Read Библија, Константинов 2 Самоилова 23 Bible Online

2 Самоилова 23 - Библија, Константинов bible

2 Самоилова 23

¹Ова се последните Давидови зборови: Слово на Давида, Јесеевиот син, збор на човек кој беше високо воздигнат, на помазаникот на Јакововиот Бог, на пејачот на Израелевите песни:

²”Господовиот Дух зборува преку мене, Неговото слово е на мојот јазик.

³Јакововиот Бог ми рече, Израелевата Стена ми рече: ‘Кој владее праведно со луѓето, и кој владее со страв Божји,

⁴тој е како утринската светлина кога ќе огрее сонцето, утро без облаци, на кое светка земната трева после дождот.’

⁵Да, мојата куќа стои цврсто пред Бога: Тој склучи вечен Завет со мене, во сè добро уреден и утврден. Да, Тој ќе направи да напреднува сето мое спасение и секоја моја желба.

⁶Беззакониците се како трња во пустината, зашто никој не ги фаќа со рака.

⁷Никој не ги допира освен со железо и со дршка на копјето и потполно ги изгоруваат во оган.”

⁸Ова се имињата на Давидовите јунаци: Тахмонецот Јосев-Васевет, првак меѓу тројца; тој замавна со своето копје против осум стотини и ги погуби одеднаш.

⁹По него доаѓа Елеазар, синот Додонов, Ахоховец, еден од тројцата јунаци; тој беше со Давида кај Пас Дамин кога се собраа таму Филистејците за бој, а Израелците се повлекоа пред нив.

¹⁰Ама тој се држеше цврсто додека раката не му се здрви и остана како зарастена со мечот. Господ даде голема победа во оној ден, па војската се врати со Елеазара, но само за да го собере пленот.

¹¹По него доаѓа Сама, синот Елин, Харерец; кога Филистејците се собраа во Лехија, полето беше полно со леќа, а војската беше избегана пред Филистејците.

¹²Тогаш тој застана сред полето и го одбрани, и ги разби Филистејците. Така Господ даде голема победа.

¹³Еднаш тројцата од триесетмина тргнаа на пат и во почетокот на жетвата дојдоа кај Давида во Одоламската Пештера, кога една филистејска чета беше влогорена во Рефаимската Долина.

¹⁴Давид тогаш беше во својата крепост, а филистејската посада тогаш беше во Витлеем.

¹⁵Давид издивна: „О кога некој би ме напил со вода од витлеемскиот кладенец што е кај вратата?”

¹⁶Тогаш тие тројца јунаци продреа низ филистејскиот логор и, откако нацрпија вода од витлеемскиот кладенец што е кај вратата, му ја донесоа и дадоа на Давида. Ама Давид не сакаше да ја пие, туку ја излеа пред Господа,

¹⁷зборувајќи: „Господ да не ми даде да го направам тоа! Зар да ја пијам крвта на овие луѓе? Та излагајќи го животот на гибел, донесоа вода!” И не сакаше да пие. Ете, тоа го направија тие три јунаци.

¹⁸Ависај, Јоавовиот брат а синот Серуин, беше војвода над триесетмина. Тој мавташе со копјето против три стотини, ги погуби и се прослави меѓу триесетмината.

¹⁹Тој се одликуваше меѓу триесетмината и стана нивни главатар, ама не ги достигна тројцата.

²⁰Синот Јодаев Венаја, јунак од Кавсеила, богат со јуначки дела, му ги уби двата сина на Ариел од Моав; тој во еден снежен ден слезе и уби лав сред јамата.

²¹Уби и некој Египетец, крупен човек. Египетецот имаше копје во раката, а тој излезе пред него со стап: истргнувајќи му го на Египетецот копјето од раката, го уби со неговото копје.

²²Тоа го направи Јодаевиот син Венаја и се прослави меѓу триесетмината јунаци.

²³Беше најпознат меѓу триесетмината, ама не ги достигна оние први три; Давид го постави за заповедник на своите телохранители.

²⁴Асаил, братот Јоавов, беше меѓу триесетмината. Потоа: Елханан син Додонов, од Витлеем;

²⁵Сама, од Арод; Елика од Арод;

²⁶Хелис, од Фалет; Ира син Икисов, од Текоја;

²⁷Авиезер, од Анатот; Сибекај, од Хуса;

²⁸Ахохиецот Салмон, Нетофатецот Марај;

²⁹Хелев, синот Ванин, од Нетофа; Итај, синот Ривеев, од Гаваја на Венијаминовите синови;

³⁰Венаја од Пиратон; Идај од Гаскиот Поток;

³¹Ави Алвон, од Вет Арава; Азмавет, од Варуим;

³²Елијав, од Салвона; Јасин, син Јонатанов;

³³Сама, од Арара; Ахијам, син Сараров, од Арера;

³⁴Елифелет, син Асвеев, од Вет Маха; Елијам, син Схитофелов, од Гилон;

³⁵Есрај, од Кармил; Фареј, од Арава,

³⁶Игал, син Натанов, од Сова; Ваниј од Гад;

³⁷Селек, Амонец, Нареј, од Вирот, штитоносец на Серуиниот син Јоав;

³⁸Ира, од Јетра; Гарив, од Јетра;

³⁹Уриј, Хетеец; вкупно триесет и седум.