Read Свето Писмо: Стандардна Библија 2006 (со девтероканонски книги) Броеви 8 Bible Online

Броеви 8 - Свето Писмо: Стандардна Библија 2006 (со девтероканонски книги) bible

Броеви 8

¹И му рече Господ на Мојсеј, велејќи:

²„Јави му на Арон и кажи му: ‚кога ги палиш кандилцата, отспреди на светилникот треба да горат седум кандилца.‘“

³Арон така и направи: отспреди на светилникот ги запали кандилцата негови, како што му заповеда Господ на Мојсеј.

⁴И еве како е направен светилникот: искован е од злато — од стеблото негово до цветовите негови сѐ е од ковано злато; според образецот, што Господ му го беше покажал на Мојсеј.

⁵И му рече Господ на Мојсеј, велејќи:

⁶„Земи ги левитите меѓу синовите израилски и очисти ги.

⁷А за да ги очистиш, постапи со нив вака: пороси ги со вода за очистување, и нека го избричат со брич целото тело свое и да ги исперат алиштата свои, па ќе бидат чисти.

⁸И да земат еден јунец и заедно со него и лебен принос од пченично брашно, измешано со масло, и друг јунец — жртва за грев.

⁹И доведи ги левитите пред скинијата на собранието и собери го целото општество на синовите израилски;

¹⁰доведи ги левитите нивни пред Господ, а синовите на Израил нека ги стават рацете свои врз левитите.

¹¹Арон, пак, да го изврши над левитите посветувањето нивно пред Господ во име на синовите израилски за да Му служат на Господ;

¹²а левитите да ги ставаат рацете свои врз главите на јунците, и едниот да го принесат како жртва за грев, а другиот за сепаленица на Господ, за да им се простат гревовите на левитите.

¹³Потоа постави ги левитите пред Арон и пред синовите негови и изврши го над нив посветувањето во Господ;

¹⁴така оддели ги левитите од синовите израилски, па левитите да бидат Мои.

¹⁵Потоа левитите, откако ќе ги очистиш и ќе го извршиш над нив посветувањето нивно, да влезат да служат во скинијата на собранието; зашто тие Ми се дадени меѓу синовите израилски;

¹⁶бидејќи место сите првородени од синовите израилски, кои отвораат утроба, Јас ги зедов за Себе.

¹⁷Зашто Мои се сите првородени кај синовите израилски, од човек до добиток: во оној ден, кога Јас ги убив сите првородени во египетската земја, Јас ги осветив за Себе,

¹⁸и ги зедов левитите место сите првородени кај синовите на Израил.

¹⁹Меѓу синовите израилски левитите му ги предадов на Арон а на синовите негови, за да служат место синовите израилски при скинијата на собранието и да внимаваат на синовите на Израил да не им се случи зло, ако се доближат до светилиштето.“

²⁰Така и постапија со левитите Мојсеј и Арон и целото општество на синовите израилски; како што му заповеда Господ на Мојсеј за левитите, така и постапија со нив синовите на Израил.

²¹И левитите откако се очистија и ги испраа облеките свои, Арон изврши над нив посветување пред Господ и ги очисти, и се помоли за нив за да бидат чисти.

²²Потоа левитите влегоа да служат во скинијата на собранието пред Арон и пред синовите негови. Како што му заповеда Господ на Мојсеј за левитите, така и постапија со нив.

²³И му рече Господ на Мојсеј, велејќи:

²⁴„Еве го законот за левитите: од дваесет и пет години нагоре да стапуваат на служба при скинијата на собранието,

²⁵а од педесет години натаму да престанат да служат и повеќе да не работат;

²⁶а тогаш тие нека им помагаат на браќата свои да чуваат стража при скинијата на собранието, но служба да не служат. Така постапувај со левитите, што се однесува до службата нивна.“