Read Свето Писмо: Стандардна Библија 2006 (со девтероканонски книги) Тит 3 Bible Online

Тит 3 - Свето Писмо: Стандардна Библија 2006 (со девтероканонски книги) bible

Тит 3

¹Напомнувај им да се покоруваат на началствата и властите, да бидат готови за секое добро дело,

²никого да не хулат, да не се караат, туку да бидат мирни, и да покажуваат секаква кроткост кон сите луѓе.

³Бидејќи и ние некогаш бевме неразумни, непокорни, заблудени, бевме робови на желби и на разни сладострастија, живеевме во злоба и завист, бевме одвратни, се мразевме еден со друг.

⁴А кога се јави добротата и човекољубието на нашиот Спасител, Бог,

⁵Тој нѐ спаси, но не според извршените од нас праведни дела, туку по Својата милост, преку бањата на преродување — и обновувањето од Светиот Дух,

⁶Кого изобилно Го излеа на нас преку Исус Христос, нашиот Спасител,

⁷та оправдани со Неговата благодат да станеме по надеж наследници на вечниот живот.

⁸Верни се тие зборови; и јас сакам да го утврдуваш тоа, та оние што поверувале во Бога, да се трудат и да се грижат за добри дела: ова е полезно и добро за луѓето.

⁹А од глупави распрашувања и родословија на племињата, од препирки и расправии, по однос на Законот, клони се, зашто се бесплодни и празни.

¹⁰Бегај од човек раздорник, откако ќе го посоветуваш еднаш или двапати,

¹¹знаејќи дека таков човек се изопачил, греши и дека се осудил сам себеси.

¹²Кога ќе ги пратам кај тебе Артем и Тихик, побрзај да дојдеш кај мене во Никопол, зашто решив таму да презимувам.

¹³Законикот Зина и Аполос погрижи се да ги приготвиш за пат, така, та да немаат потреба од ништо.

¹⁴И нашите нека се учат да прават добри дела за неопходните потреби, за да не бидат бесплодни.

¹⁵Те поздравуваат сите што се со мене. Поздрави ги оние кои нѐ милуваат по вера. Нека биде благодатта со сите вас. Амин!