Read Библија, Константинов Битие (1 Moj.) 25 Bible Online

Битие (1 Moj.) 25 - Библија, Константинов bible

Битие (1 Moj.) 25

¹Авраам си зеде уште една жена, по име Хетура.

²Таа му ги роди: Земрана, Јоксана, Мадана, Мадијама, Есвока и Шуаха.

³А од Јоксана се родија: Сава и Дедан. Деданови потомци се: Асуримците, Латусимците и Лаомимците.

⁴Мадијанови синови се: Гефа, Ефер, Енох, Авида и Елдага. Сите тие се Хетурини потомци.

⁵Авраам го пренесе целиот свој имот на Исака;

⁶а на синовите на своите соложници Авраам им даде само дарови и уште додека беше жив ги испрати кон исток - далеку од својот син Исак - во Источна Земја.

⁷Ова е должината на Авраамовиот живот што го проживеа: сто седумдесет и пет години.

⁸Потоа Авраам почина, умре во чесна старост - стар и полн со години - па им се придружи на своите луѓе.

⁹Неговите синови, Исак и Исмаил, го погребаа во пештерата Махпела, во нивата на Ефрон, син на Хетеецот Сахар, спроти Мамвриј.

¹⁰Тоа е полето што Авраам го купи од Хетевите синови. Таму се погребани Авраам и неговата жена Сбра.

¹¹По Авраамовата смрт Бог го благослови неговиот син Исак. Исак живееше близу Вир-Лахај-Рои.

¹²Еве го родословието на Авраамовиот син Исмаил, кого му го роди на Авраама Сбрината слугинка, Египетката Агара.

¹³А ова се Исмаиловите синови, секој според своето име и раѓање: Исмаиловиот првенец - Навајот, Кидар, Адвеил, Мавсам,

¹⁴Масма, Дума, Маса,

¹⁵Адад, Тема, Етур, Нафис и Кедма.

¹⁶Тоа се Исмаиловите синови и тоа се нивните имиња според нивните населби и шатори: дванаесет кнезови на толку племиња.

¹⁷А ова е должината на Исмаиловиот живот: сто и триесет и седум години. Потоа издивна; умре и им се придружи на своите луѓе.

¹⁸Неговите потомци се населија од Евил до Сур, што е на исток од Египет, кога се оди кон Асирија. Се населија независно од своите браќа.

¹⁹Ова е родословие на Авраамовиот син Исак: Исак се роди од Авраама.

²⁰Исак беше на четириесет години кога се ожени со Ревека, ќерка на Арамеецот Ватуил од Падан Арам, а сестра на Арамеецот Лаван.

²¹Исак му се обрати на Бога за својата жена, зашто беше неродилка. Господ го послуша и неговата жена Ревека зачна.

²²Но децата се судрија така, во нејзината утроба, што таа извика: „Ако е така, зошто да живеам!” И отиде да се посоветува со Господа.

²³И Господ и рече: „Два народа се во твојата утроба; две племиња ќе се одделат од твоето крило. Едниот народ ќе биде посилен од другиот, повозрасниот ќе му служи на помладиот.”

²⁴Дојде време да роди, кога ете - близнаци беа во нејзината утроба.

²⁵Се појави првиот. Беше црвен, сиот обрастен како кожна наметка. Затоа го нарекоа Исав.

²⁶Потоа се појави неговиот брат. Со раката се држеше за петицата на Исава. Затоа го нарекоа со името Јаков. Исак имаше шеесет години, кога се родија тие.

²⁷Кога децата пораснаа, Исав стана искусен ловец, полски човек. Јаков беше кроток човек и живееше во шатори.

²⁸Исав му беше помил на Исака, зашто сакаше дивеч, а Ревека го љубеше повеќе Јакова.

²⁹Еден ден Јаков вареше јадење. Исав дојде од полето, гладен.

³⁰Исав му рече на Јакова: „Дај ми да јадам од црвеното варило, зашто сум гладен.” Затоа му е името Едом.

³¹А Јаков одговори: „Отстапи ми го првин своето првородство!”

³²Исав рече: „Еве ме речиси на умирање; зошто ми е првородството!”

³³Јаков продолжи: „Заколни ми се првин!” Тој му се заколна, и така му го продаде на Јакова своето првородство.

³⁴Тогаш Јаков му даде на Исава леб и варило од леќа. Јадеше и пиеше, па се крена и си отиде. Така Исав го презре своето првородство.