Read Свето Писмо: Стандардна Библија 2006 (со девтероканонски книги) Второзаконие 8 Bible Online

Второзаконие 8 - Свето Писмо: Стандардна Библија 2006 (со девтероканонски книги) bible

Второзаконие 8

¹Сите заповеди, кои денес ви ги кажувам, настојувајте да ги исполнувате, за да бидете живи и да се намножите, и да влезете и да ја наследите (добрата) земја, која Господ Бог со заклетва им ја вети на вашите предци.

²И помни го целиот пат, по кој те водеше Господ, твојот Бог, по пустината еве веќе четириесет години, за да те искуша и да дознае што е во срцето твое, дали ги почитуваш заповедите Негови, или, пак, не.

³Тој те смируваше, те мачеше со глад и те хранеше со мана, што ти не ја знаеше, а не ја знаеја ни твоите предци, за да ти покаже дека човекот не живее само од леб, туку од секој збор што излегува од устата Господова;

⁴облеката твоја не изветве на тебе, и ногата твоја не отече, еве веќе четириесет години.

⁵И знај во срцето свое дека Господ, твојот Бог, те поучува како што таткото го поучува синот свој.

⁶Затоа почитувај ги заповедите на Господ, твојот Бог, оди по патиштата Негови и плаши се од Него.

⁷Зашто Господ, твојот Бог, те води во добра земја; во земја каде што има извори и езера, а од планините и долините, течат потоци;

⁸во земја каде што има пченица, јачмен, лозја, смокви и калинки; во земја, каде што има маслиново масло и мед;

⁹во земја, каде што ќе го јадеш лебот свој без недостаток и од ништо нема да имаш потреба, — во земја, каде што камењата се железо, а од планините ќе копаш бакар.

¹⁰И кога ќе јадеш и ќе се наситуваш, благословувај Го Господа, твојот Бог, за добрата земја, што ти ја даде.

¹¹Гледај да не Го заборавиш Господа, твојот Бог, не почитувајќи ги заповедите Негови, законите Негови и наредбите Негови, кои денес ти ги кажувам.

¹²Кога ќе јадеш и ќе бидеш сит, и ќе изградиш убави куќи и ќе се вселиш во нив,

¹³кога ќе ти се намножи крупниот и ситниот добиток, и кога се збогатиш со многу сребро и злато, и од сѐ ќе имаш во изобилие,

¹⁴гледај, да не се возгордее срцето твое, та да заборавиш на Господ, твојот Бог, Кој те изведе од египетската земја, од домот на ропството;

¹⁵Кој те преведе преку големата и страшна пустина, каде што има отровни змии и скорпии, и суви места, во кои нема вода; Кој ти извади вода од гранитна карпа;

¹⁶те хранеше во пустината со мана, која (ти не ја знаеше и) татковците твои не ја знаеја, за да те смири и да те искуша, па да ти направи потоа добро,

¹⁷и за да не кажеш во срцето свое: „Мојата сила и цврстината на мојата рака го здобија ова богатство.“

¹⁸Но да Го помниш Господа, твојот Бог, зашто Тој ти даде сила за да се здобиеш со богатство, за да го исполни, како денес, Својот завет, кој со заклетва го беше потврдил на твоите предци.

¹⁹Ако пак Го заборавиш Господа, твојот Бог, и тргнеш по други богови, служејќи им и поклонувајќи им се, ви сведочам денес (со небото и со земјата) дека ќе изгинете;

²⁰онака како народите, кои Господ Бог ги уништи пред вас: така ќе загинете и вие, затоа што не го послушавте гласот на Господ, вашиот Бог.