Read Свето Писмо: Стандардна Библија 2006 (со девтероканонски книги) Броеви 18 Bible Online

Броеви 18 - Свето Писмо: Стандардна Библија 2006 (со девтероканонски книги) bible

Броеви 18

¹И му рече Господ на Арон: „Ти и синовите твои и татковиот ти дом заедно со тебе, ќе го понесете врз себе гревот за немарноста во светилиштето; и ти и синовите твои заедно со тебе ќе го понесете врз себе гревот за неисправноста на свештенодејствието свое.

²Земи ги кај себе браќата твои, од племето Левиево од родот на таткото твој; нека бидат тие кај тебе и нека ти служат, а ти и синовите твои заедно со тебе бидете при скинијата на собранието;

³и тие нека ти служат на тебе и на целата скинија; само да не се доближуваат до светите садови и до жртвеникот, за да не умрете и вие, и тие.

⁴Нека бидат тие при тебе и да служат во скинијата на собранието, вршејќи ја и сета работа во скинијата; а човек надворешен да не пристапува кон тебе.

⁵Така извршувајте ја службата во светилиштето и при жртвеникот, за да нема во иднина гнев против синовите на Израил;

⁶зашто вашите браќа, левитите, Јас ги зедов од синовите на Израил и ви ги дадов вам како дар што Му е даден на Господ, за да служат при скинијата на собранието;

⁷а ти и синовите твои заедно со тебе пазете го свештенството свое со сѐ што му припаѓа на жртвеникот и што е внатре зад завесата, и служете. Јас ви подарувам служба свештена, а надворешен кој ќе се доближи, да биде убиен.“

⁸И му рече Господ на Арон: „Ете, Јас ти ги поверувам на тебе сите осветени дарови што за Мене ги принесуваат синовите израилски. Тебе ти ги давам и на синовите твои преку вечна наредба.

⁹Еве што ти припаѓа на тебе од свештените жртви, освен она што се изгорува: секој лебен принос, и секоја жртва за грев, и секоја жртва за вина, што тие Ми ја принесуваат. Тоа е голема светиња за тебе и за синовите твои.

¹⁰Тоа да го јадете на најсвето место. Секој од машки пол може да го јаде (ти и твоите синови); тоа да ти биде свето.

¹¹И ова да биде ваше — од првините што се принесуваат, од сѐ што се вознесува од синовите израилски преку вечен закон ти го дадов тебе, и на синовите твои, и на ќерките твои заедно со тебе; секој чист во куќата твоја може да јаде од тоа.

¹²Најдоброто од маслото, најдоброто од виното и од житото — сите нивни првини, што тие Му ги принесуваат на Господ, твои да се;

¹³и сите првини од плодовите на земјата нивна, што Му ги принесуваат на Господ, твои нека бидат; секој чист од куќата твоја може да го јаде тоа.

¹⁴Сѐ што е ставено под клетва во земјата израилска, да биде твое.

¹⁵И сѐ она, што ја отвора утробата во секоја плот, а се принесува на Господ, од луѓе и од добиток, да биде твое. Само првородените од луѓето и од нечистиот добиток да бидат откупувани.

¹⁶Кога ќе бидат на возраст од еден месец и нагоре, можат да бидат откупувани. Земај откуп по фиксна цена: пет шекели сребрени, според свештениот шекел, кој има дваесет гери;

¹⁷но за првороденото теле, и за првороденото од овците, и за првороденото од козите не земај откуп: тие се свети; со крвта нивна попрскај го жртвеникот, а лојот изгори го како жртва за благопријатен мирис на Господ;

¹⁸а месото нивно, пак, ти припаѓа тебе, како што ти припаѓаат градите за возношение и десната плешка.“

¹⁹Сите вознесувани свети дарови кои синовите на Израил Му ги принесуваат на Господ, преку вечно озаконување ти ги давам тебе и на синовите твои и на ќерките твои; тоа е завет постојан, вечен пред Господ, даден за тебе и за потомството твое заедно со тебе.

²⁰И му рече Господ на Арон: „Од земјата нивна ќе немаш наследство и дел нема да имаш меѓу нив, бидејќи Јас сум твојот дел и твоето наследство меѓу синовите на Израил.“

²¹„А на Левиевите синови, ете, Јас им дадов како дел десеток од сѐ, што има Израил, за службата нивна, што ја вршат во скинијата на собранието.

²²И по сево ова синовите израилски да не пристапуваат до скинијата на собранието, за да не згрешат и да не умрат.

²³Левитите сами нека ја вршат службата во скинијата на собранието и да го носат врз себе нивниот грев. Тоа е вечно озаконување во поколенијата ваши; но меѓу синовите на Израил тие нема да добиваат дел;

²⁴бидејќи на левитите им го давам како дел десетокот од синовите израилски, што тие го принесуваат за возношение пред Господ, затоа и им реков: меѓу синовите израилски тие нема да наследуваат дел.“

²⁵И му рече Господ на Мојсеј, велејќи:

²⁶„Кажи им на левитите и речи им: кога го земате од синовите израилски десетокот, што ви го дадов од нив како дел, вознесувајте Му од него возношение на Господ: од десетокот — десеток.

²⁷И тоа ваше возношение ќе ви се прими како жито од гумно и како сок од грозје;

²⁸така и вие вознесувајте Му возношение на Господ, од сите ваши десетоци, што ги земате од синовите израилски, и давајте го осветениот дар од нив за возношение Господово на свештеникот Арон.

²⁹Од сѐ што ви се дарува, принесувајте Му возношение на Господ, од сѐ што е најдобро и што се осветува.

³⁰И кажи им: кога ќе принесувате најдоброто од тоа, ќе им се смета на левитите како добивка од гумно и како добивка од преса за грозје.

³¹Можете да го јадете тоа на секое место, вие (вашите синови) и вашите семејства, зашто тоа ви е награда за вашата служба во скинијата на собранието;

³²и нема да се огрешите ако го принесувате најдоброто од тоа; и нема да ги оскверните светите приноси на синовите израилски, и нема да умрете.“