Read Библија, Константинов Битие (1 Moj.) 30 Bible Online

Битие (1 Moj.) 30 - Библија, Константинов bible

Битие (1 Moj.) 30

¹Откако Рахила виде дека не му раѓа деца на Јакова, и завиде на својата сестра и му рече на Јакова; „Дај ми деца! Инаку ќе умрам!”

²Јаков се налути на Рахила и рече: „Зар сум Бог, Кој ја лиши твојата утроба од плод?”

³А таа одговори: „Еве ја мојата слугинка Вала: влези при неа, па нека роди на моите колена, па така и јас ќе добијам деца преку неа.”

⁴И така, му ја даде за жена својата слугинка Вала, и Јаков и пристапи.

⁵Вала зачна и му роди на Јакова син.

⁶Тогаш Рахила рече: „Господ ми пресуди право. Го послуша мојот глас и ми даде син.” Затоа му го даде името Дан.

⁷Рахилината слугинка Вала зачна пак и му роди на Јакова втор син.

⁸Тогаш Рахила рече: „Жестоко се борев со сестрата, ама победив.” Затоа го нарече Нефталим.

⁹А откако Лија виде дека прекрати да раѓа, ја зеде својата слугинка Зелфа, па му ја даде на Јакова за жена.

¹⁰И Кога Лиината слугинка Зелфа му роди син на Јакова,

¹¹Лија воскликна: „Доаѓа среќа!” Затоа го нарече со името Гад.

¹²Лиината слугинка Зелфа му роди на Јакова и втор син,

¹³и Лија воскликна пак: „Блазе ми! Жените ќе ме викаат блажена!” Затоа го нарече со името Асир.

¹⁴Еден ден, во времето на пченичната жетва, Рувим најде мандрагори во полето, па и ги донесе на мајка си Лија. И Рахила и рече на Лија: „Дај ми од мандрагорите на сина си!”

¹⁵А Лија одговори: „Зар не ти е доста што ми го одзеде мажот, па уште сакаш да ги земеш од мене и мандрагорите на мојот син?” Рахила одговори: „Па добро, Јаков нека лежи со тебе ноќеска, во замена за мандрагорите на твојот син.”

¹⁶Кога Јаков стигна од поле, приквечер, Лија му излезе во пресрет и му рече: „Ти треба да дојдеш при мене, зашто те зедов под наем за мандрагорите на мојот син.” Таа ноќ тој лежеше со неа.

¹⁷Бог ја послуша Лија; таа зачна па му го роди на Јакова петтиот син.

¹⁸Тогаш Лија рече: „Бог ми врати со награда, затоа му ја отстапив својата слугинка на мажа си.” Затоа на синот му даде име Исахар.

¹⁹Лија зачна пак и му го роди на Јакова шестиот син.

²⁰Тогаш Лија рече: „Бог ме дарува со скапоцен дар; сега мојот маж ќе ми даде дарови: па му родив шест синови.” Затоа го нарече Завулон.

²¹Потоа роди ќерка и и го даде името Дина.

²²А Господ се сети за Рахила: Бог ја послуша и ја отвори нејзината утроба.

²³Таа зачна и роди син, па рече: „Бог го отстрани мојот срам!”

²⁴Му го даде името Јосиф, велејќи: „Господ нека ми придаде и друг син!”

²⁵Откако Рахила го роди Јосифа, Јаков му рече на Лавана: „Пушти ме да си одам во мојот роден крај!

²⁶Дај ми ги моите жени, за кои ти служев, и моите деца, за да можам да си одам: па добро знаеш како ти служев.”

²⁷А Лаван одговори: „Не си оди, ако си ми пријател. Знам дека Господ ме благословуваше заради тебе.”

²⁸И уште рече: „Одреди си плата, каква сакаш од мене, и ќе ти ја дадам.”

²⁹Тој му одговори: „Ти добро знаеш што значеше мојата служба за тебе и како му беше на твојот добиток при мене.

³⁰Тоа малку што го имаше пред моето доаѓање, се зголеми мошне многу, зашто каде и да поминував, Господ те благословуваше на моите чекори. А сега е време да поработам и за својот дом.”

³¹Тој го праша: „Колку да ти платам?” Јаков одговори: „Не ми плаќај ништо! Пак ќе го пасам и ќе го чувам твоето стадо, ако ми го сториш ова:

³²Остави ме да поминам денес низ твоето стадо и да ја одделам од него секоја капчеста и шарена овца и секое црникаво од јагнињата и секоја капчеста и шарена од козите! Тоа нека ми биде плата!

³³А во иднина кога со своите очи ќе ја проверуваш мојата плата, мојата чесност ќе биде сведок за мене: ако се најде меѓу моите кози една што не ќе биде шарена или капчеста, или меѓу јагнињата што не ќе биде црникаво, нека се смета за крадено!”

³⁴Лаван рече: „Добро, нека биде како што кажа.”

³⁵Но во тој ден, Лаван ги оддели сите шарени и дамкасти јарци, и сите жолтоцрвеникави и шарени кози - секоја што имаше бело на себе и секое црникаво од јагнињата па им ги предаде на своите синови.

³⁶И оттаму, каде Јаков го пасеше остатокот на Лавановото стадо, се оддалечи на околу три дни одење.

³⁷А Јаков зеде млади зелени прачки од топола, леска и јавор; вреза во нив белини, меѓу оставена кора, така што се гледаше белото на прачките.

³⁸Така нашараните прачки ги стави во коритата, во поилата од кои пиеше добитокот. А бидејќи добитокот се спаруваше кога доаѓаше при водата,

³⁹јарците се расплодуваа покрај прачките, па затоа козите окозуваа дамкасти, капчести и шарени јариња.

⁴⁰Така Јаков ги одделуваше и овците и им ги вртеше главите кон шарените или кон сосем црните, што беа во Лавановото стадо.

⁴¹Освен тоа, кога и да се спаруваше добро порастениот добиток, Јаков ги ставаше прачките во коритата, токму пред очите на животните, така што се оплодуваа пред прачките.

⁴²Но не ги ставаше пред послабите. Така послабите му паѓаа на Лавана, а добро развиените на Јакова.

⁴³Така човекот се збогати сосем многу; придоби многу добиток, и слуги и слугинки, и камили и ослиња.