Read Свето Писмо: Стандардна Библија 2006 (со девтероканонски книги) 2 Солуњаните 3 Bible Online

2 Солуњаните 3 - Свето Писмо: Стандардна Библија 2006 (со девтероканонски книги) bible

2 Солуњаните 3

¹Потоа, браќа, молете Му се на Бога за нас, та словото Господово да се распространува и да се слави на секое место, како и меѓу вас,

²и да се избавиме од жестоки и злобни луѓе, бидејќи немаат сите вера.

³Но верен е Господ Кој ќе ве утврди и запази од лукавиот.

⁴Ние сме уверени за вас во Господ дека го вршите и дека ќе го вршите она што ви го заповедаме.

⁵А Господ нека ги насочи срцата ваши право кон љубовта Божја и трпението Христово!

⁶Ви заповедам, браќа, исто така во името на нашиот Господ Исус Христос, да се двоите од секој брат кој живее неуредно, а не според преданието што го добивте од нас!

⁷Сами знаете како треба да се угледате на нас, бидејќи ние не живеевме неуредно кај вас,

⁸ниту, пак, кај некого јадевме леб дарум, туку работевме со труд и мака дење и ноќе за да не му додеваме на никого од вас.

⁹И не поради тоа што немавме власт, туку за да бидеме пример, та да се угледате на нас.

¹⁰Зашто, кога бевме меѓу вас ви го заповедавме ова — кој не сака да работи, тој нека и не јаде.

¹¹Но слушаме дека некои од вас живеат неуредно, ништо не работат, туку се занимаваат со празни работи;

¹²на таквите им заповедаме и ги молиме во нашиот Господ Исус Христос да работат тивко и да си го јадат својот леб.

¹³А вам, браќа, да не ви здодејува да правите добро.

¹⁴Ако некој не ги послуша нашите зборови од ова послание, обележете го и не дружете се со него, за да се посрами;

¹⁵но не сметајте го за непријател, туку поучувајте го како брат.

¹⁶А Сам Господ на мирот нека ви даде мир секогаш и во секое дело! Господ нека е со сите вас!

¹⁷Своерачен поздрав од мене, Павле; тоа е белег во секое послание; јас пишувам така.

¹⁸Благодатта на нашиот Господ Исус Христос нека биде со сите вас. Амин.