Read Свето Писмо: Стандардна Библија 2006 (со девтероканонски книги) Исус Навин 11 Bible Online

Исус Навин 11 - Свето Писмо: Стандардна Библија 2006 (со девтероканонски книги) bible

Исус Навин 11

¹Кога го чу тоа хацорскиот цар Јавин, прати луѓе кај мадонскиот цар Јовав и кај шимронскиот цар, и кај ахшафскиот цар,

²и кај царевите, што живееја на планината откај север, и во долината јужно од Генисаретското Езеро и во рамнината и на височините кај Дор на запад.

³И кај приморските Хананци, што живееја на исток, и кај приморските Аморејци, и кај Хитијците, и кај Перизијците и Јевусијците, кои живееја во планината, и кај Евејците, што живееја во подножјето на Ермон, во регионот Мицпа.

⁴И излегоа сите тие цареви, а со нив и многу луѓе, толку многу колку песокот во Приморјето, со коњи и многу коли.

⁵И слегоа сите тие цареви, па се соединија и се сместија кај езерото Мером, за да војуваат против Израил.

⁶Но Господ му рече на Исус: „Не плаши се од нив, зашто утре, во ова време, ќе им ги предадам нив сите на синовите Израилеви, за да ги убијат; а на коњите да им ги пресечат жилите и колите со оган да ги изгорат.“

⁷Исус и со него сите способни за војна излегоа ненадејно против нив кај Меромското Езеро и ги нападнаа.

⁸И Господ ги предаде во рацете Израилеви, и тие ги разбија и ги гонеа дури до големиот град Сидон и до Мисрефот-Маим и до долината на Мицпа на исток, и ги убиваа сѐ додека од нив не остана никој жив.

⁹И постапи Исус со нив така, како што му рече Господ: на коњите им ги пресече жилите, а колите им ги изгоре со оган.

¹⁰Во исто време Исус, откако се врати, го презеде Асор и царот негов го уби со меч. Асор, пак, порано беше главен град на сите тие царства;

¹¹и погуби со меч сѐ живо, што беше во него, и не остави во него ниедна жива душа. А Асор, тој го изгоре со оган.

¹²И сите градови на тие цареви ги зазеде Исус, и царевите со меч ги уби, како што беше заповедал Мојсеј, слугата Господов.

¹³Но, сите тие утврдени градови, Израил не ги изгоре, освен Асор, кој го запали Исус.

¹⁴А сето богатство од тие градови и сиот добиток го запленија синовите Израилеви; сите луѓе, пак, ги убија со меч, така што сите беа истребени; не оставија од нив ниту една жива душа.

¹⁵Како што му беше заповедал Господ на Својот слуга Мојсеј, така Мојсеј му заповеда на Исус, а Исус така и направи: не отстапи ниту од еден збор во сѐ што му беше заповедал Господ на Мојсеј.

¹⁶Така ја презеде Исус целата онаа земја: планинската област и целата земја Негев и целата земја Гошен, како и рамнината на запад, и планината Израилева, и полињата (покрај планината),

¹⁷од планината Халак, која се протега кон Сеир, и дури до Ваал-Гад, во долината на Ливан, под планината Ермон, и сите цареви нивни ги фати и ги уби.

¹⁸Долго време Исус војуваше со тие цареви.

¹⁹И немаше ниеден град, кој Господ не му го предаде на Израил, освен Гаваон во кој живееја Евејците; сите тие со борба ги зазедоа;

²⁰зашто од Господ беше тоа, тие да го ожесточат срцето свое и да започнат борба против Израил за да бидат фрлени во проклетство и за нив да нема милост, туку да бидат погубени така, како што му беше заповедал Господ на Мојсеј.

²¹Во тоа време пристигна Исус и ги нападна Анакијците на планината, во Хеврон, во Давир, во Анав, по целата планина Израилева, и по целата планина Јудина со градовите нивни и ги фрли во проклетство.

²²Од Анакијците не остана ниеден во земјата на синовите Израилеви; останаа само во Газа, во Гет и во Ашдод.

²³Така ја презеде Исус целата земја, како што му беше заповедал Господ на Мојсеј, и му ја предаде Исус во наследство на Израил, откако ја раздели на племињата нивни. И земјата престана да војува.