Read Свето Писмо: Стандардна Библија 2006 (со девтероканонски книги) Судии 3 Bible Online

Судии 3 - Свето Писмо: Стандардна Библија 2006 (со девтероканонски книги) bible

Судии 3

¹А ова се народите, кои Господ ги остави за да ги искушува со нив синовите на Израил, сите оние кои не знаеја за сите битки ханански.

²Само за да знаат и да се научат на војување подоцнежните поколенија на Израил, кои порано не знаеја за војна:

³пет филистејски војводства, сите Хананци, Сидонци и Евејци, кои живееја на планината Ливан од планината Ваал-Ермон до Емат.

⁴Тие беа оставени за да биде преку нив искушуван Израил, и да се дознае, дали се покоруваат на заповедите Господови, кои Тој ги беше заповедал на нивните предци преку Мојсеј.

⁵И живееја Израилевите синови меѓу Хананците, Хитијците, Аморејците, Перизијците, Евејците (Гергесејци) и Јевусијците,

⁶и ги земаа ќерките нивни за жени, и им ги даваа ќерките свои на синовите нивни, и им служеа на нивните богови.

⁷Синовите Израилеви извршија зло пред очите на Господ, и Го заборавија својот Господ Бог, и им служеа на Вааловци и на Ашери [2].

⁸Тогаш Господ се разгневи силно против Израил, и ги предаде во рацете на Кушан-Ришатаим, царот на Горни Арам, и синовите Израилеви му робуваа на Кушан-Ришатаим осум години.

⁹Потоа синовите Израилеви повикаа кон Господ, и Тој подигна за синовите Израилеви спасител — Кеназовиот син Готониил, помалиот брат на Халев.

¹⁰Врз него беше Духот Господов, и тој беше судија на Израил. Тој објави војна против Кушан-Ришатаим, и Господ го предаде во рацете негови арамејскиот цар Кушан-Ришатаим и раката негова се зацврсти над Кушан-Ришатаим.

¹¹И земјата беше спокојна четириесет години, Потоа умре Готониил, синот на Кеназ.

¹²Синовите Израилеви почнаа пак да прават зло пред Господ, и Господ му даде сила на моавскиот цар Еглон против Израил, поради тоа што тие правеа зло пред Господ.

¹³Тој ги собра кај себе синовите Амонови и Амаликови, па тргна и го собори Израил, и го завладеа градот на палмите [3].

¹⁴И синовите Израилеви му робуваа на моавскиот цар Еглон осумнаесет години.

¹⁵Тогаш синовите Израилеви пак повикаа кон Господ, и Господ им го избра за спасител Аод, синот на Гера, од Венијаминовото племе, кој беше левак. И синовите Израилеви испратија по него дарови до моавскиот цар Еглон.

¹⁶Аод си направи меч со две сечила, долг еден лакот, и го препаша под облеката своја на десното бедро,

¹⁷и однесе дарови на моавскиот цар Еглон, а Еглон беше многу дебел човек.

¹⁸Кога Аод ги принесе сите дарови и ги испрати луѓето што ги донесоа даровите,

¹⁹сам се врати откај идолите што се во Гилгал, и рече: „Царе, имам тајна порака за тебе.“ Тој рече: „Потивко!“ И излегоа сите што стоеја покрај него.

²⁰Аод влезе кај него: тој седеше сам во летната горна соба. Тогаш Аод рече: „Имам Божја порака за тебе.“ Еглон стана од престолот.

²¹Кога тој стана, Аод ја подаде својата лева рака, и го зеде мечот од десното бедро и го заби во неговиот стомак,

²²така што сечилото влезе заедно со дршката, а салото го покри сечилото; бидејќи Аод не можеше да го извади мечот, од неговиот мев излегуваше нечистотија.

²³Аод потоа излезе од собата, ја затвори вратата и ја заклучи.

²⁴Откако излезе, слугите на Еглон дојдоа и видоа: ете, вратата на собата е заклучена, и си рекоа: сигурно тој е отиден по потреба до летната соба.

²⁵Чекаа доста долго, но откако видоа дека никој не ја отвора вратата од собата, зедоа клуч и отклучија, а таму нивниот господар лежи на земјата мртов.

²⁶Додека се чудеа, Аод избега, мина покрај идолите и се засолни во Сеира.

²⁷А штом пристигна Аод затруби со труба во Ефремовата Планина, и слегоа со него синовите Израилеви од гората, и тој тргна пред нив.

²⁸И им рече: „Одете по мене, зашто Господ ги предаде непријателите ваши, Моавците, во ваши раце.“ И тргнаа по него, ги презедоа моавските премини на Јордан, и не пуштија никој да премине.

²⁹Тогаш убија околу десет илјади Моавци, сѐ здрави и силни, и никој не избега.

³⁰Така се смирија во оној ден Моавците пред Израил, и земјата беше спокојна осумдесет години. (И Аод беше нивен судија до својата смрт).

³¹По него дојде Самегар, син Анатов, кој уби шестотини Филистејци со воловски остен; и тој исто така го избави Израил.