Read Свето Писмо: Стандардна Библија 2006 (со девтероканонски книги) Марко 16 Bible Online

Марко 16 - Свето Писмо: Стандардна Библија 2006 (со девтероканонски книги) bible

Марко 16

¹Штом мина саботата, Марија Магдалена, Марија Јаковова и Саломија купија мириси, за да дојдат и да Го помазаат Исуса.

²И во првиот ден од седмицата, дојдоа на гробот многу рано, кога изгреваше сонцето,

³па си зборуваа меѓу себе: „Кој ќе ни го одвали каменот од вратата на гробот?“

⁴И кога погледнаа, видоа дека каменот е одвален, а тој беше многу голем.

⁵Штом влегоа во гробот, видоа еден млад човек, облечен во бели алишта, како седи од десната страна; и се уплашија.

⁶А тој им рече: „Не плашете се! Вие Го барате Исус од Назарет, Распнатиот. Тој воскресна, не е овде! Еве го местото каде што го положија.

⁷Но одете, кажете им на учениците Негови и на Петар дека Тој пред вас ќе отиде во Галилеја; таму ќе Го видите, како што ви беше рекол.“

⁸Па, штом излегоа, побегнаа од гробот, зашто ги опфати страв и ужас, и никому ништо не рекоа, зашто се плашеа.

⁹А Исус, кога воскресна во првиот ден од седмицата, ѝ се јави најнапред на Марија Магдалена, од која беше истерал седум демони.

¹⁰Таа отиде и им јави на оние, што беа со Него и што плачеа и ридаа.

¹¹Но тие, кога чуја дека е Тој жив и дека таа Го видела, не поверуваа.

¹²Потоа им се јави во друг лик на двајца од нив по пат, кога одеа в село.

¹³И штом се вратија, тие им кажаа на другите; но и ним не им поверуваа.

¹⁴Најпосле им се јави на единаесетте, кога беа на трпеза, и ги укори за нивното неверие и тврдокорност, зашто не им поверуваа на оние, кои Го видоа воскреснат.

¹⁵Па им рече: „Одете по сиот свет и проповедајте го Евангелието на секое создание.

¹⁶Кој ќе поверува и се крсти, ќе биде спасен; а кој не поверува, ќе биде осуден.

¹⁷А знаците, на оние што ќе поверуваат, ќе им бидат овие: со Моето име ќе истеруваат демони; ќе говорат нови јазици;

¹⁸ќе фаќаат змии в раце и ако нешто смртоносно испијат, нема да им наштети; на болни ќе полагаат раце и тие ќе оздравуваат.“

¹⁹А откако им го рече ова, Господ се вознесе на небо и седна од десната страна на Бога.

²⁰Тие, пак, отидоа и проповедаа насекаде; и Господ им помагаше и им го поткрепуваше словото нивно со чуда, што се јавуваа. Амин!