Read Библија, Константинов 2 Самоилова 22 Bible Online

2 Самоилова 22 - Библија, Константинов bible

2 Самоилова 22

¹Давид му ги упати на Господа зборовите на оваа песна во денот кога Господ го избави од рацете на сите негови непријатели и од Сауловата рака.

²Пееше: „Господи, стено моја, тврдино моја, спасител мој;

³Боже мој, пештеро моја во која прибегнувам, штит мој, спасение мое, крепост моја! Ти ме избавуваш од насилство.

⁴Ќе го повикам Господа, Кој е предостоен за пофалба и ќе бидам избавен од непријателите.

⁵Брановите на смртта ме опкружија мене, ме исплашија погубувачките буици.

⁶Јажињата на Подземјето ме сопираа, смртоносни стапици паднаа на мене:

⁷во неволја го повикав Господа и извикав кон својот Бог. Од Својот Дом го чу мојот повик и моето викање стигна до Неговите уши.

⁸И земјата се стресе и се растрепери, се растресоа основите на небесата, се раздвижија, зашто Тој пламна со гнев.

⁹Од Неговите носалки се дига дим, од Неговата уста избувна оган, живожарица пламти од Него.

¹⁰Тој ги наведна небесата и слезе, под Неговите нозе - мрачни облаци.

¹¹Застана над херувим и полета; заброди врз крилјата на ветерот.

¹²Се наметна со мракот како со превез, се покри со темни води и со густи облаци,

¹³од блесокот пред Неговото лице пламнаа огнени јаглења.

¹⁴Господ загрми од небото, гласот на Сèвишниот ечи.

¹⁵Ги оптегна стрелите и ги распрсна враговите, фрли молњи и ги обори на земјата.

¹⁶Морските дна се покажаа, и основите на светот станаа голи од страшната закана на Господа, од буроносниот здив на Неговиот гнев.

¹⁷Тој ја испружи раката од небото и ме прифати мене, Тој ме избави од силните води.

¹⁸Мене ме ослободи од силниот противник, од моите непријатели посилни од мене.

¹⁹Станаа против мене во злосреќен ден, но Господ ме заштити,

²⁰ме изведе во широко поле, ме спаси, зашто сум Му мил.

²¹Според мојата праведност Господ ми врати, според чистотата на моите раце Тој ме награди,

²²зашто ги пазев Господовите патишта, не се оддалечив од својот Бог.

²³Неговите одредби се пред моите очи, не ги отфрлив Неговите заповеди,

²⁴Нему Му бев верен до с’ржта, се чувам од секој грев.

²⁵Господ ми врати според мојата правда, ја виде чистотата на моите раце.

²⁶Со пријателот Ти си пријател, на чесниот со чесност му враќаш.

²⁷Со чистиот човек Ти си чист, а итриот го надигруваш,

²⁸зашто на понизниот народ му донесуваш спасение, а ги понижуваш горделивите очи.

²⁹Господи, Ти ја запалуваш мојата светилка, Боже, ја осветлуваш мојата темнина:

³⁰со Тебе удирам врз непријателските чети, со својот Бог ги прескокнувам ѕидовите.

³¹Совршени се Господовите патишта, и Господовото слово е испитано со оган. Тој им е штит на сите, кои прибегнуваат кај Него.

³²Зашто кој е Бог освен Господ? Кој е стена освен нашиот Бог?

³³Тој Бог ме опашува со сила, и ја отстранува гибелта од мојот пат.

³⁴Ми даде нозе брзи како на кошута, и ме постави на безбедни височини,

³⁵ми ги извежба рацете за борба и мишките за да оптегнуваат бронзен лак.

³⁶Ми го даваш Својот штит што спасува, Твојата грижливост ме возвиси.

³⁷Верба му даваш на мојот чекор, и моите нозе веќе не се сопнуваат.

³⁸Ги гонев своите непријатели и ги настигнав, и не се вратив додека не ги уништив.

³⁹Ги оборувам, не можат да се дигнат, паѓаат, ми лежат под нозете.

⁴⁰Ти ме опаша со сила за борба, а моите противници ми ги подложи мене.

⁴¹Ти ги натера во бегство моите врагови, и ги распрсна оние кои што ме мразеа.

⁴²Викаат на помош, никој да помогне, викаат кон Господа, не се одѕвива.

⁴³Ги здробив како прав на ветер, ги згазив како кал на патот.

⁴⁴Ти ме избави од буната во мојот народ, ме постави за главатар на незнабошците, народ, што не го познавав, ми служи.

⁴⁵Тој го слуша покорно секое мое шептење. Синови туѓинци ми ласкаат мене.

⁴⁶Туѓинските синови ја губат смелоста, излегуваат треперејќи од своите тврдини.

⁴⁷Жив е Господ! Благословена да е мојата Стена! Нека се возвиши Господ, моето спасение!

⁴⁸Бог Кој ми дава одмазда и ми ги покорува мене народите.

⁴⁹Ме избавуваш од моите непријатели, и ме издигаш над моите противници, Ти ме спасуваш мене од човекот - силник.

⁵⁰Затоа Те славам, Господи, меѓу народите и ќе го воспевам Твоето Име:

⁵¹ги умножи победите на Својот цар, му искажа милост на Својот помазаник, на Давида и на неговото потомство довека.”