Read Свето Писмо: Стандардна Библија 2006 (со девтероканонски книги) Броеви 9 Bible Online

Броеви 9 - Свето Писмо: Стандардна Библија 2006 (со девтероканонски книги) bible

Броеви 9

¹И му рече Господ на Мојсеј во Синајската Пустина во првиот месец од втората година, откако беа излегле од египетската земја, велејќи:

²„Нека направат синовите израилски Пасха во определеното за неа време:

³на четиринаесеттиот ден од тој месец вечерта направете ја во определеното време за неа; според сите прописи пропишани и со сите обреди пропишани за неа направете ја!“

⁴И им рече Мојсеј на синовите израилски да направат Пасха.

⁵И направија Пасха во првиот месец, на четиринаесеттиот ден од месецот вечерта, во Синајската Пустина: како што му заповеда Господ на Мојсеј, така и постапија во сѐ синовите на Израил.

⁶А имаше луѓе, кои беа нечисти од допир до мртви човечки тела, па не можеа да направат Пасха во оној ден; и дојдоа тие луѓе во оној ден кај Мојсеј и Арон,

⁷и му рекоа на Мојсеј: „Ние сме нечисти од допир до мртви човечки тела; зошто не ни дозволуваат и ние да му принесеме принос на Господ во определеното време меѓу синовите израилски?“

⁸И им рече Мојсеј: „Почекајте да чујам, како ќе заповеда Господ за вас.“

⁹И му рече Господ на Мојсеј, велејќи:

¹⁰„Кажи им на синовите на Израил: ако некој од вас или од потомците ваши биде нечист поради допир до мртво тело, или биде на долг пат, и тој нека направи Пасха Господова.

¹¹Таквите нека ја направат во четиринаесеттиот ден од вториот месец вечерта и нека ја јадат со бесквасен леб и со горчливи тревки;

¹²и да не оставаат од неа за утрешниот ден и коските нејзини да не се кршат; нека ја направат според сите прописи за Пасха.

¹³А оној што е чист, а не бил на (долг) пат и не направи Пасха, — да се истреби таа душа од народот свој, зашто тој не Му принесол дар на Господ во определеното време: грев ќе прими врз себе тој човек.

¹⁴Ако при вас живее придојден и тој треба да направи Пасха Господова; според наредбата за Пасха и според обредот за неа тој треба да ја направи; еден закон нека постои за вас — и за придојден, и за тукашен.“

¹⁵Во оној ден кога беше поставена скинијата, облак ја покри скинијата на собранието, и од вечерта па до изутрина се гледаше нешто како оган над скинијата.

¹⁶Така стануваше секогаш: облак ја покриваше дење и нешто како оган — ноќе.

¹⁷И штом облакот ќе се кренеше од скинијата, синовите израилски тргнуваа на пат, и на местото, каде што облакот запираше, таму се сместуваа синовите израилски.

¹⁸По заповед на Господ синовите на Израил тргнуваа на пат и по заповед на Господ застануваа: за сето време, додека облакот стоеше над скинијата, стоеја и тие;

¹⁹и ако облакот долго време остануваше над скинијата, синовите израилски го набљудуваа тој Господов знак и не тргнуваа.

²⁰Понекогаш, пак, облакот малку време остануваше над скинијата: според знакот Господов тие се запираа и според знакот Господов тргнуваа на пат.

²¹Понекогаш облакот стоеше само од вечерта до утрината, и наутро облакот се креваше, тогаш и тие тргнуваа; или облакот стоеше и дење и ноќе, и кога ќе се кренеше, тогаш и тие тргнуваа;

²²или ако два дена, или цел месец, или подолго време облакот остануваше над скинијата, тогаш и синовите израилски стоеја и не тргнуваа на пат; а кога ќе се издигнеше, тогаш тргнуваа.

²³На знакот Господов се запираа и според знакот Господов тргнуваа на пат; го следеа знакот Господов според заповедта на Господ, дадена преку Мојсеј.