Read Библија, Константинов Битие (1 Moj.) 32 Bible Online

Битие (1 Moj.) 32 - Библија, Константинов bible

Битие (1 Moj.) 32

¹Јаков одеше по својот пат, кога во пресрет му излегоа Божји ангели.

²Штом Јаков ги забележа, рече: „Ова е Божјо воинство!” Затоа го нарече местото Маханаим.

³Јаков испрати гласници, пред себе, до брата си Исава во Сирската Земја во месноста Едом,

⁴и им наложи: „Вака ќе му речете на мојот господар Исав: ‘Твојот слуга Јаков ти порачува: „Живеев при Лавана, се задржав таму досега.

⁵Придобив говеда, ослиња, овци, слуги и слугинки. Му го соопштувам ова на својот господар, за да најдам милост во неговите очи.’”

⁶Гласниците се вратија при Јакова и му рекоа: „Бевме кај твојот брат Исав; самиот тој ти доаѓа во пресрет со четири стотини момчиња.”

⁷Јаков се исплаши многу. Во загриженоста, ги подели во две дружини: луѓето, стадата, говедата и камилите, што беа со него.

⁸Сметаше: „Ако Исав налета на едната дружина и ја нападне, другата ќе може да се спаси.”

⁹Тогаш Јаков се помоли: „О, Боже на татка ми Авраама! Боже на мојот татко Исак! О, Господи, Кој ми нареди: ‘Врати се во својот роден крај, и Јас ќе ти сторам добро!’

¹⁰Не сум достоен за сета добрина што му ја искажуваше на својот слуга постојано. Зашто некогаш само со својот стап поминав преку Јордан, а сега станав две дружини.

¹¹Избави ме од рацете на брата ми, од Исавовите раце! Инаку се плашам дека може да дојде и да нè убие: и мене, и мајките, и децата.

¹²Ти рече: ‘Ќе ти давам изобилно добрини и твоето потомство ќе го умножам како морскиот песок, што не може да биде изброен заради своето множество.’”

¹³Таму ја помина ноќта; а потоа, од она што имаше при рака, му приготви дар на својот брат Исав:

¹⁴двеста кози и дваесет јарци, двеста овци и дваесет овни;

¹⁵триесет камили - доилки со нивните мали камили; четириесет крави и десет јунци; дваесет ослиња и десет ждребиња.

¹⁶Стадо по стадо им ги предаде на своите слуги. Тогаш им рече на своите слуги: „Одете пред мене, но држете растојание меѓу стадата!”

¹⁷А на првиот му издаде заповед, велејќи: „Кога ќе те сретне мојот брат Исав, па те праша: ‘Чиј си? Каде одиш? Чие е ова пред тебе?’

¹⁸Одговори: ‘На твојот слуга Јаков; ова е дар што му го испраќа на својот господар Исав; а тој иде по нас.’”

¹⁹Така им нареди и на вториот, па на третиот, и на сите други што одеа по стадата: „Ова кажете му на Исава кога ќе го сретнете.

²⁰И кажете му уште: „А твојот слуга Јаков и самиот иде по нас.” Имено, мислеше: „Ако го смилувам, однапред, со подароците, а потоа се соочам со него, можеби ќе ми прости.”

²¹Така подароците тргнаа напред, додека тој ја преспа ноќта во логорот.

²²И стана во таа ноќ, ги зеде своите две жени, своите две слугинки и своите единаесет деца и премина преку бродот на Јавок.

²³И ги зеде, ги помина преку потокот, и преведе сè свое. И Јаков остана сам.

²⁴И Некој се бореше со него до зазорување.

²⁵Откако виде дека не може да го совлада, му го измести бедрото при зглобот, така што на Јакова му се измести колкот додека се бореа.

²⁶Потоа рече: „Пушти Ме, зашто се зазори!” Но тој одговори: „Не те пуштам додека не ме благословиш.”

²⁷Тогаш, го праша: „Како ти е името?” Одговори: „Јаков.”

²⁸Оној му рече: „Отсега не ќе ти биде името Јаков, а Израел, зашто се бореше со Бога и со луѓето, и победи.”

²⁹Јаков го праша: „Кажи ми го Твоето име?” А Тој рече: „Зошто прашуваш за Моето име, тоа е чудно?” И го благослови таму.

³⁰Јаков го нарече местото: Фануил, зашто - рече - „Го видов Бога лице во лице, и останав жив.”

³¹Сонцето изгреа над него, кога заминуваше од Фануил. Кривеше заради колкот.

³²Затоа и досега Израелевите синови не ја јадат жилата, што е во состав на бедрото, зашто Јакововиот бедрен зглоб беше изместен во жилата на бедрото.