Read Свето Писмо: Стандардна Библија 2006 (со девтероканонски книги) Исус Навин 4 Bible Online

Исус Навин 4 - Свето Писмо: Стандардна Библија 2006 (со девтероканонски книги) bible

Исус Навин 4

¹Кога целиот народ го премина Јордан, Господ му рече на Исус:

²„Земи од народот дванаесет луѓе, по еден маж од секое племе

³и заповедај им и кажи им: ‚Земете оттука, среде Јордан, каде што стоеја неподвижно нозете на свештениците, дванаесет камења, понесете ги со себе и ставете ги на местото, каде што ќе ноќевате оваа ноќ!‘“

⁴Исус повика дванаесет луѓе, што ги избра од синовите Израилеви, по еден маж од секое племе

⁵и им рече: „Одете по мене пред лицето на Господ, вашиот Бог, среде Јордан и секој нека земе оттаму по еден камен, и нека го стави на рамо според бројот на племињата на синовите Израилеви,

⁶за да бидат кај вас знак; кога ќе те праша во подоцнежно време синот твој и ќе рече: ‚зошто се овие камења кај вас?‘

⁷а ти ќе му речеш на синот твој: ‚Водата во реката Јордан престана да тече пред ковчегот на заветот на Господ кога тој го преминуваше Јордан, тогаш водата јорданска пресуши‘; и така тие камења ќе бидат кај вас како вечен споменик на синовите Израилеви.“

⁸И синовите Израилеви направија така, како што заповеда Исус: зедоа дванаесет камења од среде Јордан, како што му рече Господ на Исус, според бројот на племињата на синовите Израилеви, и ги понесоа со себе во логорот, и ги ставија таму.

⁹И други дванаесет камења постави Исус среде Јордан на местото, каде што им стоеја нозете на свештениците, кои го носеа ковчегот на заветот. Тие се таму и до ден-денес.

¹⁰Свештениците, пак, кои го носеа ковчегот, стоеја среде Јордан, додека не беше свршено сѐ што Господ му беше заповедал на Исус — точно така, како што му беше заповедал Мојсеј на Исус; па потоа народот брзо преминуваше.

¹¹Кога целиот народ го премина Јордан, тогаш премина и ковчегот Господов и камењата пред нив.

¹²И Рувимовите синови и Гадовите синови и половината од Манасиевото племе поминаа вооружени пред синовите Израилеви, како што им беше заповедал Мојсеј.

¹³Околу четириесет илјади вооружени за борба преминаа пред Господ кон градот Ерихон за да се борат.

¹⁴Во тој ден Господ го возвеличи Исус пред целиот Израил и почнаа да го почитуваат како што го почитуваа Мојсеј, додека беше жив.

¹⁵И му рече Господ на Исус, велејќи:

¹⁶„Заповедај им на свештениците, што го носат ковчегот на заветот, да излезат од Јордан.“

¹⁷Исус им заповеда на свештениците и рече: „Излезете од Јордан!“

¹⁸И кога свештениците, што го носеа ковчегот на заветот Господов, излегоа од Јордан, и штом нозете нивни стапија на суво, водата на Јордан се спушти на своето место, потече, како порано, по целото корито.

¹⁹И народот излезе од Јордан во десеттиот ден на првиот месец и се смести во Гилгал, на исток од Ерихон.

²⁰И дванаесетте камења, што ги беа зеле од Јордан, Исус ги постави во Гилгал

²¹и им рече на синовите Израилеви: „Кога ќе ве прашаат вашите синови, велејќи: ‚Зошто се овие камења?‘

²²кажете им на вашите синови: Израил го помина Јордан по суво.

²³Зашто Господ, вашиот Бог, ги исуши водите на Јордан за вас, додека да го преминете, исто онака, како што Господ, вашиот Бог, го направи со Црвеното Море, кое го исуши пред нас, додека го преминувавте,

²⁴за да видат сите народи на земјата дека раката Господова е силна, и да Го почитувате Господа, вашиот Бог, секогаш.“