Read Свето Писмо: Стандардна Библија 2006 (со девтероканонски книги) Амос 9 Bible Online

Амос 9 - Свето Писмо: Стандардна Библија 2006 (со девтероканонски книги) bible

Амос 9

¹Го видов Господа како стои на жртвеникот и вели: удри во горниот праг на вратата за да се растресат спојките и расцепи ги врз главите на сите нив, а другите од нив ќе ги убијам Јас со меч: никој од нив, кој бега, нема да избега, и никој од нив, кој сака да се спаси, нема да се спаси.

²И да се закопаат во Подземјето [2], и оттаму раката Моја ќе ги извлече; и да се качат на небото, и оттаму ќе ги симнам.

³Макар да се скријат и на врвот од Кармил, и таму ќе ги најдам и ќе ги фатам; па и да се сокријат и од очите Мои во морското дно, и таму ќе му заповедам на змејот морски да ги голтне.

⁴И во плен, ако појдат пред непријателите свои, ќе му заповедам на мечот таму да ги убие. Ќе ги свртам врз нив очите Свои за нивно зло, а не за добро.

⁵Зашто Господ Бог Саваот ќе се допре до земјата, и таа ќе се растопи, и ќе се расплачат сите живи на неа; ќе се крене таа цела како реката Нил и ќе се спушти како реката египетска.

⁶Тој ги изгради своите горни дворци на небесата и сводот Свој го зацврсти на земјата; ги повика морските води и ги изли по лицето на земјата; Јахве е името Негово.

⁷Вие, синови Израилеви, не сте ли за мене како синови етиопски, вели Господ, нели Јас го изведов Израил од земјата египетска и Филистејците — од Кафтор и Арамејците од Кир?

⁸Ете, очите на Господ Бог се врз грешното царство, и Јас ќе го истребам од лицето на земјата, но домот на Јаков нема целосно да го истребам, вели Господ.

⁹Зашто, еве, Јас ќе заповедам и ќе го распрснам домот Израилев по сите народи, како што се растураат зрната во решето, и ниедно не паѓа на земја.

¹⁰Од меч ќе умрат сите грешници меѓу народот Мој, кои велат: „Нема да нѐ постигне и нема да дојде кај нас тоа зло!“

¹¹Во оној ден ќе ја подигнам паднатата скинија Давидова, ќе ги пополнам пукнатините нејзини, срушеното ќе го подигнам и ќе ја обновам, како во поранешните дни.

¹²За да го завладее остатокот од Едом и сите народи, меѓу кои ќе се спомнува името Мое, вели Господ, Кој го врши сето тоа.

¹³Ете, ќе настапат дни, вели Господ, кога орачот ќе го затече жетварот и оној што гази грозје — сејачот; и горите ќе пуштаат гроздов сок, и од сите ридови ќе потече.

¹⁴Ќе ги вратам заробените на Мојот народ Израил; и пак ќе ги изградам запустените градови и ќе се населат во нив; ќе насадат лозја и ќе пијат вино од нив, и ќе направат градини и ќе јадат плодови од нив.

¹⁵И ќе ги населам во земјата нивна и тие нема повеќе да бидат истргани од својата земја, која им ја дадов Јас, вели Господ, твојот Бог.