Read Библија, Константинов Битие (1 Moj.) 9 Bible Online

Битие (1 Moj.) 9 - Библија, Константинов bible

Битие (1 Moj.) 9

¹Тогаш Бог ги благослови Ное и неговите синови и им рече: „Плодете се и множете се и наполнете ја земјата.

²Нека се плашат и нека треперат од вас сите животни на земјата, сите птици во воздухот,

³сè што се движи и живее нека ви биде за храна; ви дадов сè како што ви ја дадов зелената трева.

⁴Само не јадете го месото со неговиот живот, односно со неговата крв.

⁵А за вашата крв, за вашиот живот, ќе барам сметка: ќе ја барам од секое животно; и од човекот за неговиот брат; ќе барам сметка за човечкиот живот.

⁶Кој пролее човечка крв, Човек ќе ја пролее неговата крв! Зашто Бог го создаде човекот Според Својот образ.

⁷А вие, плодете се и множете се, наполнете ја земјата и подложете ја под себе!”

⁸Уште Бог им рече на Ное и на неговите синови, со него:

⁹„Еве, Јас го склучувам Својот Завет со вас и со вашето потомство, после вас,

¹⁰и со сите живи суштества што се со вас: со птиците, со добитокот, со ѕверовите, - со сè што излезе, со вас од бродот - со сите живи суштества на земјата.

¹¹Го поставувам Својот Завет со вас, така што никогаш повеќе потопните води нема да ги уништат живите суштества, ниту пак некогаш потопот ќе ја опусти земјата.

¹²И Бог рече: „А ова е знакот на Заветот, Што го склучувам меѓу Себе и вас И со сите живи суштества што се со вас, За идните поколенија:

¹³Го сместувам Мојот божилак во облакот, За да биде залог за Заветот, Меѓу Мене и земјата.

¹⁴Кога ќе дотерам облаци над земјата, А божилакот се појави во облакот,

¹⁵Ќе си спомнам за Својот Завет, За Заветот меѓу Мене и вас И секое живо суштество: И потоп повеќе нема да има, За да го истреби секое суштество.

¹⁶Кога божилакот ќе се појави во облакот, Јас ќе го видам И ќе си спомнам за вечниот Завет Меѓу Бога и секоја жива душа, И секое тело на земјата.”

¹⁷И Бог му рече на Ное: „Тоа нека е знак на Заветот, што го склучив меѓу Себе и сите живи суштества на земјата.”

¹⁸Ноевите синови, што излегоа од бродот, беа: Сим, Хам и Јафет. А Хам е прататко на Ханаанците.

¹⁹Тројцава беа Ноеви синови и од нив се насели целиот свет.

²⁰А Ное почна да ја обработува земјата и посади лозје.

²¹Се напи вино и се испијани, па се разголи во својот шатор.

²²Хам, прататкото на Ханаанците, го виде разголениот татко и им го кажа тоа на своите двајца браќа надвор.

²³А Сим и Јафет зедоа наметка, па ја префрлија преку своите раменици и одејќи назадечки ја покрија со неа, татковата голота. Лицата им беа свртени на другата страна, така што не го видоа татка си гол.

²⁴Кога Ное се отрезни од виното и дозна што му направи најмладиот син,

²⁵рече: „Проклет да е Ханаан, и да им биде слуга на своите браќа!”

²⁶Тогаш продолжи: „Благословен да е Господ, Симовиот Бог, а Ханаан ќе му биде слуга!

²⁷Бог нека го рашири Јафета, аа да живее во Симовите шатори, Ханаан нека му е слуга!”

²⁸А по потопот Ное поживеа триста и педесет години.

²⁹Ное живееше вкупно девет стотини и педесет години; и почина.