Read Свето Писмо: Стандардна Библија 2006 (со девтероканонски книги) Осија 14 Bible Online

Осија 14 - Свето Писмо: Стандардна Библија 2006 (со девтероканонски книги) bible

Осија 14

¹Самарија ќе страда, зашто се крена против својот Бог; од меч ќе паднат тие, нивните деца на камен ќе бидат разбивани, а бремените жени ќе бидат распарувани.

²Врати се, Израиле, кај Господ твојот Бог; зашто ти пропаѓаш поради своето беззаконие.

³Подгответе се молитвено, и обратете се кон Господ и речете Му: „Прости ни ги сите беззаконија наши и прими го тоа што е добро, а ние ќе принесеме жртва од устата наша.“

⁴Ашур повеќе нема да нѐ спасува; и нема повеќе да јаваме на коњи и на своите уметнички творби да им велиме: „О, богови наши; зашто само Ти си милосрден кон сираци.“

⁵Ќе ги излекувам од одметнувањето нивно, благонаклоно ќе ги засакам, зашто гневот Мој се одврати од нив.

⁶Јас ќе бидам роса за Израил; тој ќе цвета како крин и ќе пушти корења како дрвјата на Ливан.

⁷Ќе се рашират гранките негови, и убавината негова ќе биде како убавина на маслина, и мирисот од него како мирис од Ливан.

⁸Ќе се вратат под Мојата сенка, и ќе имаат жито во изобилие — па ќе цветаат како лоза, ќе станат славни како виното леванонско.

⁹Зошто ти се идолите, Ефреме? Јас те слушам и се грижам за тебе; Јас сум како зелен кипарис: од Мене ти доаѓаат плодовите.

¹⁰Кој е мудар, нека го разбере ова; кој е разумен нека го познае тоа. Зашто патиштата Господови се прави, и праведниците одат по нив, а беззакониците се сопнуваат од нив.