го одвратам од нив лицето Свое и ќе го осквернат Моето светилиште; и ќе влезат таму грабители и ќе го осквернат.

²³Приготвив вериги, зашто таа земја е полна со крвави злодејства, и градот е полн со насилие.

²⁴Јас ќе доведам најлоши народи и тие ќе ги завладеат домовите нивни. И ќе ставам крај на гордоста кај силните, и ќе бидат осквернети и светињите нивни.

²⁵Иде погибелта; ќе бараат мир и нема да го најдат.

²⁶Беда ќе следува по беда и една лоша вест по друга; и ќе бараат од пророкот видение и нема да има поуки кај свештениците и совет кај старците.

²⁷Царот ќе тажи, и кнезот ќе го обземе ужас, и рацете на народот во земјата ќе треперат. Ќе постапам со нив според нивните патишта, според нивниот суд ќе ги судам; и ќе разберат дека Јас сум Господ.“