Read Свето Писмо: Стандардна Библија 2006 (со девтероканонски книги) 3 Ездра 1 Bible Online

3 Ездра 1 - Свето Писмо: Стандардна Библија 2006 (со девтероканонски книги) bible

3 Ездра 1

¹Втора книга на пророкот Ездра, синот на Сераја, син на Азарија, син на Хелкија, син на Селум, син на Садок, син на Ахитув,

²син на Ахија, син на Финеас, син Елиев, син на Амарија, син на Азарија, син на Мераимот, син на Арна, син на Озиј, син на Борит, син на Авишуа, син на Финеас, син на Елеазар,

³син Аронов од Левиевото племе, кој беше во мидиската земја во време царувањето на персискиот цар Артаксеркс.

⁴Словото Господово дојде до мене:

⁵„Оди и кажи му ги на Мојот народ неговите лоши дела и на нивните синови беззаконијата, што ги направија против Мене, за да ги известат синовите од своите синови,

⁶зашто гревовите на нивните родители се намножија во нив: откако ме заборавија, тие почнаа да им принесуваат жртви на туѓи богови.

⁷Зар Јас не ги изведов од египетската земја, од домот на ропството? А тие Ме разгневија и советите Мои ги презреа.

⁸Острижи ја косата на твојата глава и фрли го сето зло врз нив, зашто тие, тој непокорен народ, законот Мој не го слушаа.

⁹До кога ќе ги поднесувам тие, на кои сум им направил толку многу добрини?

¹⁰Заради нив многу цареви соборив; го погубив фараонот со луѓето негови и со сета негова војска;

¹¹пред нивното лице ги истребив сите незнабошци, на исток ги расеав народите од областите на Тир и Сидон и сите нивни непријатели ги уништив.“

¹²А ти речи им, вака вели Господ:

¹³„Јас сум Оној Кој ве преведов преку морето и по неговото дно ви направив ограден пат, Мојсеја ви го дадов за водач и Арона — за свештеник,

¹⁴ви дадов светлина во огнен столб и многу чуда направив меѓу вас, а вие ме заборавивте, вели Господ.

¹⁵Така вели Господ Седржителот: потполошките ви беа знак. Ви дадов борци за заштита, но вие и таму негодувавте;

¹⁶не се радувавте што заради Моето име загинаа вашите непријатели, туку дури и сега уште негодувате.

¹⁷Каде се оние добрини што ви ги направив? Зар во пустината, кога огладневте, не викавте кон Мене,

¹⁸велејќи: ‚Зошто нѐ доведе во оваа пустина? Зошто нѐ изведе за да нѐ погубиш? Подобро ќе беше да им слугуваме на Египќаните, отколку да изумреме во пустинава.‘

¹⁹Јас се смилував на вашите офкања, и ви дадов мана; и вие јадевте леб ангелски.

²⁰Кога бевте жедни, нели го расеков каменот и не потекоа ли води во изобилие? Од жегата ве покривав со лисја од дрвјата.

²¹Ви разделив плодна земја; пред вас ги прогонив Хананците, Перизијците и Филистејците. Уште што да направам за вас?“

²²Така вели Господ Седржителот: „Кога бевте во пустината, кај реката Мера, ожеднети го хулевте Моето име.

²³Јас не испратив оган врз вас поради вашето богохулство, но ставив дрво во водата и ја направив реката слатка.

²⁴Што да ти направам Јаков? Јудо, ти не сакаше да се покоруваш. Во други народи ќе се населам, ќе им го дадам Моето име, за да ги пазат Моите закони.

²⁵Бидејќи вие Ме оставивте, и Јас ќе ве оставам; нема да ги помилувам оние што бараат милост од Мене.

²⁶Кога Ме викате, нема да ве слушам, зашто со крв ги осквернивте вашите раце, а нозете ваши брзаат да извршуваат човекоубиство.

²⁷Вие како да не Ме оставивте Мене, туку се оставивте себеси“, вели Господ.

²⁸Така вели Господ Седржителот: „Нели ве молев, како таткото што ги моли своите синови и мајката своите ќерки и доилката — своите доенчиња,

²⁹да бидете Мој народ, а Јас да ви бидам Татко?

³⁰Ве собрав, како кокошката што ги собира своите пилиња под своите крилја. Што да ви направам сега? Ќе ве отфрлам од Моето лице.

³¹Кога ќе ми принесете принос, ќе го свртам Моето лице од вас, зашто ги отфрлив вашите празнични дни, новомесечијата и обрезанијата.

³²Јас ви ги испратив Моите слуги — пророците; вие ги фативте, ги убивте и нивните тела ги раскинавте. Нивната крв од вас ќе ја барам“, вели Господ.

³³Вака вели Господ Седржителот: „Домот ваш е пуст, ќе ве развејам како ветар што ја вее плевата,

³⁴а синовите ваши нема да имаат потомство, затоа што ја презреа Мојата заповед; го правеа она што е зло пред Мене.

³⁵Домовите ваши ќе им ги предадам на идните луѓе, кои, иако не Ме чуле, ќе поверуваат и, макар што не сум им покажувал знаци, ќе го извршуваат она што сум го заповедал,

³⁶и кои, иако не ги виделе пророците, ќе си спомнат за своите беззаконија.

³⁷Мојата благодат ви ја заветувам вам, на идните луѓе, чии деца не Ме виделе со своите телесни очи, но со духот свој, верувајќи во она што сум рекол, ќе празнуваат со веселба.

³⁸И така, гледај, брате, каква слава! Погледни ги луѓето што доаѓаат од исток;

³⁹ним ќе им ги дадам за водачи Авраам, Исак и Јаков, Осија и Амос, Михеј и Јоил, Авдиј и Јона,

⁴⁰Наум и Авакум, Софонија и Агеј, Захарија и Малахија, наречен уште и ангел Господов.“