Read Библија, Константинов Битие (1 Moj.) 39 Bible Online

Битие (1 Moj.) 39 - Библија, Константинов bible

Битие (1 Moj.) 39

¹Јосифа го доведоа во Египет. Таму, од Исмаилците кои го доведоа тука, го купи Египетецот Петефриј, фараонов придворник и заповедник на неговата телесна стража.

²Господ беше со Јосифа, затоа имаше успех во сè: Египетецот го зеде при себе, во куќата.

³Неговиот господар виде дека е Господ со него и дека му дава успех во сè што неговата рака презема;

⁴тој го засака и го зеде дворјанец, и го постави за управител на својот дом и му го довери сиот свој имот.

⁵А откако го постави над домот свој и над сè што имаше, Господ го благослови домот на Египетецот заради Јосифа: Господовиот благослов беше на сè што имаше - во куќата и во полето.

⁶И така сè свое и отстапи на Јосифовата грижа, па повеќе не се грижеше за ништо, освен за лебот што го јадеше. А Јосиф беше со складна става и убав.

⁷По некое време господаровата жена се загледа во него и му рече: „Легни со мене!”

⁸Тој и се спротиви и рече на жената на својот господар: „Гледај! Откако сум јас тука, мојот господар не се грижи за ништо во куќата; сè што има ми го довери мене.

⁹Тој нема во куќава поголема власт отколку јас, и ништо не ми скратува освен тебе, зашто си негова жена. И како би можел да направам толку големо зло и да згрешам против Бога!”

¹⁰Иако таа секојдневно му зборуваше така на Јосифа, тој не се согласи да легне со неа и да биде со неа.

¹¹Еден ден Јосиф влезе во куќата по работа. Бидејќи никој од слугите не беше во куќата,

¹²таа го фати за наметката и рече: „Легни со мене!” Но тој ја остави својата наметка во нејзината рака, се истрга и избега надвор.

¹³Откако виде дека ја остави наметката во нејзината рака и дека избега надвор,

¹⁴ги повика своите слуги и им рече: „Гледајте! Требаше да ни доведе еден Евреин, за да се подигрува со нас. Тој дојде при мене, за да легне со мене, но јас извикав со сиот глас.

¹⁵А штом чу како викам, ја остави својата наметка покрај мене и избега надвор.”

¹⁶Ја задржа неговата наметка кај себе, додека господарот дојде дома.

¹⁷И нему му ја раскажа истата приказна: „Оној, слугата Евреинот, кого ни го доведе, дојде при мене, за да се подигрува со мене!

¹⁸Но штом чу како викам, ја остави својата наметка покрај мене и избега надвор.”

¹⁹Кога неговиот господар го чу раскажувањето на својата жена, која рече: „Ете, така постапи твојот слуга со мене”, се разгневи.

²⁰Господарот го грабна Јосифа и го фрли во темницата - таму каде што беа затворени царските затвореници. И остана во темницата.

²¹Но Господ беше со него, му покажа благодат на Јосифа, и тој најде милост во очите на управителот на темницата.

²²Така управителот на темницата ги предаде во Јосифови раце сите затвореници, кои се наоѓаа во темницата; и таму не се правеше ништо без него.

²³Бидејќи Господ беше со него, управителот не надгледуваше ништо што му беше доверено на Јосифа: Господ беше со него, и што да преземеше, Господ му даваше успех.