Read Библија, Константинов 1 Цареви 15 Bible Online

1 Цареви 15 - Библија, Константинов bible

1 Цареви 15

¹Во осумнаесеттата година на Јеровоамовото царување, синот Наватов, се зацари Авијам во Јудеја.

²Три години царуваше во Ерусалим; неговата мајка се викаше Мака, а беше Авесаломова ќерка.

³Тој одеше во сите гревови што неговиот татко ги правеше пред него, и неговото срце не му беше потполно верно на Господа, својот Бог, како срцето на неговиот прататко Давид.

⁴Сепак, заради Давида, Господ, неговиот Бог, му даде светилник во Ерусалим, подигнувајќи ги неговите синови по него и запазувајќи го Ерусалим.

⁵Зашто Давид правеше сè што беше право во очите на Господа, и за време на сиот свој живот не отстапи од ништо што му беше заповедано, освен она што му го направи на Хетеецот Уриј.

⁶А војна беше меѓу Ровоам и Јеровоам сиот негов век.

⁷Другата Авијамова повест, сè што направил, зар тоа не е запишано во книжниот свиток Летописи на јудејските цареви? А имаше војна меѓу Авијам и Јеровоам.

⁸Потоа Авијам почина со своите татковци. Го погребаа во Давидовиот Град; на негово место се зацари син му Аса.

⁹Во дваесеттата година на Јеровоамовото царување над Израел, Аса стана цар над Јудеја.

¹⁰Царуваше четириесет и една година во Ерусалим; неговата баба се викаше Мака, а беше Авесаломова ќерка.

¹¹Аса правеше што е право во очите на Гопода, како и неговиот прататко Давид.

¹²Ги протера од земјата „посветените блудници” и ги отстрани сите кипови што ги беа направиле неговите татковци,

¹³самиот ја отстрани својата баба Мака да не биде царица, зашто и беше направила гад на Ашера. Аса го исече нејзиниот гад и го спали во потокот Кедрон.

¹⁴Ама високите места не беа уништени; сепак Асиното срце Му беше приврзано на Господа за време на сиот негов живот.

¹⁵Ги внесе во Господовиот Дом посветените дарови на татка си и своите: сребро, злато и садови.

¹⁶Имаше војна меѓу Аса и Васа, израелскиот цар, во сите нивни денови.

¹⁷Израелскиот цар Васа нападна на Јудеја и почна да ја утврдува Рама, за да му го спречи секое движење на јудејскиот цар Аса.

¹⁸Тогаш Аса зеде сребро и злато, што останало во ризницата на Господовиот Дом и во ризницата на царскиот дворец, и им го даде на своите слуги та ги испрати кај Вен-Адад, синот Тамримов, синот Есионов, арамејски цар, кој престолуваше во Дамаск, и му порача:

¹⁹”Нека биде сојуз меѓу мене и тебе, како што беше меѓу мојот и твојот татко; еве, ти праќам дар - сребро и злато: ајде, раскини го сојузот со израелскиот цар Васа, за да отиде од мене.”

²⁰Вен-Адад го послуша царот Аса и ги испрати своите војсководачи против израелските градови, та тие ги покорија Ијон, Дан, Авел-Вет-Мака, сиот Хинерот и сета Нефталимова Земја.

²¹А кога Васа научи за тоа, прекрати да ја утврдува Рама, и се врати во Терса.

²²Царот Аса ги повика сите Јудејци, без исклучок, и тие ги однесоа камењата и дрвото со кои Васа ја утврдуваше Рама, и царот Аса ги утврди со тоа Венијаминовата Гева и Миспа.

²³Другата Асина повест, сите негови победи, и сè што направи, и градовите што ги утврди, зар тоа не е запишано во книжниот свиток Летописи на јудејските цареви? А на старост боледуваше од нозете.

²⁴Аса почина со своите татковци, и беше погребан со своите татковци во градот на Давида, својот прататко. Неговиот син Јосафат се зацари место него.

²⁵Надав, синот Јеровоамов, стана цар на Израел, во втората година на Асиното царување со Јудеја, и владееше со Израел две години.

²⁶Правеше зло во очите на Господа. Одеше по патот на својот татко и го поддржуваше неговиот грев на кој го наведуваше Израел.

²⁷Васа, синот Ахиин, од Исахаровиот дом, се побуни против него и го уби во Гиветон, кој им припаѓаше на Филистејците, и што Надав и сиот Израел го опсадија.

²⁸Васа го уби во третата година на Асиното царување со Јудеја, и завладеа место него.

²⁹Кога стана цар, ја погуби сета Јеровоамова куќа и не поштеди никого од Јеровоамовите додека не ги истреби сите според словото што Господ го кажа преку својот слуга Ахиј од Сило.

³⁰Заради гревовите што ги направи и на кои го наведуваше Израел, и за оскрбувањето со кое го разгневил Господа, Израелевиот Бог.

³¹Другата Надавова повест, и сè што направил, зар тоа не е запишано во книжниот свиток Летописи на израелските цареви?

³²Меѓу Аса и Израелевиот цар Васа владеше војна во сите нивни денови.

³³Во третата година на Асиното царување со Јудеја, Васа, синот Ахиин, стана цар над сиот Израел во Терса, и владееше дваесет и четири години.

³⁴Правеше зло во Господовите очи, и одеше по патот на Јеровоам и на неговите гревови со кои ги заведуваше Израелците.