Read Свето Писмо: Стандардна Библија 2006 (со девтероканонски книги) 2 Макавејска 10 Bible Online

2 Макавејска 10 - Свето Писмо: Стандардна Библија 2006 (со девтероканонски книги) bible

2 Макавејска 10

¹За тоа време Макавеј и оние што беа со него, под водство на Господ, пак го зазедоа храмот и градот,

²и ги урнаа жртвениците и идолските храмови, изградени од туѓинците.

³Потоа го исчистија храмот, подигнаа друг жртвеник, и тогаш, откако добија искри преку удирање камен со камен и од нив распалија оган, принесоа жртви, по тригодишен прекин, направија кадилница, свеќници и ставија лебови на трпезата за предложение.

⁴Откако го направија сето тоа, паѓајќи ничкум тие Му се помолија на Господ да не се најдат никогаш во такви неволји, туку ако некогаш повторно згрешат, Господ да ги казни милозливо и да не ги предава на богохулни и безбожни мачители.

⁵Чистењето на храмот се совпадна со истиот ден во кој беше и осквернувањето негово од незнабошците — во дваесет и петтиот ден од месецот кислев.

⁶Празнуваа весело осум дена, како и на празникот Сеници, спомнувајќи како пред извесно време го поминувале овој свет празник, како ѕверови по гори и пештери.

⁷Затоа, носејќи стапови, обвиени со бршлен, зелени гранчиња и палми, Му благодарија и Го прославуваа Оној, Кој им помогна да го исчистат местото Негово.

⁸И тогаш заедно решија и со заповед наредија — сиот јудејски народ да го празнува овој празник три дена секоја година.

⁹Таков беше крајот на Антиох, наречен Епифан.

¹⁰А сега ќе ги изложиме настаните во времето на Антиох Евпатор, синот на оној безбожник, задржувајќи се само накратко на воените неволји.

¹¹Кога го презеде царството, тој му го предаде управувањето со државата на некој си Лисиј, главен воен управник на Келе-Сирија и Феникија.

¹²Птоломеј, наречен Макрон, прв се однесуваше праведно со Јудејците, па заради големите неправди што беа направени над нив, тој настојуваше со нив сите работи да ги заврши мирољубиво.

¹³Затоа беше наклеветен од пријателите на Евпатор, па слушајќи дека го нарекуваат предавник, затоа што го напуштил Кипар, кој му беше доверен од Филопатор, и дека преминал кај Антиох Епифан, па, откако немаше веќе чест и власт, се отру од очај и така го заврши својот живот.

¹⁴А Горгиј, штом стана воен управител на оние места, држеше наемни војски и постојано војуваше со Јудејците.

¹⁵Заедно со него и Идумејците, кои имаа тврдини на добри положби, ги обеспокојуваа Јудејците, и прифаќајќи ги ерусалимските бегалци, настојуваа да одржуваат постојана воена состојба.

¹⁶Макавеј и оние што беа со него, молејќи Му се на Бога да им биде помошник во војната, ги нападнаа идумејските тврдини.

¹⁷И, откако ги нападнаа силно, ги зазедоа тие места, им се одмаздија на сите, кои се бореа на ѕидините, уништувајќи ги сите што ги среќаваа, а убија не помалку од дваесет илјади луѓе.

¹⁸Не помалку од девет илјади луѓе побегнаа во две добро утврдени кули, снабдени со сѐ што е потребно против опсадата.

¹⁹Оставајќи ги Симон и Јосиф, а и Захеј со доста луѓе за да ја продолжат опсадата, Макавеј самиот отиде на такви места, каде што беше повеќе потребен.

²⁰А оние што беа со Симон, поради нивното среброљубие, дозволија да бидат поткупени од оние што беа опсадени во кулите, па, откако добија седумдесет илјади драхми, им овозможија на некои од нив да избегаат.

²¹Кога го известија Макавеј за она што се случи, тој ги собра народните старешини и пред нив ги прекори, велејќи им дека за пари ги продале своите браќа со тоа што ги пуштиле непријателите против нив.

²²Затоа нареди да бидат погубени како предавници и веднаш потоа ги зазеде двете кули.

²³Имајќи успех во оружјето, кое беше во неговите раце, во тие две тврдини изби повеќе од дваесет илјади луѓе.

²⁴А Тимотеј, кој пред тоа беше победен од Јудејците, собра многубројна војска од туѓинци и голем број коњаници од Азија и дојде до Јудеја со цел да ја завладее.

²⁵Кога почна да се приближува, тогаш оние што беа со Макавеј, се обратија со молитви кон Господ, главите си ги посипаа со пепел и се препашаа со вреќиште околу половината.

²⁶Паѓајќи ничкум пред подножјето на жртвеникот, тие Му се молеа на Бога да биде милостив спрема нив, да им биде непријател на нивните непријатели и противник на нивните противници, како што се вели во Законот.

²⁷Откако завршија со молитвата, го зедоа оружјето и отидоа далеку од градот, а кога се приближија до непријателите, тие застанаа.

²⁸Штом почна сонцето да излегува и едните и другите влегоа во бој: едните беа убедени дека ќе победат затоа што беа храбри и затоа што имаа верба во Господ, а другите — го поставија гневот за предводник во битката.

²⁹Кога започна битката, на противниците им се покажаа од небото петмина прекрасни мажи на коњи со златни узди, а двајца од нив ги предводеа Јудејците;

³⁰тие го зедоа Макавеј помеѓу себе за да го запазат неповреден со своето оружје, а на противниците фрлаа стрели и молњи, така што тие беа заслепени и збркани од страв, па почнаа да се убиваат едни со други.

³¹Беа убиени дваесет илјади и петстотини пешаци и шестотини коњаници.

³²Самиот Тимотеј избега во тврдината, наречена Газир, која беше мошне добро укрепена, а со неа управуваше Хереј.

³³Макавеј и оние што беа со него, со радосен занес ја опсадуваа тврдината четири дена.

³⁴Оние, пак, што беа во тврдината, уверени дека таа е недостапна, им возвраќаа со лоши и срамни зборови.

³⁵Петтиот ден, кога се зазоруваше, дваесет момци од војската на Макавеј, пламнати од гнев поради срамните зборови, храбро се искачија на ѕидините и со страшна лутина ги убија сите што ги видоа.

³⁶Набргу потоа и други навлегоа во тврдината, опфатени од истиот гнев, ги палеа кулите, па, откако запалија клади, живи ги гореа богохулниците; други ја искршија портата, така што навлезе сета војска и ја освоија тврдината.

³⁷А Тимотеј, кој се беше сокрил во една јама, го убија, како и неговиот брат Хереј и Аполофан.

³⁸Откако го извршија тоа, почнаа со песна и химни да Му благодарат на Господ, Кој му направи на Израил толку голема добрина и им подари победа.