Read Свето Писмо: Стандардна Библија 2006 (со девтероканонски книги) Захарија 12 Bible Online

Захарија 12 - Свето Писмо: Стандардна Библија 2006 (со девтероканонски книги) bible

Захарија 12

¹Пророчко слово од Господ за Израил. Господ, Кој го распна небото и ја основа земјата и му создаде на човекот дух во неговите гради, вели:

²ете, Јас ќе го направам Ерусалим како чаша за опивање на сите народи околни, а исто така и за Јуда во времето на ерусалимската опсада.

³Во оној ден ќе го направам Ерусалим како тежок камен за сите племиња; сите што ќе го подигаат, ќе се искилават, а ќе се соберат против него сите народи земни.

⁴Во оној ден, вели Господ, Јас ќе го удрам секој коњ со лудост, а коњаникот негов — со безумие, додека врз домот Јудин ќе ги отворам очите Свои; секој коњ пак, кај народите ќе го удрам со слепило.

⁵Тогаш кнезовите Јудини ќе речат во срцата свои: силата на жителите на Ерусалим е во Господ Саваот, нивниот Бог.

⁶Во оној ден Јас ќе ги направам кнезовите Јудини како запален јаглен меѓу дрва и како факел меѓу снопови; тие ќе ги истребат сите околни народи, и од десната и од левата страна, и Ерусалим ќе биде одново населен на своето место — во Ерусалим.

⁷И Господ ќе ги спаси најнапред шаторите на Јуда, така што гордоста на домот Давидов и гордоста на ерусалимските жители да не се издига над Јуда.

⁸Во оној ден Господ ќе ги засолни жителите на Ерусалим, и најслабиот меѓу нив во оној ден ќе биде како Давид, а домот Давидов ќе стане како Бог, како ангел Господов пред нив.

⁹Во оној ден ќе ги истребам сите народи, што го напаѓаат Ерусалим.

¹⁰А врз домот Давидов и врз жителите ерусалимски ќе излијам дух на благодат и молитва, така што, кога ќе погледнат на Оној, Кого тие го прободоа, ќе плачат за Него, како што се плаче за еднороден син, и ќе ридаат како што се рида за првороден.

¹¹Во оној ден ќе се крене голем плач во Ерусалим, како плач на Хадад-Римон во долината Мегидо.

¹²И ќе плаче земјата, секое семејство посебно; семејството на домот Давидов, и жените нивни одделно; семејството на домот Натанов, и жените нивни одделно;

¹³домот на Левиј одделно, и жените нивни одделно; племето Симеоново одделно, и жените нивни одделно;

¹⁴и сите други племиња, секое племе одделно, и жените нивни одделно.