Read Библија, Константинов Битие (1 Moj.) 13 Bible Online

Битие (1 Moj.) 13 - Библија, Константинов bible

Битие (1 Moj.) 13

¹Така Аврам излезе од Египет кон Негев, (на југ) со својата жена и со сè што имаше, и Лот отиде со него.

²Аврам беше многу богат со добиток, сребро и злато.

³Одеше од место до место, од јужната страна до Ветил,

⁴до местото каде го имаше оптегнато неговиот шатор отпорано, меѓу Ветил и Гај, и каде подигна жртвеник. Таму Аврам го повика Господовото име.

⁵Исто и Лот, кој го придружуваше Аврама, имаше овци, говеда и шатори,

⁶така што земјата не можеше да ги издржува доколку останеа заедно. Нивниот имот беше голем и не можеа да престојуваат заедно.

⁷Меѓу пастирите на Аврамовиот добиток и пастирите на Лотовиот добиток, избувнуваше спор. Во тоа време Ханаанците и Ферезејците живееја во таа земја.

⁸Затоа Аврам му рече на Лота: „Да не спориме јас и ти, ни моите пастири и твоите пастири, зашто сме браќа.

⁹Не е ли пред тебе целата земја? Оддели се од мене! Ако тргнеш налево, јас надесно; ако тргнеш надесно, јас налево.”

¹⁰Лот ги подигна очите и согледа колку е добро наводнувана Јорданската Долина, како некаква Господова градина, како Египетската Земја сè до Сигор, пред Господ да ги истреби Содом и Гомор.

¹¹Затоа Лот ја избра целата Јорданска Долина и замина на исток. Така се одделија еден од друг.

¹²Аврам остана во Ханаанската Земја, додека Лот живееше во градовите на рамницата и ги преместуваше своите шатори до Содом.

¹³А жителите на Содом беа многу зли и грешни пред Господа.

¹⁴Господ му рече на Аврама, откако Лот се оддели од него: „Подигни ги своите очи, од местото каде си, и погледај кон север, југ, исток и запад,

¹⁵зашто сета земја, што можеш да ја видиш, ќе ти ја дадам тебе, и на твоето потомство довека.

¹⁶Ќе го направам твоето потомство како прав на земјата. Ако некој може да го изброи правот на земјата, тогаш ќе може да го преброи и твоето потомство.

¹⁷Стани! Помини ја земјата надолж и нашироко, зашто тебе ќе ти ја дадам.”

¹⁸Тогаш Аврам ги крена шаторите и дојде и се насели при дабот Мамра, што е во Хеврон. Таму Му направи жртвеник на Господа.