Read Свето Писмо: Стандардна Библија 2006 (со девтероканонски книги) Римјаните 14 Bible Online

Римјаните 14 - Свето Писмо: Стандардна Библија 2006 (со девтероканонски книги) bible

Римјаните 14

¹Слабиот во вера прифатете го, но без расправии за мислењата!

²Еден верува дека може да јаде сѐ, а слабиот во верата јаде само зеленчук.

³Кој јаде, нека не го укорува оној што не јаде; и кој не јаде, нека не го осудува оној што јаде, бидејќи Бог го прифатил.

⁴Кој си ти што му судиш на туѓ слуга? Пред својот господар тој стои или паѓа, а ќе стои исправено, зашто Бог има моќ да го исправи.

⁵Така некој разликува еден ден од друг, а некој друг, пак, сите денови ги смета еднакви. Секој нека биде наполно уверен во своето мислење.

⁶Оној што ги разликува деновите, ги разликува за Господ; и кој не ги разликува деновите, за Господ не ги разликува. Кој јаде, за Господ јаде, зашто Му благодари на Бога; и кој не јаде, за Господ не јаде и Го фали Бога.

⁷Зашто никој од нас не живее за себе и никој не умира за себе;

⁸туку, било да живееме или да умираме, за Господ живееме и за Господ умираме, — ние Му припаѓаме на Господ. Според тоа — живееме ли, умираме ли — Господови сме.

⁹Бидејќи Христос затоа и умре и воскресна и оживеа, за да господари и над мртвите, и над живите.

¹⁰А ти, зошто го осудуваш братот свој! Или ти, што го укоруваш братот свој? Зашто сите ќе застанеме пред судот Христов.

¹¹Зашто е напишано: „Јас сум жив, вели Господ, зашто пред Мене ќе се свитка секое колено и секој јазик ќе Го славослови Бога.“

¹²И така, секој од нас ќе одговара пред Бога за себе.

¹³Затоа, пак, да не се судиме еден со друг, туку подобро расудувајте за тоа вака: не поставувај му на својот брат спрепка или соблазна.

¹⁴Знам и уверен сум преку Господ Исус Христос дека нема ништо нечисто само по себе; освен кога некој мисли дека е нешто нечисто, за него тоа е нечисто.

¹⁵А ако, пак, братот твој се скрби поради тоа што го јадеш, ти веќе не постапуваш според љубовта. Не погубувај го со своето јадење оној за кого Христос умре.

¹⁶Нека не се хули на она што е добро според вас!

¹⁷Царството Божјо не е во јадењето или пиењето, туку во праведност и мир и радост во Светиот Дух.

¹⁸Зашто, оној кој Му служи на Христос со овие работи, тој Му се допаѓа на Бога и мил им е на луѓето.

¹⁹И така, да го бараме она што служи за мир и взаемно надградување.

²⁰Поради јадење не уривај го делото Божјо! Навистина сѐ е чисто, а тешко е за оној човек, кој јаде поради соблазна;

²¹подобро е да не јадеш месо, да не пиеш вино и да не правиш ништо од кое братот твој би можел да се сопне, или да се соблазнува, или, пак, да слабее.

²²Имаш ли вера? Имај си ја за себе пред Бога. Блазе на оној кој не се осудува себе самиот за она што го одобрува.

²³А ако некој се сомнева кога јаде, осуден е; зашто не јаде со вера; а сѐ што не е според верата, грев е.

²⁴На Оној кој може да ве зацврсти, според моето Евангелие, и проповедањето за Исус Христос, според откривањето на тајната која била замолкната од вечни времиња,

²⁵а која сега се јави, и според пророчките Писма, а по заповедта на вечниот Бог им стана позната на сите народи за да ги доведе во послушност кон верата,

²⁶на Единствениот, мудар Бог, преку Исус Христос нека е слава во сите векови! Амин!