Read Свето Писмо: Стандардна Библија 2006 (со девтероканонски книги) Второзаконие 33 Bible Online

Второзаконие 33 - Свето Писмо: Стандардна Библија 2006 (со девтероканонски книги) bible

Второзаконие 33

¹Ова е благословот, со кој Мојсеј, човекот Божји, ги благослови синовите на Израил пред својата смрт.

²И рече: „Господ дојде од Синај, им се јави во Сеир, заблеска од планината Фаран и пристигна со илјадници светии; а во десницата Негова огнен закон за нив.

³Сепак, Ти го сакаш Својот народ и сите светии се во раката Твоја, и тие паднаа пред Твоите нозе, за да ги слушнат зборовите Твои.

⁴Закон ни даде Мојсеј, наследство на народот од Јаков.

⁵И тој беше цар на Јешурун кога се собираа народните кнезови, заедно се соединија израилските племиња.

⁶Да живее Рувим и да не умира, па макар и да е малуброен!“ (И Симеон да биде многуброен).

⁷А за Јуда го кажа ова: „Чуј го, Господи, гласот на Јуда и доведи го кај народот негов; да се заштити со рацете свои, а Ти биди му помошник против непријателите негови.“

⁸И за Левиј рече: „Твојот ‚тумим‘ и Твојот ‚урим‘ се на светиот маж Твој, кого што Ти го искушуваше во Маса,

⁹кој рече за татко си и за мајка си: ‚јас не ги видов‘, и браќата свои не ги признава, и синовите свои не ги познава, бидејќи тие, ги почитуваат зборовите Твои и го пазат заветот Твој,

¹⁰го учат Јаков на законите твои, и Израил на Твоите заповеди, ставаат темјан пред лицето Твое и сепаленици на жртвеникот Твој;

¹¹благослови ја, Господи, силата негова и прими ги делата на рацете негови, порази ги бедрата на непријателите негови, што стануваат против него и кои го мразат, за да не можат да се подигнат.“

¹²За Венијамин рече: „Кого Господ го сака, тој живее во Него со радост, Бог го заштитува секогаш, и тој почива врз рамената Негови.“

¹³За Јосиф рече: „Нека ја благослови Господ земјата негова со многу сакани дарови небески, со роса и со дарови од бездната, што лежи долу,

¹⁴со најдоброто што доаѓа од сонцето и со најдоброто што го донесува месечината,

¹⁵со дарови од старите планини и со дарови од вечните ридови,

¹⁶и со најдоброто од тоа што ја исполнува земјата, и благословот на Оној што се јави од капината да слезе врз главата на Јосиф, врз темето на избраниот меѓу браќата;

¹⁷цврстината му е како на првородено теле, и роговите му се како роговите на бивол; со нив ќе ги избоде сите народи до крајот на земјата: тоа се десетиците илјади Ефремови, тоа се илјадниците Манасиеви.“

¹⁸На Завулон му рече: „Весели се, Завулоне, во своите патишта, и ти Исахаре, под шаторите твои;

¹⁹вие го свикувате народот на планината, таму ќе принесете жртви според законот на правдата, бидејќи богатството на морето ќе ве храни, и сокровиштето сокриено во песокот.“

²⁰За Гад рече: „Благословен нека е кој ќе го прошири Гад; тој почива како лав, готов да ја раскине жртвата своја од пети до глава;

²¹тој си ги присвои првините од освоеното, што му го додели Законодавецот; тој оди во првите редови на народот, извршувајќи го светото дело Господово и својот долг кон Израил.“

²²За Дан рече: „Дан е млад лав, кој скокна од Башан.“

²³За Нефталим рече: „Нефталим е презаситен со пријатности, па нека се засити и со благослов од Господ; Западот и Југот ќе ги наследи.“

²⁴За Асир рече: „Благословен меѓу синовите ќе биде Асир, тој ќе биде омилен меѓу браќата свои и во масло ќе ја натопи ногата своја.

²⁵Од железо и од бакар се твоите резиња;

²⁶Нема друг Бог како твојот Бог, Јешуруне! Кој се пронесува по небото, тебе на помош, и со великолепие на облаците.

²⁷Единиот Бог е твое прибежиште, а вечните Негови раце се твоја поткрепа. Тој го прогонува непријателот пред тебе и ти вели: ‚истребувај!‘

²⁸Израил живее во спокој, потомците на Јаков се сместија во засолниште, во земја изобилна со жито и вино, каде небото праќа роса.

²⁹Блажен си ти, Израиле! Кој е како тебе, народ пазен од Господ, Кој ти е штит — закрилник и меч на славата твоја? Твоите непријатели ќе бараат милост од тебе, а ти ќе ја газиш гордоста нивна.“