Read Свето Писмо: Стандардна Библија 2006 (со девтероканонски книги) Второзаконие 26 Bible Online

Второзаконие 26 - Свето Писмо: Стандардна Библија 2006 (со девтероканонски книги) bible

Второзаконие 26

¹Кога ќе дојдеш во земјата што Господ, твојот Бог, ти ја дава како наследство да ја запоседнеш,

²земи ги првините од плодовите на земјата, која Господ, твојот Бог, ти ја дава, стави ги во кошница, и оди на она место, кое Господ, твојот Бог, ќе го одбере, за живеалиште на името Негово;

³потоа оди кај свештеникот, кој е на служба во тие денови и кажи му: „Денес изјавувам пред Господ, твојот Бог, дека влегов во земјата, за која Господ им се заколна на предците наши дека ќе ни ја даде.“

⁴Свештеникот да ја земе кошницата од раката твоја и да ја стави пред жртвеникот на Господ, твојот Бог.

⁵Ти, пак, одговори и кажи пред Господ, твојот Бог: „Мојот предок беше Арамеец скиталец и отиде во Египет и се насели таму со мал број луѓе, и од него произлезе таму голем народ — силен и многуброен.

⁶И Египќаните постапуваа лошо со нас, нѐ притеснуваа и ни наложуваа тешка работа;

⁷тогаш ние завикавме кон Господ, Бог на нашите предци, и Господ го чу нашиот повик, и ја виде бедата наша, маките наши и неволјите наши;

⁸и нѐ изведе Господ од Египет: со силна рака, со голем ужас, со знаменија и чуда,

⁹па нѐ доведе на ова место и ни ја даде оваа земја — земја во која тече мед и млеко.

¹⁰И така, ете, ги донесов првините од плодовите на земјата, која Ти, Господи, ми ја даде, земјата (каде тече мед и млеко).“ Стави го тоа пред Господ, твојот Бог, поклони се пред Господ, твојот Бог,

¹¹па развесели се потоа за сите добра, што Господ, твојот Бог, ти ги даде тебе и на домот твој — ти и левитот и придојдениот, што е кај тебе.

¹²Кога ќе ги одделиш сите десетоци од плодовите (на земјата твоја) во третата година, годината на десетоците, и им дадеш на левитот, на дојденецот, на сиракот и на вдовицата, за да јадат во градовите твои и да се наситуваат,

¹³тогаш кажи пред Господ, твојот Бог: „Изнасобравме сѐ, што е свето во домот (мој), и го дадов на левитот, придојдениот, сиракот и вдовицата, според сите Твои заповеди, како што ми заповеда: јас не направив престап спрема Твоите заповеди и не ги заборавив;

¹⁴во тагата не јадев од нив, ниту одделив од нив за нечиста потреба, ниту дадов од нив за умрено; го послушав гласот на Господ, мојот Бог — исполнив сѐ како што ми заповеда Ти.

¹⁵Погледни од небото од Твојот свет храм и благослови го народот Свој Израил и земјата што ни ја даде, како што им се заколна на прадедовците наши, (дека ќе ни ја дадеш) земјата, во која тече мед и млеко.“

¹⁶Денес Господ, твојот Бог, ти заповеда да ги извршуваш сите овие наредби и закони: пази ги и исполнувај ги со сето свое срце и со сета своја душа.

¹⁷Денес си Му ветил на Господ, дека ќе биде твој Бог, дека ќе одиш по Неговите патишта и ќе ги почитуваш наредбите Негови и ќе го слушаш гласот Негов;

¹⁸и Господ ве избра денес вие да Му бидете Негов избран народ, како што ти рече ако ги почитувате сите заповеди Негови,

¹⁹и дека Тој ќе те постави погоре од сите народи, што ги создал: прочуен, фален, славен, и дека вие ќе Му бидете свет народ на Господ, вашиот Бог, како што беше ветил.