Read Библија, Константинов Битие (1 Moj.) 17 Bible Online

Битие (1 Moj.) 17 - Библија, Константинов bible

Битие (1 Moj.) 17

¹Кога Аврам имаше деведесет и девет години, Господ му се јави и му рече: „Јас Сум Ел Шадај - Сè моќен Бог, оди по Мојот пат и биди непорочен.

²А Својот Завет го склучувам со тебе и ќе те размножам многу.”

³Аврам падна ничкум додека Господ му зборуваше уште:

⁴„А ова е Мојот Завет со тебе, ќе станеш татко на многу народи;

⁵и повеќе нема да се викаш Аврам (Висок Татко), туку името ќе ти биде Авраам (Татко на Множество), зашто те поставувам за татко на многу народи.

⁶Ќе те направам многу плоден; ќе произведам народи од тебе и цареви ќе произлезат од тебе.

⁷Го склучив Својот Завет меѓу Мене и тебе и твоето потомство, после тебе - Свој вечен Завет за векови: Јас ќе ви бидам Бог тебе и на твоето потомство, после тебе.

⁸Ви ја давам, тебе и на твоето потомство после тебе, земјата, во која престојуваш како придојденец, целата Ханаанска Земја, во вечна сопственост, а Јас ќе им бидам Бог.”

⁹Уште Бог му рече на Авраама: „А ти чувај го Мојот Завет - ти и твоето потомство по тебе низ сите родови.

¹⁰А ова е Мојот Завет, со тебе и со твоето потомство после тебе, што треба да го чувате: секое машко меѓу вас нека биде обрезано.

¹¹Обрезувајте се и тоа нека е знак на Заветот меѓу Мене и вас.

¹²Секое машко среде вас, низ вашите поколенија, кога ќе наполни осум дена, нека биде обрезано, како она што е родено во вашиот дом, така и она што е купено со сребро од некој странец, кој не е од вашата крв.

¹³Да, и родениот во твојот дом и купениот со сребро треба да биде обрезан! Така Мојот Завет на вашите тела ќе остане вечен Завет.

¹⁴Машкото што не ќе биде обрезано, нека биде истребено од својот род: зашто го нарушило Мојот Завет.”

¹⁵После Бог му рече на Авраама: „На твојата жена Сара не и е повеќе името Сара: името ќе и биде Сбра.

¹⁶Ќе ја благословам неа и ќе ти дадам син од неа; ќе излеам благослов врз неа и ќе стане мајка на многу народи; цареви на народи ќе произлезат од неа.”

¹⁷Авраам падна ничкум и се насмеа и рече во себеси: „Зар може да му се роди дете на оној, кој има сто години? Зар Сбра ќе раѓа во деведесеттата година?”

¹⁸Авраам му рече на Бога: „Нека поживее Исмаил пред Тебе!”

¹⁹А Бог рече: „Сепак твојата жена Сбра ќе ти роди син; дај му име Исак. Својот Завет ќе го склучам со него; вечен Завет со него и со неговото потомство после него.

²⁰Те послушав и за Исмаила. Еве го благословувам: ќе го направам плоден и ќе го размножам многу; дванаесет кнезови ќе произлезат од него и голем народ ќе направам од него.

²¹Но ќе го држам Својот Завет со Исак, кого ќе ти го роди Сбра, догодина во ова време.”

²²Кога го заврши разговорот со него, Бог замина од кај Авраама.

²³Потоа Авраам ги зеде: својот син Исмаил и сите кои беа родени во неговиот дом и сите што ги купи со сребро - сите машки домашни - и ги обреза во истиот ден, како што Бог му рече.

²⁴Авраам имаше деведесет и девет години кога се обреза,

²⁵а неговиот син Исмаил имаше тринаесет години кога го обреза.

²⁶Така во истиот ден беа обрезани Авраам и неговиот син Исмаил;

²⁷и сите машки во неговиот дом, како родените во неговата куќа, така и купените со сребро од странци - сите беа обрезани заедно со него.