Read Свето Писмо: Стандардна Библија 2006 (со девтероканонски книги) Броеви 7 Bible Online

Броеви 7 - Свето Писмо: Стандардна Библија 2006 (со девтероканонски книги) bible

Броеви 7

¹Во оној ден кога Мојсеј ја изгради скинијата и ја помаза, кога ја освети неа и сите нејзини делови, и жртвеникот и сите негови прибори, и ги помаза и ги освети, —

²тогаш дојдоа кај него (дванаесетте) началници израилски, глави на домовите нивни, старешини на племињата кои раководеа со пребројувањето,

³и донесоа принос свој пред Господ — шест покриени коли и дванаесет волови, по една кола од двајца началници и по еден вол од секого, и го донесоа тоа пред скинијата.

⁴И му рече Господ на Мојсеј, велејќи:

⁵„Земи го тоа од нив; тоа ќе послужи за извршување на службите во скинијата на собранието; и дај им го тоа на левитите, секому според службата негова!“

⁶И ги зеде Мојсеј колите и воловите и им ги предаде на левитите:

⁷две коли и четири вола им даде на Гирсоновите синови, според службата нивна;

⁸и четири коли и осум волови им даде на Мерариевите синови, според службата нивна, под надзор на Итамар, синот на свештеникот Арон;

⁹а на Каатовите синови не им даде, зашто нивната работа беше да го носат светилиштето: на рамо треба да го носат.

¹⁰И донесоа началниците жртви за осветување на жртвеникот во оној ден кога го помазаа, и ги принесоа началниците даровите свои пред жртвеникот.

¹¹Па му рече Господ на Мојсеј: „На ден по еден началник да донесува свој принос за осветување на жртвеникот.“

¹²Во првиот ден го донесе својот дар Наасон, Аминадавовиот син, од племето на Јуда;

¹³дарот негов беше: една сребрена чинија, тешка сто и триесет шекели и една сребрена чаша, тешка седумдесет шекели, според свештениот шекел, обете полни со пченично брашно, смешано со масло за лебен принос;

¹⁴една златна кадилница, тешка десет шекели, полна со темјан;

¹⁵еден јунец, еден овен, едно едногодишно машко јагне за сепаленица;

¹⁶еден козел од козите — жртва за грев;

¹⁷и за жртва за мир, два вола, пет овни, пет козли, пет едногодишни јагниња. Тоа беше дар од Наасон, Аминадавовиот син.

¹⁸Во вториот ден дар свој донесе Натанаил, Цуаровиот син, началник (на племето) Исахарово;

¹⁹тој донесе свој принос: една сребрена чинија, тешка сто и триесет шекели, една сребрена чаша тешка — седумдесет шекели, според свештениот шекел, полни со пченично брашно, измешано со масло за лебен принос;

²⁰една златна кадилница — десет шекели, полна со темјан,

²¹еден јунец, еден овен, едно едногодишно машко јагне за сепаленица,

²²еден козел како жртва за грев,

²³и жртва за мир — два вола, пет овни, пет козли, пет едногодишни јагниња. Тоа беше дарот од Натанаил, Цуаровиот син.

²⁴Во третиот ден началникот на потомците Завулонови Елијав, Хелоновиот син;

²⁵дарот му беше: една сребрена чинија, тешка сто и триесет шекели, една сребрена чаша — седумдесет шекели, според свештениот шекел, полни со пченично брашно, измешано со масло за лебен принос;

²⁶една златна кадилница — десет шекели, полна со темјан,

²⁷еден јунец, еден овен, едно едногодишно машко јагне за сепаленица,

²⁸еден козел — жртва за грев,

²⁹и за жртва за мир два вола, пет овни, пет козли, пет едногодишни јагниња. Тоа беше дар од Елијав, Хелоновиот син.

³⁰Во четвртиот ден началникот на Рувимовите потомци Елицур, Шедеуровиот син;

³¹дарот негов беше: една сребрена чинија, тешка сто и триесет шекели, една сребрена чаша — седумдесет шекели, според свештениот шекел, полни со пченично брашно измешано со масло за лебен принос;

³²една златна кадилница — десет шекели, полна со темјан,

³³еден јунец, еден овен, едно едногодишно машко јагне за сепаленица,

³⁴еден козел — жртва за грев,

³⁵и жртва за мир два вола, пет овни, пет козли и пет едногодишни јагниња. Тоа е дарот од Елицур, Шедеуровиот син.

³⁶Во петтиот ден началникот на Симеоновите потомци Шелумиел, Цуришадаевиот син;

³⁷приносот негов беше: една сребрена чинија, тешка сто и триесет шекели, една сребрена чаша — седумдесет шекели, според свештениот шекел, обете полни со пченично брашно, измешано со масло како лебен принос;

³⁸една златна кадилница — десет шекели, полна со темјан,

³⁹еден јунец, еден овен, едно едногодишно машко јагне за сепаленица,

⁴⁰еден козел — жртва за грев,

⁴¹и жртва за мир — два вола, пет овни, пет козли и пет едногодишни јагниња. Тоа е дарот од Шелумиел, Цуришадаевиот син.

⁴²Во шестиот ден началникот на Гадовите потомци Елијасаф, Деуеловиот син;

⁴³приносот негов беше: една сребрена чинија, тешка сто и триесет шекели, една сребрена чаша — седумдесет шекели, според свештениот шекел, полни со пченично брашно, измешано со масло како лебен принос;

⁴⁴една златна кадилница — десет шекели, полна со темјан,

⁴⁵еден јунец, еден овен, едно едногодишно машко јагне за сепаленица,

⁴⁶еден козел — жртва за грев,

⁴⁷и жртва за мир — два вола, пет овни, пет козли и пет едногодишни јагниња. Тоа е дарот од Елијасаф, Деуеловиот син.

⁴⁸Во седмиот ден началникот на Ефремовите потомци Елишама, Амиудовиот син;

⁴⁹приносот негов беше: една сребрена чинија, тешка сто и триесет шекели, една сребрена чаша — седумдесет шекели, според свештениот шекел, полни со пченично брашно, измешано со масло како лебен принос;

⁵⁰една златна кадилница — десет шекели, полна со темјан,

⁵¹еден јунец, еден овен, едно едногодишно машко јагне за сепаленица,

⁵²еден козел — жртва за грев,

⁵³и жртва за мир — два вола, пет овни, пет козли, пет едногодишни јагниња. Тоа е дарот од Елишама, Амиудовиот син.

⁵⁴Во осмиот ден началникот на Манасиевите потомци Гамалиил, Педацуровиот син;

⁵⁵приносот негов беше: една сребрена чинија, тешка сто и триесет шекели, една сребрена чаша — седумдесет шекели, според свештениот шекел, полни со пченично брашно, измешано со масло како лебен принос;

⁵⁶една златна кадилница — десет шекели, полна со темјан,

⁵⁷еден јунец, еден овен, едно едногодишно машко јагне за сепаленица,

⁵⁸еден козел — жртва за грев,

⁵⁹и жртва за мир, два вола, пет овни, пет козли, пет едногодишни јагниња. Тоа е дарот од Гамалиил, Педацуровиот син.

⁶⁰Во деветтиот ден началникот на Венијаминовите потомци Авидан, Гидониевиот син;

⁶¹приносот негов беше: една сребрена чинија, тешка сто и триесет шекели, една сребрена чаша — седумдесет шекели, според свештениот шекел, полни со пченично брашно измешано со масло како лебен принос;

⁶²една златна кадилница — десет шекели, полна со темјан,

⁶³еден јунец, еден овен, едно едногодишно машко јагне за сепаленица,

⁶⁴еден козел — жртва за грев,

⁶⁵и жртва за мир — два вола, пет овни, пет козли, пет едногодишни јагниња. Тоа е дар од Авидан, Гидониевиот син.

⁶⁶Во десеттиот ден началникот на Дановите потомци Ахиезер, Амишадаевиот син;

⁶⁷приносот негов беше една сребрена чинија, тешка сто и триесет шекели, една сребрена чаша — седумдесет шекели, според свештениот шекел, полни со пченично брашно, измешано со масло како лебен принос;

⁶⁸една златна кадилница — десет шекели, полна со темјан,

⁶⁹еден јунец, еден овен, едно едногодишно машко јагне за сепаленица,

⁷⁰еден козел — жртва за грев,

⁷¹и жртва за мир — два вола, пет овни, пет козли, пет едногодишни јагниња. Тоа е дарот на Ахиезер, Амишадаевиот син.

⁷²Во единаесеттиот ден началникот на Асировите потомци Пагиил, Охрановиот син;

⁷³приносот негов беше: една сребрена чинија, тешка сто и триесет шекели, една сребрена чаша — седумдесет шекели, според свештениот шекел, полни со пченично брашно, измешано со масло како лебен принос;

⁷⁴една златна кадилница — десет шекели, полна со темјан,

⁷⁵еден јунец, еден овен, едно едногодишно машко јагне за сепаленица,

⁷⁶еден козел — жртва за грев,

⁷⁷и жртва за мир — два вола, пет овни, пет козли, пет едногодишни јагниња. Тоа е дарот од Пагиил, Охрановиот син.

⁷⁸Во дванаесеттиот ден началникот на Нефталимовите синови Ахира, Енановиот син;

⁷⁹приносот негов беше: една сребрена чинија, тешка сто и триесет шекели, една сребрена чаша — седумдесет шекели, според свештениот шекел, полни со пченично брашно, измешано со масло како лебен принос;

⁸⁰една златна кадилница — десет шекели, полна со темјан,

⁸¹еден јунец, еден овен, едно едногодишно машко јагне за сепаленица,

⁸²еден козел — жртва за грев,

⁸³и жртва за мир — два вола, пет овни, пет козли, пет едногодишни јагниња. Тоа е дарот од Ахира, Енановиот син.

⁸⁴Тоа беа даровите од началниците Израилеви при осветувањето на жртвеникот во денот на помазувањето негово: дванаесет сребрени чинии, дванаесет сребрени чаши, дванаесет златни кадилници.

⁸⁵Во секоја чинија имаше по сто и триесет шекели сребро и во секоја чаша по седумдесет; и така сето сребро во тие садови беше — две илјади и четиристотини шекели, според свештениот шекел;

⁸⁶а дванаесетте златни кадилници полни со темјан, секоја имаше по десет шекели, според свештениот шекел: злато во кадилниците сѐ на сѐ — сто и дваесет шекели.

⁸⁷За сепаленици имаше вкупно: дванаесет јунци од крупниот добиток, дванаесет овни, дванаесет едногодишни машки јагниња, и со нив лебен принос, како и жртвите за грев — дванаесет козли;

⁸⁸а за жртви за мир имаше сѐ на сѐ: дваесет и четири вола крупен добиток, шеесет овни, шеесет козли, шеесет едногодишни машки јагниња (без недостаток). Тоа беа даровите при осветувањето на жртвеникот откако беше помазан.

⁸⁹Кога Мојсеј влегуваше во скинијата на собранието да зборува со Господ, слушаше глас, кој му говореше од поклопецот, што е над ковчегот на заветот меѓу двата херувима; и му говореше.