Read Библија, Константинов 1 Цареви 10 Bible Online

1 Цареви 10 - Библија, Константинов bible

1 Цареви 10

¹Гласот со кој се здоби Соломон во Господовото Име стигна до царицата од Сава; затоа таа дојде за да го испита Соломона со гатанки.

²Дојде во Ерусалим со голема придружба, со камили што носеа мириси, со неброено злато и со бесцени камења. Откако дојде кај Соломона, поразговара со него за сè што и беше на срце.

³Соломон и одговори на сите прашања; не му беше скриено ништо за да не би можел да и одговори.

⁴Кога царицата од Сава ја виде Соломоновата мудрост, дворецот што го беше изградил,

⁵јадењата на неговиот стол, неговите соби и дворници, отменоста на неговите слуги и на неговите облеки, неговите виноподнесувачи, и палениците кои што ги принесол во Господовиот Дом, и застана здивот.

⁶Тогаш му рече на царот: „Вистина беше што чув за тебе во својата земја и за твојата мудрост.

⁷Ама не сакав да верувам на тоа што се раскажуваше додека не дојдов и не видов со своите очи; и навистина, ни половината не ми беше кажана: ти ја надвишуваш во мудроста и во благосостојба славата за која што чув.

⁸Блазе им на твоите луѓе блазе им на оние твои слуги, кои се непрекинато пред тебе и ја слушаат твојата мудрост!

⁹Нека е благословен Господ, твојот Бог, кому толку му стана мил за да те постави на престолот на Израелците; затоа што Господ секогаш го љуби Израел, те постави за цар за да правиш право и правда.”

¹⁰Тогаш му даде на царот сто и дваесет златни таланти, многу милномириси и бесцени камења. Никогаш веќе немаше такви мириси какви што царицата од Сава му ги даде на царот Соломон.

¹¹Па и Хирамовите бродови, кои што донесуваа злато од Офир, пренесоа оттаму многу сандалови (алмук, црвено дрво) дрва и бесцени камења.

¹²Царот од сандаловината направи ограда за Господовиот Дом и за царскиот дворец, и псалтири и харфи за пејачите; никогаш веќе не беа префрлени толку сандалови дрва ниту се видени до денес.

¹³Царот Соломон и даде на царицата од Сава сè што посака и што побара, а освен тоа царски ја дарува. Потоа таа тргна и со своите слуги се врати во својата земја.

¹⁴Златото што му доаѓаше на Соломона секоја година беше шест стотини шеесет и шест златни таланти,

¹⁵освен она што доаѓаше од трговците и од продавачите - со мириси, и од сите арабјански цареви и од земните управители.

¹⁶Царот Соломон направи три стотини големи штитови од ковано злато; за секој штит употреби шест стотини златни шекели;

¹⁷и направи триста штитчиња од ковано злато; за секое штитче потроши три мини. Ги стави за чување во куќа наречена Ливанска Куќа.

¹⁸Царот уште направи голем престол од слонови коски и го обложи со чисто злато.

¹⁹Престолот имаше шест лествици, одзади на него имаше телешка глава, а од двете страни на седиштето беа рачки, а покрај рачките стоеја два лава.

²⁰Дванаесет лавови стоеја од обете страни на оние шест лествици. Такво нешто не беше изработено во ниедно царство.

²¹Сите садови од кои што пиеше царот Соломон беа златни, и сите посатки во куќата од Ливанските дрва беа од чисто злато; ништо не беше од сребро, зашто среброто се сметаше за безвредно во Соломоновото време.

²²Царот имаше тарсиски бродови на море заедно со Хирамовите бродови, и во секоја трета година тарсиските бродови доаѓаа, донесувајки злато, сребро и слонова коска, мајмуни и пауни.

²³Така царот Соломон ги надмина сите земни цареви со богатство и со мудрост.

²⁴Сиот свет сакаше да го види Соломона и да ја чуе мудроста што Бог му ја всади во срцето.

²⁵Секој му донесуваше подарок: сребрени и златни посатки, облеки, оружје, мириси, коњи и мазги, од година во година.

²⁶Покрај тоа Соломон собра бојни коли и коњаници; имаше илјада и четири стотини бојни коли и дванаесет илјади коњи, и ги распореди по градовите на бојните коли и кај царот во Ерусалим.

²⁷Соломон направи да има во Ерусалим сребро како камења, а кедри како диви смокви што растат во Сефела.

²⁸Соломон внесуваше коњи од Мусрија и од Кое: царевите набавувачи ги донесуваа од Кое за одредена цена.

²⁹Колите ги довезуваа од Египет по шест стотини сребрени шекели; а коњот се плаќаше по сто и педесет. Така преку набавувачите, хетитските и арамејските цареви го добиваа сè тоа.