Read Свето Писмо: Стандардна Библија 2006 (со девтероканонски книги) 2 Тимотеј 1 Bible Online

2 Тимотеј 1 - Свето Писмо: Стандардна Библија 2006 (со девтероканонски книги) bible

2 Тимотеј 1

¹Павле, апостол на Исус Христос по волјата Божја, според ветувањето на животот, животот во Христос Исус,

²до Тимотеј, возљубеното чедо. Благодат, милост и мир од Бог Отецот и од Христос Исус, нашиот Господ!

³Му благодарам на Бога, Кому уште од прародителите Му служам со чиста совест, додека постојано те споменувам во молитвите свои дење и ноќе;

⁴сеќавајќи се за твоите солзи, копнеам да те видам, за да се исполнам со радост,

⁵спомнувајќи си за нелицемерната вера кај тебе, која најпрвин се всели во твојата баба Лоида и во мајка ти Евника, а убеден сум дека ја има и во тебе.

⁶Поради тоа ти напомнувам да ја распалуваш Божјата дарба, која ја имаш во себе преку полагањето на моите раце.

⁷Зашто Бог не ни даде дух на страв, туку дух на сила, љубов и разбраност.

⁸И така, не срамувај се од сведочењето за нашиот Господ Исус Христос, ниту од мене, затвореникот за Него, туку стани соучесник во страдањата за Евангелието Христово по силата на Бога,

⁹Кој нѐ спаси и нѐ повика кон свето звање, не поради нашите дела, туку по Својата добра волја и благодатта, што ни е дадена во Христос Исус пред вечни времиња,

¹⁰а откриена сега со јавувањето на нашиот Спасител Исус Христос, Кој ја уништи смртта и го осветли животот и нераспадливоста преку Евангелието,

¹¹за кое сум поставен како проповедник, апостол и учител на незнабошците.

¹²Затоа и го трпам тоа; но не се срамувам, зашто знам во Кого сум поверувал и уверен сум дека Тој е моќен мојот залог да го запази за оној ден.

¹³Имај ги, како пример, здравите зборови што си ги чул од мене, со вера и љубов во Христос Исус!

¹⁴Запази го добриот залог преку Светиот Дух, Кој живее во нас!

¹⁵Го знаеш тоа дека мене ме напуштија сите во Азија, меѓу кои и Фигел и Ермоген.

¹⁶Господ нека му даде милост на домот на Онисифор, зашто многупати ме успокои и не се посрами од моите окови.

¹⁷А, кога дојде во Рим, грижливо ме побара и ме најде.

¹⁸Господ нека му даде да најде милост во Него во оној ден! А колку служеше тој во Ефес, ти тоа најдобро го знаеш.