Read Свето Писмо: Стандардна Библија 2006 (со девтероканонски книги) Јован 17 Bible Online

Јован 17 - Свето Писмо: Стандардна Библија 2006 (со девтероканонски книги) bible

Јован 17

¹Ова го кажа Исус, па ги подигна очите Свои кон небото и рече: „Оче, дојде часот; прослави Го Својот Син, за да Те прослави и Синот Твој,

²како што си Му дал власт над секое тело, та на сѐ што си му дал, да му даде вечен живот.

³А животот вечен е тоа, да Те познаат Тебе Единиот вистински Бог, и испратениот од Тебе Исус Христос.

⁴Јас Те прославив на Земјата; го извршив делото, што си ми го дал да го извршам.

⁵И сега, прослави Ме Ти, Оче, во Тебе Самиот, со славата што ја имав во Тебе уште светот пред да настане.

⁶Го објавив името Твое на луѓето, што си Ми ги дал од светот; тие беа Твои, и Ти Ми ги даде, и го запазија Твоето слово.

⁷Сега разбраа дека сѐ што си Ми дал, е од Тебе;

⁸зашто зборовите што си Ми ги дал им ги предадов и тие ги примија и разбраа навистина дека од Тебе сум излегол, и поверуваа дека Ти си Ме пратил.

⁹Јас за нив се молам; не се молам за сиот свет, туку за оние што си Ми ги дал, зашто се Твои.

¹⁰И сѐ Мое е Твое, и Твоето — Мое, и се прославив во нив.

¹¹Веќе не сум во светот, но тие се во светот, а Јас идам кај Тебе. Оче Свети, запази ги во Твоето име оние што си Ми ги дал, за да бидат едно, како што сме и Ние.

¹²Додека бев со нив во светот, Јас ги пазев во Твоето име; оние, што си Ми ги дал, ги зачував, и никој од нив не погина, освен погибелниот син, за да се исполни Писмото.

¹³А сега се враќам кај Тебе, и ова му го кажувам на светот за да ја имаат во себе Мојата полна радост.

¹⁴Јас им го предадов Твоето слово, и светот ги замрази, зашто тие не се од светот, како и Јас што не сум од светот.

¹⁵Не се молам да ги земеш од светот, туку да ги запазиш од злото.

¹⁶Тие не се од светот, како и Јас што не сум од светот.

¹⁷Посвети ги со Својата вистина. Твоето слово е вистина.

¹⁸Како Ти Мене што Ме прати во светот, и Јас ги пратив во светот.

¹⁹И за нив јас се посветувам, та и тие да бидат осветени преку вистината.

²⁰Но не се молам само за нив, туку и за оние што преку нивните зборови ќе поверуваат во Мене,

²¹за да бидат сите едно, како што си Ти, Оче, во Мене, и Јас во Тебе; па така и тие да бидат во Нас едно, и да поверува светот дека Ти си Ме пратил.

²²И славата што си Ми ја дал, ним им ја дадов, за да бидат едно, како што сме Ние едно.

²³Јас сум во нив и тие се во Мене, за да бидат во сѐ едно, и да дознае светот дека Ти си Ме испратил, и нив си ги возљубил, како Мене што Ме возљуби.

²⁴Оче, сакам и оние што си Ми ги дал да бидат со Мене, каде што сум Јас, за да ја гледаат Мојата слава што си Ми ја дал, зашто ме возљуби уште пред да се создаде светот.

²⁵Оче Праведен, светот не Те позна, Јас Те познав; и овие познаа дека Ти си Ме испратил;

²⁶и им го објавив името Твое, и ќе го известувам, та љубовта, со која Ме возљуби Ти, да биде во нив, и Јас во нив.“