Read Свето Писмо: Стандардна Библија 2006 (со девтероканонски книги) Второзаконие 31 Bible Online

Второзаконие 31 - Свето Писмо: Стандардна Библија 2006 (со девтероканонски книги) bible

Второзаконие 31

¹Уште им кажа Мојсеј на сите синови израилски,

²велејќи: „Сега сум на сто и дваесет години; не можам веќе да излегувам и да влегувам, и Господ ми рече: ‚ти нема да го минеш Јордан,

³Господ, твојот Бог, Сам ќе тргне пред тебе; Тој ќе ги истреби тие народи пред тебе, и ти ќе ги наследиш; Исус ќе тргне пред тебе, како што рече Господ;‘

⁴и ќе постапи Господ со нив така како што постапи со Сион и со Ог, цареви аморејски, (кои беа од оваа страна на Јордан) и со земјите нивни, кои Тој ги уништи;

⁵и ќе ви ги предаде Господ, и вие ќе постапите со нив според заповедите, што ви ги дадов.

⁶Бидете цврсти и храбри, не плашете се и не ужасувајте се од нив, зашто Господ, твојот Бог, Самиот ќе тргне пред вас, и нема да отстапи од тебе и нема да те остави.“

⁷Тогаш Мојсеј го повика Исус и пред сите Израилци му кажа: „Биди цврст и храбар, зашто ти ќе влезеш со овој народ во земјата, за која Господ им се заколна на предците ваши дека ќе им ја даде; и ти ќе им ја разделиш на делови.

⁸И Господ ќе тргне Самиот со тебе, Самиот ќе биде со тебе, нема да отстапи од тебе и нема да те остави: не плаши се и не ужасувај се.“

⁹И ги напиша Мојсеј овие заповеди од законот и им ги предаде на свештениците, потомци Левиеви, кои го носеа ковчегот на заветот Господов, и на сите старешини израилски.

¹⁰И им завешта Мојсеј, велејќи: „По седум години, во прошталната година, на празникот Сеници,

¹¹кога целиот Израил ќе дојде да се јави пред Господ, твојот Бог, на место што ќе го одбере Господ, прочитајте го гласно овој закон пред целиот народ;

¹²собери го народот — мажите, жените, децата и дојденците, што се наоѓаат во градовите ваши, за да чујат и да се научат да се плашат од Господ, вашиот Бог, и да се трудат да ги исполнуваат сите заповеди од овој закон;

¹³и синовите нивни, кои не го знаат тоа, ќе чујат и ќе се научат да се плашат од Господ, вашиот Бог, преку сите денови, додека живеете во земјата, за која ќе го минете Јордан, за да ја наследите.“

¹⁴И му рече Господ на Мојсеј: „Ете, твоите денови се приближија до смртта; повикај го Исус, и дојдете (пред влезот) во скинијата на собранието, и Јас ќе му дадам заповед!“ И дојде Мојсеј со Исус, и застана (пред влезот) во скинијата на собранието.

¹⁵И се јави во скинијата Господ во облаков столб, и застана облаковиот столб при влезот од скинијата на собранието.

¹⁶И му рече Господ на Мојсеј: „Ете, ти ќе се прибереш кај предците свои, а овој народ ќе почне да се заблудува по туѓите богови на онаа земја, во која оди, ќе Ме остави и ќе го наруши заветот Мој, што го воспоставив со нив;

¹⁷и ќе се разгори јароста Моја против него во овој ден, а Јас ќе ги оставам и ќе го сокријам лицето Свое од нив, и тој ќе биде истребен, и ќе го снајдат многу несреќи и жалости, и ќе речат во тој ден: ‚бидејќи не е Господ Бог меѓу нас, нѐ снајдоа овие зла.‘

¹⁸А Јас ќе го сокријам лицето Мое од него во оној ден поради сите негови беззаконија, што ќе ги направи, бидејќи ќе се обрати кон туѓи богови.

¹⁹А сега, напишете ги зборовите на оваа песна, научете ги синовите израилски на неа и ставете им ја во устата нивна, за да Ми биде таа песна сведоштво меѓу синовите на Израил;

²⁰зашто Јас ќе ги воведам во земја, каде што тече мед и млеко, како што им се заколнав на предците; тие ќе јадат и ќе се наситат, ќе се здебелат и ќе се обратат кон туѓи богови и ќе им служат, а Мене ќе ме разгневат и ќе го нарушат заветот Мој (што им го ветив);

²¹и кога ќе ги снајдат многу несреќи и жалости, таа песна ќе биде против нив како сведоштво, бидејќи таа нема да излезе од устата на потомството нивно. Јас ги знам мислите нивни, што ги имаат, сега, уште пред да ги воведам во земјата, за која им се заколнав.“

²²И во оној ден ја напиша Мојсеј таа песна и ги научи синовите израилски на неа.

²³И му заповеда Господ на Исус, синот Навинов, и му рече: „Биди цврст и храбар, зашто ти ќе ги воведеш синовите на Изриел во земјата, за која им се заколнав. Јас ќе бидам со тебе.“

²⁴А кога Мојсеј ги напиша во книга сите зборови од овој закон сѐ до крајот,

²⁵им заповеда на левитите, кои го носеа ковчегот на заветот Господов, велејќи:

²⁶„Земете ја оваа книга на законот и ставете ја покрај ковчегот на заветот на Господ, вашиот Бог; и таа ќе биде таму сведоштво против тебе;

²⁷зашто јас ја знам твојата упорност и твојата тврдоглавост; ете и сега, кога живеам со вас, вие сте упорни пред Господ; а колку повеќе по смртта моја?

²⁸Соберете ги кај мене сите ваши началници на племињата, (вашите судии) и надзорниците свои, и јас ќе им ги кажам гласно овие зборови, а сведоци ќе ми бидат небото и земјата.

²⁹Зашто знам дека по смртта моја вие ќе вршите беззаконија и ќе отстапите од патот, што ви го заповедав, и подоцна ќе ве снајдат незгоди, затоа што ќе правите зло пред Господ Бог, разгневувајќи Го со делата на рацете ваши.“

³⁰И Мојсеј ги кажа гласно пред целото израилско општество зборовите на таа песна до крај.