Read Свето Писмо: Стандардна Библија 2006 (со девтероканонски книги) 1 Коринтјаните 13 Bible Online

1 Коринтјаните 13 - Свето Писмо: Стандардна Библија 2006 (со девтероканонски книги) bible

1 Коринтјаните 13

¹Да зборувам на сите човечки јазици, па дури и на ангелски, штом љубов немам, ќе бидам бакар, што ѕвони, или кимвал, што ѕвечи.

²Да имам пророчки дар и да ги знам сите тајни, да го имам сето знаење, а и така силна вера, што и планини да преместувам, — ако љубов немам, ништо не сум.

³И да го раздадам целиот свој имот, да го предадам телото да ми изгори, — штом љубов немам, ништо не ми користи.

⁴Љубовта е великодушна, полна со добрина, љубовта не завидува, љубовта не се превознесува, не е горделива,

⁵не е непристојна, не бара свое, не се срди, не памти зло,

⁶не се радува на неправда, туку се радува на вистина,

⁷сѐ покрива, во сѐ верува, на сѐ се надева, сѐ поднесува.

⁸Љубовта никогаш не пропаѓа. А пророкувањата? Ќе минат. Јазиците? Ќе замолкнат. Знаењето? Ќе исчезне.

⁹Зашто само делумно спознаваме и само делумно пророкуваме;

¹⁰а кога ќе дојде совршеното, тогаш ќе исчезне делумното.

¹¹Кога бев дете, зборував како дете, како дете мислев, како дете размислував; а кога станав маж, го оставив детското.

¹²Сега гледаме како низ огледало, нејасно, а тогаш — лице в лице; сега спознавам делумно, а тогаш ќе спознаам совршено како што и сум спознаен.

¹³А сега остануваат овие три работи: верата, надежта и љубовта; најголема меѓу нив е љубовта.