Read Свето Писмо: Стандардна Библија 2006 (со девтероканонски книги) Римјаните 3 Bible Online

Римјаните 3 - Свето Писмо: Стандардна Библија 2006 (со девтероканонски книги) bible

Римјаните 3

¹Која е предноста на Јудејците, или која е ползата од обрезанието?

²Голема, на секој начин, и пред сѐ што ним им се доверени Божјите објавувања.

³Па што, ако некои не поверувале? Дали нивната безверност ќе ја уништи Божјата верност?

⁴Никако! Нека се признае дека Бог е вистинит, а секој човек лажлив, како што е напишано: „За да се покаже дека си праведен во зборовите Свои, и да победиш кога ќе ти се суди.“

⁵Ако, пак, нашата неправедност ја истакнува Божјата праведност, што би можеле да речеме тогаш? Дали е Бог несправедлив, кога се гневи? Говорам како човек.

⁶Никако! Зашто, како Бог ќе може да го суди светот?

⁷Зашто, ако вистината Божја се возвеличува преку мојата лага за слава Негова, па зошто тогаш да бидам осуден како грешник?

⁸Зарем тогаш не би требало да правиме зло, за да излезе добро? Впрочем така и хулат некои луѓе на нас и велат дека така учиме. Тие се справедливо осудени.

⁹Па дали имаме некакво предимство? Ни најмалку, зашто веќе ги обвинивме, како Јудејците така и Елините, дека се сите под грев,

¹⁰како што е напишано: „Нема праведен ниту еден,

¹¹нема разумен, нема кој да Го бара Бога;

¹²сите се отклонија, заедно станаа развратни; нема кој да прави добро, нема ниту еден.“

¹³„Грлото нивно — отворен гроб; со јазиците свои мамат; под јазиците нивни — змиски отров,

¹⁴устата нивна е полна со клетва и горчина.

¹⁵Нозете нивни им се брзи за пролевање крв;

¹⁶пустошење и маки по нивните патишта;

¹⁷тие не го познаа патот на мирот.

¹⁸Страв Божји нема пред очите нивни.“

¹⁹Знаеме дека сѐ она, за што зборува Законот, се однесува на оние, што се под Законот, за да се затвори секоја уста, и така целиот свет да стане виновен пред Бога,

²⁰зашто преку делата на Законот пред Него нема да биде оправдан никој; бидејќи преку Законот се познава гревот.

²¹А сега независно од Законот се јави Божјата праведност, посведочена од Законот и од Пророците.

²²Божјата праведност преку верата во Исус Христос е во сите и врз сите оние што веруваат. Зашто нема разлика,

²³сите згрешија и лишени се од славата Божја.

²⁴Но ќе бидат оправдани преку дар, со Божјата благодат, а преку откупот во Исус Христос.

²⁵Него Бог Го постави со крвта Своја да биде жртва за помирување преку верата, за да ја покаже Својата праведност во опростувањето на поранешните гревови, во времето на Божјото долготрпение,

²⁶за да ја покаже Својата праведност во сегашно време, дека е Тој справедлив и дека го оправдува секого што верува во Исус.

²⁷Каде е, пак, пофалбата? Таа е исклучена. Според кој закон? Дали според оној на делата? Не, туку според законот на верата.

²⁸Така ние заклучуваме дека човекот се оправдува со верата, без делата на Законот.

²⁹Или можеби Бог е пак само на Јудејците, а не и на незнабошците? Се разбира, Тој е и на незнабошците,

³⁰бидејќи еден е Бог, Кој ќе ги оправда обрезаните по вера и необрезаните преку вера.

³¹А дали го укинуваме Законот преку верата? Никако, туку уште посилно го утврдуваме.