Read Свето Писмо: Стандардна Библија 2006 (со девтероканонски книги) Матеј 2 Bible Online

Матеј 2 - Свето Писмо: Стандардна Библија 2006 (со девтероканонски книги) bible

Матеј 2

¹А кога се роди Исус во Витлеем Јудејски, во времето кога царуваше Ирод, ете, дојдоа во Ерусалим мудреци од Исток и рекоа:

²„Каде е новородениот Јудејски Цар? Ја видовме Неговата ѕвезда на Исток, па дојдовме да Му се поклониме.“

³Штом го чу тоа, царот Ирод се вознемири и цел Ерусалим со него.

⁴И кога ги собра сите првосвештеници и книжници народни, ги праша: „Каде ќе се роди Христос [2]?“

⁵А тие му одговорија: „Во Витлеем Јудејски; зашто така е напишано преку пророкот:

⁶‚И ти, Витлееме, земјо Јудина, по ништо не си помал меѓу владетелствата Јудини; зашто од тебе ќе излезе Водач Кој ќе го пасе Мојот народ — Израил.‘“

⁷Тогаш Ирод тајно ги повика мудреците и го дозна од нив времето кога се појавила ѕвездата,

⁸па, испраќајќи ги во Витлеем, им рече: „Одете и распрашајте се добро за Младенецот и, штом ќе Го најдете, јавете ми за да дојдам и јас да Му се поклонам.“

⁹Тие, откако го ислушаа царот, си заминаа. И, ете, ѕвездата, што ја беа виделе на Исток, врвеше пред нив, додека не пристигна и се запре одозгора каде што беше Младенецот.

¹⁰А кога ја видоа ѕвездата, тие многу се зарадуваа со голема радост.

¹¹И штом влегоа во куќата, Го видоа Младенецот со мајка Му Марија, и паднаа, па Му се поклонија; потоа ги отворија своите ковчежиња и Му принесоа дарови: злато, ливан и смирна.

¹²И откако на сон примија вест да не се враќаат кај Ирод, по друг пат заминаа за својата земја.

¹³А штом си отидоа тие, ете, ангел Господов му се јави на Јосиф на сон, велејќи: „Стани, земи Го Младенецот и мајка Му, па бегај во Египет и остани таму додека не ти кажам, бидејќи Ирод ќе Го бара Младенецот за да Го погуби.“

¹⁴И откако стана, Го зеде Новороденчето и мајка Му ноќно време и отиде во Египет.

¹⁵И таму остана до смртта на Ирод, за да се исполни реченото од Господа преку пророкот, кој вели: „Од Египет Го повикав Синот Мој.“

¹⁶Тогаш Ирод, кога виде дека мудреците го надитрија, се разгневи многу и испрати да ги погубат сите деца во Витлеем и по целата негова околина од две години и помали, според времето што точно го беше дознал од мудреците.

¹⁷Тогаш се исполни кажаното преку пророкот Еремија, кој говори:

¹⁸„Глас се слушна во Рама, плач и ридање, и пискот голем: Рахила ги оплакува своите чеда и не сака да се утеши, зашто ги нема.“

¹⁹А по смртта на Ирод, ангел Господов му се јави на сон на Јосиф во Египет

²⁰и му рече: „Стани, земи го Младенецот и мајка Му, и оди во земјата израилева, зашто изумреа оние што ја бараа душата на Младенецот.“

²¹А тој откако стана, Го зеде Младенецот и мајка Му, и дојде во земјата израилева.

²²Но, кога чу дека во Јудеја царува Архелај, на местото од татка си Ирод, се уплаши да оди таму; и откако доби вест на сон, тој замина во галилејските предели.

²³А кога пристигна, се насели во градот наречен Назарет за да се исполни реченото преку пророците дека ќе се нарече Назареец.